महाकुंभमध्ये चेंगराचेंगरी अन् अग्नितांडवाचा कलंक सुरुच; 28 दिवसांत चौथ्यांदा आगीचे रौद्ररुप, तंबू जळाले, नोटांच्या दोन बॅगा जळून खाक

दिल्लीत चेंगरीचेंगरी होण्यापूर्वी प्रयागराजमध्ये महाकुंभमेळ्याच्या सेक्टर 18 आणि 19 दरम्यान शनिवारी संध्याकाळी 6 वाजता भीषण आग लागली. श्री राम चरित मानस सेवा प्रचार मंडळाच्या शिबिराचे तंबू जळाले

stampede and fire riots continues at Mahakumbh

Source : PTI

नवी दिल्ली : महाकुंभमध्ये भीषण आगीचा आणि चेंगराचेंगरीचा कलंक सुरुच असून काल (15 फेब्रुवारी) नवी दिल्ली रेल्वे स्थानकावर शनिवारी रात्री साडे नऊच्या सुमारास झालेल्या चेंगराचेंगरीत 17 जणांचा मृत्यू झाला, त्यात 3 मुलांचा समावेश आहे. तर 10 हून अधिक जण जखमी झाले आहेत. एएनआयने दिलेल्या माहितीनुसार, ट्रेनचा प्लॅटफॉर्म बदलण्याच्या घोषणेनंतर प्रचंड गर्दीत चेंगराचेंगरी झाली. ट्रेन प्लॅटफॉर्म 12 वरून 16 वर हलवण्यात आली. दरम्यान, प्लॅटफॉर्म 16 च्या दिशेने जाण्यासाठी लोक फूटओव्हरवरून धावू लागले आणि चेंगराचेंगरी झाली. त्याचवेळी, काही मीडिया रिपोर्ट्समध्ये प्लॅटफॉर्म क्रमांक 13 आणि 14 वर गर्दीमुळे हा अपघात झाल्याचे सांगण्यात आले. महाकुंभला जाणाऱ्या 2 गाड्या उशिरा आल्याचे सांगण्यात येत आहे. त्यामुळे गर्दी वाढली आणि चेंगराचेंगरी झाली.

दिल्लीचे नायब राज्यपाल व्हीके सक्सेना यांनी ट्विट करून या घटनेवर शोक व्यक्त केला. रेल्वेमंत्री अश्विनी वैष्णव यांनी या घटनेच्या चौकशीचे आदेश दिले आहेत. तथापि, यापूर्वी उत्तर रेल्वेच्या सीपीआरओ (मुख्य जनसंपर्क अधिकारी) यांनी चेंगराचेंगरी झाल्याचा इन्कार केला होता. कोणतीही चेंगराचेंगरी झाली नसून ती केवळ अफवा असल्याचे त्यांनी सांगितले होते. यापूर्वी 29 जानेवारी रोजी प्रयागराजमध्ये झालेल्या महाकुंभात 30 जणांचा मृत्यू झाला होता. 

महाकुंभमेळ्याच्या सेक्टर 18 आणि 19 दरम्यान भीषण आग 

दुसरीकडे, प्रयागराजमध्ये सुरू असलेल्या महाकुंभमेळ्याच्या सेक्टर 18 आणि 19 दरम्यान शनिवारी संध्याकाळी 6 वाजता भीषण आग लागली. श्री राम चरित मानस सेवा प्रचार मंडळाच्या शिबिराचे तंबू जळाले. माहिती मिळताच अग्निशमन दलाच्या अनेक गाड्या घटनास्थळी दाखल झाल्या. अर्ध्या तासात आग आटोक्यात आणण्यात आली. सध्या या घटनेत कोणतीही जीवितहानी झाल्याची माहिती नाही. आगीचे कारण अद्याप समजू शकलेले नाही. जत्रेत प्रचंड गर्दी असल्याने अग्निशमन दलाच्या गाड्यांना घटनास्थळी पोहोचण्यास उशीर झाला.

नोटांच्या पिशव्याही जळाल्या

श्री राम चरित मानस सेवा प्रचार मंडळाच्या शिबिरात आग लागल्याचे प्रत्यक्षदर्शींनी सांगितले. सगळे इथून निघून गेले होते. खुर्च्या, तंबू आणि खाद्यपदार्थ जळून खाक झाले. कॅम्पमध्ये नोटांच्या तीन पिशव्या ठेवण्यात आल्या होत्या, एक बॅग सुरक्षित ठेवण्यात आल्याचे सांगण्यात येत आहे. दोन बॅगा जळाल्याची शक्यता आहे.

28 दिवसांत आगीची ही चौथी घटना 

• 19 जानेवारी : सेक्टर 19 येथील गीता प्रेसच्या कॅम्पला भीषण आग, दुर्घटनेत 180 कॉटेज जळून खाक झाल्या.
• 30 जानेवारी : सेक्टर 22 मध्ये आग लागली असून 15 तंबू जळून खाक झाले आहेत.
• 7 फेब्रुवारी : सेक्टर-18 मध्ये आग लागली. शंकराचार्य मार्गावर ही दुर्घटना घडली, ज्यात 22 पंडाल जळून खाक झाले.

इतर महत्वाच्या बातम्या