Rahul Gandhi Defamation Case: राहुल गांधींना खासदारकी पुन्हा मिळणार? गुजरात उच्च न्यायालयामध्ये शुक्रवारी पार पडणार सुनावणी
Rahul Gandhi Defamation Case: मोदी आडनावाच्या लोकांवर टीका केल्याने राहुल गांधी यांच्यावर मानहानीच्या प्रकरणात सूरत न्यायालयाने राहुल गांधी यांना दोन वर्षांची शिक्षा सुनावली होती.
Rahul Gandhi Defamation Case: राहुल गांधी (Rahul Gandhi) यांनी मानहानीच्या प्रकरणात गुजरात उच्च न्यायालयामध्ये दाखल केलेल्या याचिकेवर शुक्रवारी (7 जुलै) रोजी सुनावणी पार पडणार आहे. त्यांनी सुरत कोर्टाने दोषी ठरवत 23 मार्च रोजी दोन वर्षांची शिक्षा सुनावली होती.
दोषी ठरवल्यानंतर राहुल गांधी यांची खासदारकी देखील रद्द करण्यात आली होती. त्यानंतर त्यांनी गुजरात उच्च न्यायालयामध्ये धाव घेतली होती. लोकसभेची खासदारकी रद्द केल्यानंतर राहुल गांधी यांनी केरळमधील वायनाड येथील एका सभेमध्ये म्हटलं होतं की, 'केंद्र सरकार माझा आवाज दाबण्याचा प्रयत्न करत आहेत, पण मी त्यांना घाबरणार नाही.'
काँग्रेस आणि भाजपची काय प्रतिक्रिया?
राहुल गांधी यांच्याकडून अभिषेक मनु सिंघवी यांनी सुनावणीदरम्यान गुजरात उच्च न्यायालयामध्ये म्हटलं होतं की, 'अनेक लोकं गुजरातमध्ये मोदी हे आडनाव लावतात. त्यामुळे राहुल गांधी यांच्या विधानाला सर्वांसोबत जोडता नाही येणार. याचिकाकर्त्यांनी म्हटलं आहे की देशातील 13 कोटी लोकांची बदनामी झाली आहे.'
तर भाजपचे राष्ट्रीय अध्यक्ष जे पी नड्डा यांच्यासह पक्षातील इतर नेत्यांनी दावा केला होती की, 'राहुल गांधी यांनी इतर मागासवर्गीयांचा देखील अपमान केला आहे. त्यामुळे त्यांनी ओबीसी समाजाची माफी मागितली पाहिजे.'
राहुल गांधींनी काय म्हटले?
राहुल गांधी यांनी 2019 मधील लोकसभा निवडणुकांच्या प्रचारादरम्यान कर्नाटकात आपल्या भाषणात म्हटलं होतं की, 'सगळ्या चोरांचं आडनाव मोदी का आहे?' यावरुन भाजपचे नेते पूर्नेश मोदी यांनी सूरत कोर्टात त्यांच्या विरोधात मानहानीची तक्रार दाखल केली होती. त्यांनी म्हटलं होतं की, 'राहुल गांधींनी असं म्हणत मोदी आडनाव असलेल्या लोकांची बदनामी केली आहे.'
भारतीय दंड संहिता कलम 499 आणि 500 अंतर्गत राहुल गांधींना दोषी ठरवणाऱ्या मुख्य न्यायदंडाधिकारी एचएच वर्मा यांच्या न्यायालयानेही त्यांना जामीन मंजूर केला आणि उच्च न्यायालयात अपील करण्याची मुभा देण्यासाठी 30 दिवसांची शिक्षा स्थगित केली होती.
भाजपचे आमदार आणि गुजरातचे माजी मंत्री पूर्नेश मोदी यांनी राहुल गांधींविरोधात तक्रार दाखल केली होती. पूर्नेश मोदी हे भूपेंद्र पटेल सरकारच्या पहिल्या कार्यकाळात मंत्री होते आणि सुरत पश्चिम विधानसभेचे आमदार आहेत. राहुल गांधी यांना शिक्षा मिळणार की दिलासा मिळणार यासाठी या सुनावणीमध्ये निर्णय देण्यात येणार आहे. त्यामुळे राहुल गांधी यांच्यावरील या सुनावणीमध्ये नक्की काय होणार हे पाहणं महत्त्वाचं ठरणार आहे.
हे ही वाचा :
महत्त्वाच्या बातम्या
ट्रेंडिंग न्यूज
