Walmik Karad : वाल्मिक कराडचे लातुरातही घबाड, दुसऱ्या पत्नीच्या नावे कोट्यवधींची जमीन
Walmik Karad Property : लातूर टेंभुर्णी महामार्गावर मुरूडच्या जवळ वाल्मिक कराडची दुसरी पत्नी ज्योती मंगल जाधव हिच्या नावे कोट्यवधींची जमीन असल्याची माहिती समोर आली आहे.
लातूर : सरपंच संतोष देशमुख हत्याप्रकरणातील आरोपी वाल्मिक कराडच्या संपत्तीबाबत रोज नवीन माहिती समोर येत आहे. वाल्मिक कराडची दुसरी पत्नी ज्योती मंगल जाधव हिच्या नावावर लातूरमध्येही चार ते पावणे पाच एकर शेती असल्याची माहिती आहे. या जमिनीची किंमत कोट्यवधी रुपये आहे. संरपंच हत्या प्रकरणात एसआयटीकडून याची माहिती घेणं आता सुरू आहे.
राज्यातील अनेक ठिकाणी संपत्ती असलेल्या वाल्मिक कराडची लातूर जिल्ह्यात देखील संपत्ती असल्याची माहिती समोर आली आहे. लातूर टेंभुर्णी महामार्गावर मुरुडच्या जवळ कराडची दुसरी पत्नी ज्योती मंगल जाधव हिच्या नावे चार ते पावणे पाच एकर जमीन आहे.
गुन्हेगारी मार्गाने कमावलेला पैसा
परळी आणि बीडममध्ये गुन्हेगारी मार्गाने कमावलेल्या पैशातून वाल्मिक कराड आणि त्याच्या टोळीने राज्यातील वेगवगेळ्या शहरांत कोट्यवधी रुपयांच्या मालमत्ता खरेदी केल्याचं समोर आलं आहे. त्यातूनच पुण्यातील फर्ग्युसन महाविद्यालयाच्या समोर असलेल्या इमारतीत वाल्मिक कराड आणि टोळीने पंचवीस कोटी रुपये खर्चून सहा ऑफिस स्पेसेस विकत घेतले आहेत.
पहिल्या पत्नीपेक्षा दुसऱ्या पत्नीच्या नावे चौपट संपत्ती
वाल्मिक कराडची पहिली पत्नी मंजीरीच्या नावे सव्वाचार कोटी रुपयांची मालमत्ता आहे. तर दुसरी पत्नी ज्योतीच्या नावे साडेसतरा कोटी रुपयांची मालमत्ता आढळून आली आहे. अशाप्रकारे दोन्ही पत्नींच्या नावे मिळून एकूण 19 कोटी 75 लाख रुपयांची मालमत्ता आतापर्यंत आढळून आली आहे.
पहिली पत्नी मंजिलीच्या नावे असलेली संपत्ती
- पहिली पत्नी मंजीली आणि वाल्मिकच्या स्वतःच्या नावे पिंपरी - चिंचवडच्या काळेवाडीत 4 BHK फ्लॅट - अंदाजे किंमत - सव्वा तीन कोटी.
- पहिली पत्नी मंजीली आणि वाल्मिकच्या स्वतःच्या नावे पिंपरी - चिंचवडच्या वाकडमधे टू बीएचके फ्लॅट - अंदाजे किंमत एक कोटी.
वाल्मिकची दुसरी पत्नी ज्योती मंगल जाधव हिच्या नावे असलेली संपत्ती
- फर्ग्युसन महाविद्यालयाच्या समोर असलेल्या इमारतीत दोन ऑफिस स्पेसेस - अंदाजे किंमत - अंदाजे बारा कोटी.
- पुण्यातील हडपसरमधील अॅमनोरा टाऊनशीपमधे एक फ्लॅट - किंमत अंदाजे दीड कोटी रुपये.
- खराडी मधील गेरा ग्रीन्सव्हीला सोसायटीत एक फ्लॅट - किंमत अंदाजे - पावशे दोन कोटी रुपये.
- सोलापूर जिल्ह्यातील बार्शी तालुक्यातील शेंद्रे गावात 35 एकर जमीन. किंमत अंदाजे दीड कोटी रुपये.
- दुसरी पत्नी ज्योती मंगल जाधवच्या नावे बीड जिल्ह्यातील मांजरसुंबा इथे 9 एकर जमीन. किंमत अंदाजे सत्त्यात्तर लाख रुपये.
ही बातमी वाचा:
महत्त्वाच्या बातम्या
