Share Market:भारती एअरटेल आणि रिलायन्सचे गुंतवणूकदार मालामाल,बजाज फायनान्स अन् एलआयसीचं नुकसान, 5 दिवसात काय घडलं?

Share Market: भारतीय शेअर बाजारातील सेन्सेक्सवरील टॉप 10 कंपन्यांपैकी 8 कंपन्यांचं बाजारमूल्य गेल्या आठवड्यात वाढलं आहे. तर, दोन कंपन्यांचं बाजारमूल्य घटलं.

शेअर मार्केट अपडेट

भारतीय शेअर बाजारातील सेन्सेक्सवरील टॉप 10 कंपन्यांपैकी 8 कंपन्यांचं बाजारमूल्य वाढलं आहे. तर, दोन कंपन्यांचं बाजारमूल्य घटलं. आठ कंपन्यांचं बाजारमूल्य 2.05 लाख कोटी रुपयांनी वाढलं. भारती एअरटेल आणि रिलायन्स इंडस्ट्रीजच्या गुंतवणूकदारांना सर्वाधिक फायदा झाला.

बॉम्बे स्टॉक एक्सचेंजवर सेन्सेक्समध्ये 1.62 टक्क्यांची वाढ पाहायला मिळाली. तर, नॅशनल स्टॉक एक्सचेंजवरील निफ्टीमध्ये 1.64 टक्क्यांची वाढ या आठवड्यात पाहायला मिळाली.

भारती एअरटेलचं बाजारमूल्य सेन्सेक्सवरील टॉप 10 कंपन्यामध्ये सर्वाधिक वाढलं.एअरटेलचं बाजारमूल्य 55562.54 कोटी रुपयांनी वाढून 11,96,700.84 कोटी रुपयांवर पोहोचलं. तर, रिलायन्स इंडस्ट्रीजचं बाजारमूल्य 54941.84 कोटी रुपयांनी वाढून 20,55,379.61 कोटी रुपायंवर पोहोचलं.

टाटा कन्सलटन्सी सर्व्हिसेसचं बाजारमूल्य देखील मोठ्या प्रमाणात वाढलं. टीसीएसचं बाजारमूल्य 40757.75 कोटी रुपयांनी वाढून 11,23,416.17 कोटी रुपयांवर पोहोचलं आहे. आयसीआयसी बँकेचं बाजारमूल्य 20834.35 कोटी रुपयांनी वाढून 9,80,374.43 कोटी रुपयांवर पोहोचलं आहे.

स्टेट बँक ऑफ इंडियाचं बाजारमूल्य 10522.9 कोटी रुपयांनी वाढलं. तर इन्फोसिसचं बाजारमूल्य 10448.32 कोटी रुपयांनी वाढलं. एचडीएफसी बँकेचं बाजारमूल्य 9149.13 कोटी रुपयांनी वाढलं. हिंदुस्थान यूनीलिवरचं बाजारमूल्य 2878.25 रुपयांनी वाढलं आहे.

10 नोव्हेंबर ते 14 नोव्हेंबर या कालावधीमध्ये बजाज फायनान्सचं बाजारमूल्य 30717.94 कोटी रुपयांनी घसरलं. तर, एलआयसीचं बाजारमूल्य 9266.12 कोटी रुपयांनी घसरलं. बाजार जाणकारांच्या मते रिझर्व्ह बँकेच्या पतधोरणाकडे आणि यूएस फेडरलच्या व्याज दर कपातीच्या निर्णयाकडे लक्ष लागलं आहे.

बाजारमूल्यानुसार रिलायन्स इंडस्ट्रीज, एचडीएफसी बँक, भारती एअरटेल, टीसीएस, आयसीआयसीआय बँक, स्टेट बँक ऑफ इंडिया, बजाज फायनान्स, इन्फोसिस, एलआयसी आणि हिंदूस्थान यूनीलिवर असा क्रम आहे.

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)