Jalgaon News : जळगाव दूध संघात एक रुपयाचाही गैरव्यवहार नाही, बदनाम करण्याचं कटकारस्थान : एकनाथ खडसे
Jalgaon News : जळगाव जिल्हा दूध संघात एक रुपयाचाही गैरव्यवहार केला नाही. केवळ मला आणि संचालक मंडळाला बदनाम करण्याचं हे कटकारस्थान आहे, असं एकनाथ खडसे म्हणाले.
Jalgoan News : "जळगाव जिल्हा दूध संघाला बदनाम करण्याचा प्रयत्न सुरु असून संचालक मंडळाला अडचणीत आणण्यासाठी हेतपुरस्सर हे उद्योग सुरु आहे," असं म्हणत राष्ट्रवादी काँग्रेसचे ज्येष्ठ नेते एकनाथ खडसे (Eknath Khadse) यांनी नाव न घेता भाजपवर निशाणा साधला. शिंदे सरकारच्या माध्यमातून तसंच प्रशासन मंडळाच्या सहाय्याने जळगाव जिल्हा सहकारी दूध उत्पादक संघाला (Jalgaon Jilha Sahakari Dudh Utpadak Sangh Maryadit) बदनाम करण्याचा प्रयत्न केला जात असल्याचा आरोपही एकनाथ खडसेंनी केला आहे. जिल्ह्यातील दूध उत्पादकांनी दूध संघाचा कारभार पाहिला आहे. तो जास्तीत जास्त पारदर्शी पद्धतीने करण्याचा प्रयत्न संचालक मंडळाने केला असून कारभारावर माझं स्वत:चं लक्ष होतं, असंही यावेळी एकनाथ खडसे यांनी सांगितलं.
जिल्हा दूध संघाच्या कारभारात अध्यक्षा मंदाकिनी खडसे आणि त्यांच्या संचालक मंडळाने गैरव्यवहार केल्याची तक्रार दूध संघाचे माजी कर्मचाऱ्याने शासनाकडे केली होती. त्या तक्रारीवरुन शिंदे सरकारकडून संचालक मंडळ बरखास्त करुन चौकशी समिती नियुक्त करण्यात आली होती. दरम्यान चौकशीत दहा कोटी रुपयांचा निधी शासनाची कुठलीही परवानगी न घेता संचालक मंडळांनी परस्पर खर्च केल्याचा धक्कादायक प्रकार उघड झाला. अनियमिततेचं कारण देत संचालक मंडळाविरुद्ध कारवाई करण्याचे निर्देश शासनाचे उपसचिव नि.भा. मराळे यांनी विभागीय सहनिबंधकांना दिले आहेत. याबाबत एकनाथ खडसे यांनी हा खुलासा केला आहे
'जिल्हा दूध संघात एक रुपयाचाही गैरव्यवहार नाही'
"यापूर्वीही विरोधकांनी जिल्हा बँकेत खोदून खोदून पाहिलं, मात्र याठिकाणी भ्रष्टाचार आढळून आला नाही, असंही यावेळी एकनाथ खडसे म्हणाले. जिल्हा दूध संघात एक रुपयाचाही गैरव्यवहार नाही, तुम्हाला शोधायच ते शोधा, जे खोदायचं असेल ते खोदा मात्र काहीही सापडणार नाही, तुम्ही स्वत: तुमच्या तोंडावर आपटाल, शोधा किती शोधायचे ते, बदनाम करा किती करायचे ते," या शब्दात एकनाथ खडसेंनी विरोधकांना इशारा दिला आहे.
एकनाथ शिंदे यांचा प्रशासक मंडळावर निशाणा
जिल्हा दूध संघावर नियुक्त करण्यात आलेल्या प्रशासक मंडळावरही एकनाथ खडसेंनी निशाणा साधला आहे. प्रशासक मंडळातील सदस्यांपैकी निम्मे सदस्य यांचा डेअरीचे सदस्य, दूधाशी काही संबंध नाही, मात्र निव्वळ मला आणि माझ्या संचालक मंडळाला बदनाम करण्याचं कटकारस्थान याठिकाणी चाललं आहे, असा आरोपही एकनाथ खडसे यांनी केला. कुणीही यावं, तपासणी करावी, दोषी असेल तर शासन शिक्षा करेल, असं आव्हान सुद्धा यावेळी एकनाथ खडसेंनी विरोधकांना दिलं.
संबंधित बातम्या
महत्त्वाच्या बातम्या
