Yamuna Expressway Accident: यमुना एक्स्प्रेस वेवर भीषण अपघात, 13 जणांचा दुर्दैवी अंत; दाट धुक्यांमुळे 11 वाहने एकमेकांना धडकले, नेमकं काय घडलं?
Yamuna Expressway Accident: उत्तर प्रदेशातील मथुरा येथे यमुना एक्स्प्रेस वे वर झालेल्या भीषण अपघातात 13 जणांचा मृत्यू झालाय.
Yamuna Expressway Accident: उत्तर प्रदेशातील मथुरा (Mathura) येथे आज पहाटे यमुना एक्स्प्रेस वे वर झालेल्या भीषण अपघातात (Yamuna Expressway Accident) 13 जणांचा मृत्यू झाला असून 25 हून अधिक प्रवासी जखमी झाले आहेत. दाट धुक्यामुळे हा अपघात झाल्याची प्राथमिक माहिती असून, आग्रा ते नोएडा दिशेने जाणाऱ्या 8 बस आणि 3 कार एकमेकांवर आदळल्या. धडक इतकी जोरदार होती की, काही वाहनांना भीषण आग लागली.
हा अपघात आग्रा–नोएडा मार्गावर बलदेव पोलीस ठाण्याच्या हद्दीतील खडेहरा गावाजवळ, माईलस्टोन क्रमांक 127 जवळ घडला. घटनेची माहिती मिळताच अग्निशमन दल, पोलीस आणि प्रशासनाचे पथक तात्काळ घटनास्थळी दाखल झाले. बचावकार्य युद्धपातळीवर राबवण्यात आले. अपघातात जखमी झालेल्या 25 प्रवाशांना रुग्णवाहिकांद्वारे जवळच्या रुग्णालयात दाखल करण्यात आले आहे. मृतांचे मृतदेह शवविच्छेदनासाठी पाठवण्यात आले असून, बसमधील उर्वरित प्रवाशांना त्यांच्या ठिकाणी पोहोचवण्यासाठी प्रशासनाकडून पर्यायी वाहनांची व्यवस्था करण्यात आली आहे.
Yamuna Expressway Accident: प्रत्यक्षदर्शींचा थरारक अनुभव
प्रत्यक्षदर्शींनी सांगितले की, दाट धुक्यामुळे काहीच दिसत नव्हते. एकामागून एक वाहनांची धडक झाली आणि काही क्षणांतच वाहनांना आग लागली. अनेक प्रवासी वाहनांमध्येच अडकले, तर काहींनी प्रसंगावधान राखत बसमधून उडी मारून आपला जीव वाचवला. मात्र आत अडकलेल्या काही प्रवाशांचा आगीत होरपळून मृत्यू झाला. अपघातातून बचावलेल्या कानपूर येथील सौरभ या प्रवाशाने सांगितले की, “धुके इतके दाट होते की समोरचं काहीच दिसत नव्हतं. अचानक मोठा आवाज झाला आणि बस एकमेकांवर आदळल्या. त्यानंतर काही वेळातच आग लागली.”
Yamuna Expressway Accident: प्रशासनाची माहिती
मथुरा येथील जिल्हाधिकारी चंद्रप्रकाश सिंह यांनी या अपघातात 13 जणांचा मृत्यू झाल्याची अधिकृत पुष्टी केली आहे. त्यांनी सांगितले की, बस आणि कारच्या धडकेत आग लागून मोठी जीवितहानी झाली. मुख्यमंत्री यांनी या घटनेची दखल घेत जखमींवर तातडीने योग्य उपचार करण्याचे निर्देश दिले आहेत. तसेच मृतांच्या नातेवाइकांना प्रत्येकी 2 लाख रुपयांची आर्थिक मदत देण्याचे आदेश देण्यात आले आहेत. या भीषण अपघातामुळे यमुना एक्स्प्रेस वे वर काही काळ वाहतूक विस्कळीत झाली होती. मात्र, बचावकार्य पूर्ण झाल्यानंतर हळूहळू वाहतूक पूर्ववत करण्यात येत आहे.
आणखी वाचा
महत्त्वाच्या बातम्या
