Vice President Election 2022 : उपराष्ट्रपतीपदासाठी अल्वा विरुद्ध धनकड; उमेदवारी अर्ज दाखल करण्याचा आज शेवटचा दिवस

Vice President Candidate : यूपीएच्या उपाध्यक्षपदाच्या उमेदवार मार्गारेट अल्वा आज आपला उमेदवारी अर्ज दाखल करणार आहेत. दुसरीकडे एनडीएचे उमेदवार जगदीप धनखर यांनी सोमवारी अर्ज दाखल केला.

Vice President Candidate | Vice President Election 2022

Vice President Candidate : भारताच्या नव्या उपराष्ट्रपती पदाच्या (Vice President) निवडणुकीसाठी उमेदवारी अर्ज भरण्याचा आज शेवटचा दिवस आहे. विरोधी पक्षांनी उपाध्यक्षपदाच्या निवडणुकीसाठी काँग्रेसच्या ज्येष्ठ नेत्या मार्गारेट अल्वा यांना संयुक्त उमेदवार म्हणून निवडणुकीच्या रिंगणात उतरवलं आहे. मार्गारेट अल्वा (Margaret Alva) आज दुपारी 12 वाजता उमेदवारी अर्ज दाखल करणार आहेत. याआधी सोमवारी एनडीएचे (NDA) उमेदवार जगदीप धनकड (Jagdeep Dhankhad) यांनी अर्ज दाखल केला. धनकड यांनी पंतप्रधान नरेंद्र मोदी (PM Modi), संरक्षण मंत्री राजनाथ सिंह, केंद्रीय गृहमंत्री अमित शाह आणि भाजप अध्यक्ष जेपी नड्डा यांच्यासह पक्षाच्या वरिष्ठ नेत्यांच्या उपस्थितीत उमेदवारी अर्ज दाखल केला.

उपराष्ट्रपतीपदासाठी एनडीए आणि यूपीएकडून उमेदवार जाहीर करण्यात आले आहेत. एनडीएपाठोपाठ काल (सोमवारी) यूपीएनंही उमेदवाराच्या नावाची घोणा केली. मार्गारेट अल्वा यांना यूपीएकडून उमेदवारी देण्यात आली. दिल्लीत शरद पवार यांच्या घरी पार पडलेल्या बैठकीत अल्वा यांच्या नावावर शिक्कामोर्तब करण्यात आला. तत्पूर्वी भाजपप्रणित एनडीएकडून काल जगदीप धनकड यांना उमेदवारी जाहीर करण्यात आली. 6 ऑगस्टला उपराष्ट्रपतीपदासाठी निवडणूक होणार आहे. उपराष्ट्रपती व्यंकय्या नायडू यांचा कार्यकाळ 10 ऑगस्टला संपणार आहे. 

लोकसभा आणि राज्यसभेत भाजप बहुमतात असल्यानं उपराष्ट्रपती आणि राज्यसभेच्या अध्यक्षपदी धनकड यांची निवड जवळपास निश्चित मानली जात आहे. संसदेच्या सध्याच्या 780 सदस्यांपैकी एकट्या भाजपकडे 394 सदस्य आहेत आणि ही संख्या 390 च्या बहुमतापेक्षाही जास्त आहे. विद्यमान उपराष्ट्रपती व्यंकय्या नायडू यांचा कार्यकाळ 10 ऑगस्ट रोजी संपणार असून नवे उपराष्ट्रपती 11 ऑगस्ट रोजी पदभार स्वीकारतील. उपराष्ट्रपतीपदासाठी 6 ऑगस्ट रोजी मतदान होणार असून त्याच दिवशी मतमोजणी होणार आहे. 

'काँग्रेस पक्षाला चोर घोषित केलेलं नाही'

दुसरीकडे, विरोधी उमेदवार मार्गारेट अल्वा यांनी सोमवारी सांगितलं की, मी एनडीएचा प्रचार करणार आहे. मी कोणाला घाबरणार नाही. दुसरीकडे, भाजपचे खासदार निशिकांत दुबे यांनी एक बातमी ट्वीट करून म्हटलं आहे की, विरोधी पक्षाच्या उपराष्ट्रपतीपदाच्या उमेदवार मार्गारेट अल्वा यांनी त्यांच्या पुस्तकात काँग्रेस पक्ष आणि त्यांच्या अध्यक्षा सोनिया गांधी यांच्या चोरीपासून कटापर्यंतची कहाणी लिहिली आहे. त्याचं समर्थन करून, कुठेतरी विरोधकांनी काँग्रेस पक्षाला चोर घोषित तर केलं नाही ना?

मार्गारेट अल्वा उत्तम उमेदवार : मल्लिकार्जुन खर्गे

काँग्रेस (Congress) नेते मल्लिकार्जुन खर्गे (Mallikarjun Khadge) यांनी उपराष्ट्रपतीपदाच्या उमेदवार (Candidate) मार्गारेट अल्वा (Margaret Alva) यांच्याबाबत बोलताना मार्गारेट अल्वा या उत्तम उमेदवार असल्याचं म्हटलं आहे. 1974 पासून त्या सातत्यानं राजकारणात आहेत. त्या 5 वेळा खासदार, 4 राज्यांच्या राज्यपाल, केंद्रात मंत्री राहिल्या आहेत. मग यापेक्षा चांगले काय असेल? अल्वा यांना 18 पक्ष मिळून पाठिंबा देतील, असंही ते म्हणाले.