जगप्रसिद्ध मादाम तुसामध्ये आता आशा भोसलेंचा मेणाचा पुतळा

मुंबई : जगप्रसिद्ध मादाम तुसाच्या दिल्लीतील संग्रहालयात आता प्रसिद्ध पार्श्वगायिका आशा भोसले यांचा मेणाचा पुतळा बसवण्यात येणार आहे. गेली सहा दशकं भारतीय संगीत रसिकांना आपल्या सुरेल आवाजानं 83 वर्षीय आशा भोसले यांनी मंत्रमुग्ध केलं आहे. आता प्रसिद्ध मादाम तुसामध्ये आशा भोसलेंचा मेणाचा पुतळा त्यांचा मोठा गौरव असेल. आशा भोसले यांचा मेणाचा पुर्णाकृती पुतळा मादाम तुसामध्ये बॉलिवूड म्युझिक झोनमध्ये लावण्यात येईल. कोणत्याही भारतीय गायिकेला आजपर्यंत हा सन्मान मिळालेला नाही, त्यामुळे आशा भोसले पहिल्याच गायिका ठरणार आहे. आशा भोसले यांना दादासाहेब फाळके पुरस्कारानं गौरवण्यात आलं आहे. "मादाम तुसामध्ये माझा मेणाचा पुतळा उभारणे माझ्यासाठी मोठी आनंदाची आणि अभिमानाची गोष्ट आहे. हा माझ्यासाठी आनंददायक अनुभव आहे. मी माझा मेणाचा पुतळा पाहण्यासाठी प्रचंड उत्सुक आहे." असं आशा भोसले यांनी सांगितलं. दिल्लीतील मादाम तुसा संग्रहालयाची देखभाल मलर्नि इंटरटेनमेंट ठेवणार आहे. या संग्रहालयात भारतातील खेळ, राजकारण, संगीत, इतिहास, संशोधन, आदी क्षेत्रातील 50 दिग्गजांचे पुतळे उभारण्यात येणार आहे.