Jalgaon Crime : प्रेमविवाहाचा भयंकर अंत, सासरच्यांनी मुकेशला भरदिवसा गाठलं अन्...; पोलीस अधीक्षक नेमकं काय म्हणाले?
Jalgaon Crime News : जळगाव शहरातील हत्याकांडाने मोठी खळबळ उडाली आहे. आता याबाबत पोलीस अधीक्षकांनी महत्त्वाची माहिती दिली आहे.
Jalgaon Crime News : जळगावात सैराट चित्रपटातील कथानकाची पुनरावृत्ती घडली आहे. पाच वर्षांपूर्वीच्या केलेल्या प्रेमविवाहाचा राग मनात ठेवून सासरच्या लोकांनी भरदिवसा आपल्या जावयालाच कोयता आणि चॉपरने वार करत ठार केले. जळगाव शहरातील पिंप्राळा हुडको परिसरात रविवारी सकाळी ही घटना घडली. मुकेश रमेश शिरसाठ (30) असे मृत तरुणाचे नाव आहे. या घटनेत 7 जण गंभीर जखमी झाले आहेत. या प्रकरणी जळगावचे पोलीस अधीक्षक डॉ. महेश्वर रेड्डी (Dr Maheshwar Reddy) यांनी महत्त्वाची माहिती दिली आहे.
जळगावचे पोलीस अधीक्षक डॉ. महेश्वर रेड्डी म्हणाले की, मुकेश शिरसाठ नावाच्या मुलाने पूजा नावाच्या मुलीचे पाच वर्षांपूर्वी पळून जाऊन प्रेमविवाह केला होता. ही बाब मुलीच्या घरच्यांना खटकत होती. तेव्हापासून अधून-मधून त्यांचे वाद सुरू होते. काल सकाळी मुकेशच्या घरचे आणि त्यांच्या सासरचे यांच्यामध्ये भांडण झाले. सासरच्या लोकांनी कोयत्याने मुकेशच्या मानेवर वार केले. त्याला हॉस्पिटलमध्ये नेले असता त्याला तपासून मृत घोषित करण्यात आले आहे.
सात आरोपींना अटक, तीन आरोपींचा शोध सुरु
याप्रकरणी पोलिसांनी रामानंद पोलीस ठाण्यात गुन्हा दाखल करण्यात आला आहे. आतापर्यंत सात आरोपींना अटक करण्यात आलेली आहे. सतीश केदार, सुरेश बनसोडे, विशाल गांगले, बबलू बनसोडे, प्रकाश सोनवणे, अविनाश सुरवडे आणि एका अल्पवयीन मुलाला ताब्यात घेण्यात आल्याची माहिती पोलिसांनी दिली आहे. तसेच आणखी तीन आरोपींचा आम्ही शोध घेत आहोत. खुनातील आरोपींना पकडण्यासाठी आम्ही वेगवेगळ्या टीम तयार केलेल्या आहेत. एकूण दहा जणांवर गुन्हा दाखल करण्यात आल्याची माहिती पोलीस अधीक्षकांनी दिली आहे.
पोलिसांचा मोठा बंदोबस्त तैनात
दरम्यान, या हत्याकांडाने जळगाव सुन्न झाले असून परिसरात प्रचंड तणाव आहे. डोळ्यांदेखत झालेल्या मुकेशच्या हत्येनंतर रुग्णालयाबाहेर मुकेश कुटुंबीयांनी मोठी गर्दी केल्याचे दिसून आले. या घटनेने संपूर्ण गाव हादरले आहे. मुकेशच्या कुटुंबीयांनी टाहो फोडलाय. या घटनेच्या तीव्रतेने परिसरात तणाव निर्माण झाला असून पिंप्राळा हुडको परिसरात पोलिसांचा मोठा बंदोबस्त तैनात करण्यात आला आहे.
इतर महत्त्वाच्या बातम्या
महत्त्वाच्या बातम्या
ट्रेंडिंग न्यूज
