Gulabrao Patil : '...तर बारामतीप्रमाणेच रावेरलाही नणंद-भावजय सामना रंगणार'; गुलाबराव पाटलांचे वक्तव्य चर्चेत

Raver Lok Sabha : जळगाव जिल्ह्यातील रावेर मतदारसंघातून भाजपने रक्षा खडसे यांना भाजपकडून उमेदवारी जाहीर केली. यावरून मंत्री गुलाबराव पाटील यांनी भाष्य केले आहे.

Raksha Khadse, Gulabrao Patil and Rohini Khadse

Source : Facebook / Raksha Khadse, Gulabrao Patil and Rohini Khadse

Gulabrao Patil : आगामी लोकसभेच्या पार्श्वभूमीवर (Lok Sabha Elections 2024) भाजपकडून (BJP) काल उमेदवारांची दुसरी यादी जाहीर करण्यात आली. यात महाराष्ट्रातील 20 उमेदवारांची नावे घोषित करण्यात आली. जळगाव जिल्ह्यातील रावेर मतदारसंघातून भाजपने रक्षा खडसे (Raksha Khadse) यांना भाजपकडून उमेदवारी जाहीर केली. यावर मंत्री गुलाबराव पाटील (Gulabrao Patil) यांनी आपली प्रतिक्रिया दिली आहे. 

रक्षा खडसे यांना उमेदवारी घोषित होताच राष्ट्रवादी काँग्रेस शरदचंद्र पवार (Sharad Pawar) पक्षाकडून त्यांच्या समोर सासरे एकनाथ खडसे (Eknath Khadse) यांना उमेदवारी देण्याची तयारी करण्यात आली. या पार्श्वभूमीवर काल बैठक आयोजित करण्यात आली होती. परंतु एकनाथ खडसे यांनी तब्येत ठीक नसल्याचे म्हटले. डॉक्टरांनी परवानगी दिली तर निवडणूक लढवणार असेही त्यांनी सांगितले आहे. त्यामुळे एकनाथ खडसे यांची कन्या आणि रक्षा खडसे यांच्या भावजय रोहिणी खडसे (Rohini Khadse) यांना उमदेवारी देण्यात यावी, अशी मागणी बैठकीत झाली होती. त्यामुळे आता शरद पवार गटाकडून नक्की कोणाला उमेदवारी मिळणार, याकडे सर्वांचे लक्ष लागले आहे. 

रोहिणी खडसे यांना उमेदवारी मिळाली तर नणंद-भावजय लढत

यावर गुलाबराव पाटील म्हणाले की, भाजपाने त्यांची उमेदवारांची यादी जाहीर केली आहे. महायुती म्हणून ते जे उमेदवार देतील त्याचा आम्ही प्रचार करणार आहोत. रावेर मतदारसंघात एकनाथ खडसे किंवा रोहिणी खडसे यांच्या नावाच्या चर्चा आहेत. रोहिणी खडसे यांना उमेदवारी मिळाली तर बारामतीप्रमाणे रावेरमध्येही नणंद-भावजय असा सामना पाहायला मिळू शकणार असल्याचे मंत्री गुलाबराव पाटील यांनी म्हटले आहे. जळगाव जिल्ह्यातील बामाभोरी गावात विविध विकास कामांच्या शुभारंभाप्रसंगी ते बोलत होते. 

...तर जयंत पाटील नक्कीच मंत्री राहिले असते

जयंत पाटील हे महायुतीत आले असते तर ते नक्कीच मंत्री राहिले असते. आता त्यांच्या लक्षात आले असेल की, आपण चूक केली आहे, असा टोला गुलाबराव पाटलांनी जयंत पाटलांना लगावला. मनसे, शिवसेना आणि भाजप एकाच विचार धारेचे पक्ष आहेत. त्यामुळे बैठकीत चर्चा झाली असेल तर ते लवकरच बाहेर येईल, असेही त्यांनी म्हटले आहे. 

इतर महत्वाच्या बातम्या