Kolhapur Rain : कोल्हापूर जिल्ह्यात पावसाचे तांडव; पाटगाव, कुंभी धरण भरले, राधानगरी धरणाचा एक दरवाजा उघडला, राजाराम बंधाराही पाण्याखाली

पाणलोट क्षेत्रात होत असलेल्या पावसामुळे राधानगरी धरणाचा सहाव्या क्रमांकाचा स्वयंचलित दरवाजा उघडला आहे. त्यामुळे भोगावती नदी काठच्या लोकांना सतर्कतेचा व सावधानतेचा इशारा देण्यात आला आहे.

Kolhapur Rain

Kolhapur Rain : गेल्या 24 तासांपासून कोल्हापूर जिल्ह्यात पावसाचे तांडव सुरु आहे. जिल्ह्यात गेल्या 24 तासांमध्ये अनेक ठिकाणी ढगफुटीसदृश्य पाऊस झाला. कालपासून सुरु असलेल्या पावसाचा गणेश विसर्जन मिरवणुकीवरही परिणाम झाला. पावसाच्या सुरु असलेल्या तांडवामुळे अनेक सखल भागात पाणी साचले आहे. ओढ्या, नाल्यांमध्येही पाणी ओसंडून वाहू लागले आहे. कोल्हापूर शहराला लागून असलेला कळंबा तलावही पुन्हा सांडव्यावरून वाहू लागला आहे. राजाराम बंधारा मोसमात चौथ्यांदा पाण्याखाली गेला आहे. प पंचगंगेची पातळी बंधाऱ्यावर 17 फुटांवर पोहोचली आहे. 

कोल्हापूर जिल्ह्यासाठी 13 सप्टेंबरपर्यंत यलो अलर्ट देण्यात आला आहे. जिल्ह्यातील अनेक धरणांच्या पाणलोट क्षेत्रामध्ये दमदार पाऊस होत असल्याने भरलेल्या धरणांमधून नदी पात्रात विसर्ग सुरु करण्यात आला आहे.

राधानगरी धरणाचा एक दरवाजा उघडला 

धरणांच्या पाणलोट क्षेत्रात होत असलेल्या पावसामुळे राधानगरी धरणाचा सहाव्या क्रमांकाचा स्वयंचलित दरवाजा उघडला आहे. त्यामुळे भोगावती नदी काठच्या लोकांना सतर्कतेचा व सावधानतेचा इशारा देण्यात आला आहे. धरणातून सध्या 3 हजार 28 क्युसेकने विसर्ग सुरु आहे. 

तुळशी धरणातून पाण्याचा विसर्ग वाढवला

दुसरीकडे पावसाचा जोर वाढल्याने तुळशी धरणातून विसर्ग वाढवण्यात आला आहे. आज सकाळी 10 वाजल्यापासून तुळशी धरणातून सध्या असणारा 500 क्युसेक्स विसर्ग 300 ने वाढ करून 8000 क्युसेक्स करण्यात आला आहे. त्यामुळे तुळशी नदी काठच्या लोकांनाही सतर्कतेचा इशारा देण्यात आला आहे. 

कोल्हापूर जिल्ह्यातील दोन बंधारे पाण्याखाली

दरम्यान, कोल्हापूर शहरासह जिल्ह्यामध्ये पावसाचा जोर वाढल्याने रुई आणि इचलकरंजी बंधारा पाण्याखाली गेला आहे.   

पाटगाव, कुंभी धरण 100 टक्के भरले

पावसाचा जोर वाढल्याने पाटगाव आणि कुंभी धरण पूर्ण क्षमतेने भरले आहे. काल दुपारी अडीचच्या सुमारास पाटगाव धरण पूर्ण क्षमतेने भरले, तर सायंकाळी चारच्या सुमारास कुंभी धरण 100 टक्के भरले. 

जिल्ह्यातील 9 धरणे 100 टक्के भरली

जिल्ह्यातील तुळशी, कुंभी, पाटगाव, चिकोत्रा, चित्री, जंगमहट्टी, घटप्रभा, जांबरे आणि कोदे धरण 100 टक्के भरले आहे.  

अलमट्टी धरणातून विसर्ग सुरु 

पावसाचा जोर वाढल्याने पूर्ण क्षमतेने भरलेल्या अलमट्टी धरणातूनही पाण्याचा विसर्ग सुरु करण्यात आला आहे. अलमट्टी धरणातून 52 हजार 500 क्युसेकने विसर्ग सुरु आहे. हिप्परगी धरणातून विसर्ग सध्या बंद आहे. दुसरीकडे कोयना धरणातूनही विसर्ग बंद आहे. धरणात 2 हजार 469 क्युसेकने विसर्ग सुरु आहे. धरणात 100.70 टीएमसी पाणीसाठा आहे. 

इतर महत्वाच्या बातम्या