Modi 3.0 Cabinet : रक्षा खडसेंना केंद्रीय मंत्रिमंडळात संधी, खडसेंचे कट्टर विरोधक चंद्रकांत पाटलांची पहिली प्रतिक्रिया; म्हणाले...

PM Modi Oath Taking Ceremony : खासदार रक्षा खडसे यांना केंद्रीय मंत्रिमंडळात संधी मिळाली आहे. यावर खडसेंचे कट्टर विरोधक चंद्रकांत पाटील यांनी प्रतिक्रिया दिली आहे.

Raksha Khadse and Chandrakant Patil

PM Modi Oath Taking Ceremony : नरेंद्र मोदी (Narendra Modi) आज तिसऱ्यांदा पंतप्रधानपदाची शपथ घेत आहे. रावेर लोकसभा मतदारसंघातून (Raver Lok Sabha Constituency) रक्षा खडसे (Raksha Khadse) या तिसऱ्यांदा खासदार म्हणून निवडून आल्या असून त्यांना मोदींच्या मंत्रिमंडळात संधी देण्यात आली आहे. रक्षा खडसे आज मंत्रिपदाची शपथ घेतील. 

या शपथविधीसाठी ज्येष्ठ नेते एकनाथ खडसे (Eknath Khadse)हेदेखील दिल्लीला पोहोचले आहेत. खडसेंचे कट्टर विरोधक मुक्ताईनगरचे आमदार चंद्रकांत पाटील (Chandrakant Patil) यांनी रक्षा खडसे यांचे अभिनंदन केले आहे. महायुती म्हणून आम्ही देखील रक्षा खडसे यांना निवडून आणण्यासाठी प्रयत्न केले. जळगाव जिल्ह्याचा विकास होईल, असा विश्वास व्यक्त करत त्यांनी एकनाथ खडसे यांच्यावर निशाणा साधला आहे. 

रक्षा खडसे मुक्ताईनगरच्या सूनबाई

चंद्रकांत पाटील म्हणाले की, देशाचे पंतप्रधान नरेंद्र मोदी तिसऱ्यांदा शपथ घेणार असल्याचा आनंद आहे. राज्यात निवडणूक टफ झाली, पण जळगावच्या दोन्ही महायुतीच्या जागा आमच्या मोठ्या फरकाने निवडून आल्या. जळगाव जिल्हा हा आजही महायुतीचा बालेकिल्ला असल्याचे स्पष्ट झाले. रक्षा खडसे यांचे अभिनंदन, रक्षा खडसे आमच्या मुक्ताईनगरच्या सूनबाई आहेत.  मुक्ताईनगरमध्ये आता विकासाचा रथ धावणार आहे, असे त्यांनी म्हटले. 

शरद पवार गटाचे कार्यकर्ते पेढे भरवताय हा आनंद

ते पुढे म्हणाले की, स्थानिक शेतकऱ्यांचे प्रश्न आता मार्गी लागतील, असा आम्हाला विश्वास आहे. केंद्रात आमचे सरकार आणि राज्यात पण आमचे सरकार आहे. राज्यात चार महिन्यांनी पुन्हा आमचेच सरकार येणार आहे. मोदींचे काम सर्वांना माहीत आहे. विकसित भारताचे स्वप्न पूर्ण होणार आहे.  स्थानिक राजकीय समीकरण बघता नाराजी होती, पण आम्ही मोदींसाठी काम केले. मुक्ताईनगरमध्ये आनंद आहे, असे त्यांनी म्हटले. शरद पवारांच्या राष्ट्रवादीचे कार्यकर्ते पेढे भरवताय हा आनंदाचा विषय आहे. एकनाथ खडसे शपथविधीला गेले आहेत. तो त्यांचा पारिवारिक संबंध आहे, असा निशाणा त्यांनी एकनाथ खडसे यांच्यावर साधला आहे. 

इतर महत्वाच्या बातम्या