Latur: इंस्टाग्रामवर शिवी दिली म्हणून अपहरण करुन खुनाचा प्रयत्न, नग्न करून बेल्टने केली जबर मारहाण

इन्स्टाग्रामवर शिवी दिली म्हणून अल्पवयीन मुलाला बेदम मारहाण केल्याची धक्कादायक घटना घडली आहे. 

Latur Crime News

लातूर: इंस्टाग्राम वरून शिवी दिल्याच्या किरकोळ कारणावरून बारावीत शिक्षण घेणाऱ्या एका अल्पवयीन विद्यार्थ्याचं सिनेस्टाईल अपहरण करण्यात आलं आणि चक्क नग्न करून अमानुषपणे मारहाण करत जीवे मारण्याचा प्रयत्न करण्यात आला. लातुरातल्या ट्युशन एरियात सक्रिय असलेल्या एका क्राईम कंपनीकडून हा धक्कादायक प्रकार करण्यात आला. एकूण अकरा जणांनी मिळून हा प्रकार केल्याचं समोर आलं असून त्याचा धक्कादायक आणि अमानुष मारहाण केल्याचा व्हिडीओ देखील समोर आला.

शिक्षणाच्या लातूर पॅटर्नमुळं नावारूपाला आलेल्या लातूर शहरातल्या ट्युशन एरियात गुन्हेगारांनी दहशत पसरवायला सुरुवात केली आहे. परजिल्ह्यातून आणि परराज्यातून विध्यार्थी शिक्षणासाठी लातुरात येतात. त्यामुळं त्यांच्यात दहशत निर्माण करून पैसे उकळणाऱ्या अनेक टोळ्या तयार झाल्या आहेत. अशाच एका मुलांच्या गटाने इन्स्टाग्रामवर शिवी दिल्याचे कारण पुढे करत अल्पवयीन विद्यार्थ्यांस बेदम मारहाण केली आहे.

पोलिसांच्या सतर्कतेमुळं घातपाताचा आरोपींचा कट उधळला असला तरी या आरोपींनी क्रौर्याची सीमा गाठलीय. यातील दोन आरोपी हे सराईत गुन्हेगार आहेत तर इतर आरोपी त्यांचे हस्तक म्हणून काम करतात. या प्रकरणी पाच आरोपीच्या मुसक्या आवळण्यात पोलिसांना यश आलंय तर इतर सहा आरोपी अद्यापही फरार आहेत.

जिल्ह्यातला क्राईम रेट कमी करण्यासाठी लातूरचे पोलीस अधीक्षक सक्रिय असतात. त्यामुळं ट्युशन एरियात थेट पोलीस चौकीची देखील स्थापना करण्यात आली. मात्र या पोलीस चौकीत नेहमी शुकशुकाटच असतो. आता या प्रकरणाची गंभीर दखल घेऊन पोलीस अधीक्षक गुन्हेगारांवर जरब बसवतील का याकडं सर्वांचं लक्ष लागलं आहे. 

महत्त्वाच्या बातम्या: