Lalu Yadav News : लालू प्रसाद यादव यांची प्रकृती गंभीर, पुढील उपचारासाठी एअर अॅम्ब्युलन्सनं दिल्लीला हलवणार

Lalu Yadav Health Updates : राष्ट्रीय जनता दलाचे (RJD) अध्यक्ष आणि बिहारचे माजी मुख्यमंत्री लालू प्रसाद यादव यांची प्रकृती गंभीर. पुढील उपचारासाठी त्यांना एअर अॅम्ब्युलन्सनं दिल्लीला हलवण्यात येणार आहे.

Lalu Prasad Yadav Health Updates

Lalu Yadav Health Updates : आरजेडी नेते लालू प्रसाद यादव (Lalu Prasad Yadav) यांची प्रकृती गंभीर असून त्यांना रुग्णालयात दाखल करण्यात आलं आहे. आज संध्याकाळी 4 वाजून 30 मिनिटांनी एअर अॅम्ब्युलन्सनं त्यांना दिल्लीला नेण्यात येणार आहे. त्यापूर्वी लालू प्रसाद यादव यांचे पुत्र आणि विरोधी पक्षनेते तेजस्वी यादव आज दिल्लीत जाऊन संपूर्ण व्यवस्था पाहणार आहे. लालू यादव सध्या पाटण्यातील पारस रुग्णालयात दाखल असून त्यांच्यावर आयसीयूमध्ये उपचार सुरु आहे. पाटण्यातील डॉक्टरांनी दिलेल्या माहितीनुसार, लालू यादव यांची प्रकृती स्थिर आहे. पुढील उपचारासाठी त्यांना दिल्लीला आणलं जाणार आहे. दरम्यान, लालू प्रसाद यादव यांच्या प्रकृतीबाबत पंतप्रधान मोदी, गांधी परिवार आणि मुख्यमंत्री नितीश कुमार यांच्यासह इतरही अनेक नेत्यांनी तेजस्वी यादव यांच्याकडे विचारपूस केली. 

बिहारचे माजी मुख्यमंत्री आणि आरजेडी अध्यक्ष लालू यादव यांच्या प्रकृती स्वास्थासाठी जनतेकडून प्रार्थना केली जात आहे. त्यांना भेटण्यासाठी अनेक नेते आणि कार्यकर्ते पारस रुग्णालयात पोहोचले आहेत. याबाबत तेजस्वी यादव यांनी एक व्हिडीओ जारी केला आहे. या व्हिडीओमधून तेजस्वी यादव यांनी लोकांना आवाहन केलं आहे. ते म्हणाले आहेत की, "लालू प्रसाद यादव यांच्यावर पाटणा येथील पारस रुग्णालयात उपचार सुरु आहेत. त्यांची प्रकृती स्थिर आहे. कृपया त्यांना भेटण्यासाठी रुग्णालयात गर्दी करु नका. त्यामुळे रुग्णालयातील इतर रुग्णांना खूप त्रास होतो आणि संसर्गाचा धोका वाढतो."

दरम्यान, चारा घोटाळा प्रकरणी दोषी ठरलेले बिहारचे माजी मुख्यमंत्री लालू प्रसाद यादव सध्या जामिनावर तुरुंगाबाहेर आहेत. लालू प्रसाद यादव काही दिवसांपूर्वी शिडीवरुन पडल्यामुळे जखमी झाले होते. बिहारची राजधानी पाटणा येथील राबरी निवासस्थानी शिडीवरून खाली उतरत असताना त्यांचा तोल गेला आणि ते पडले. त्यांना तातडीनं जवळच्या रुग्णालयात उपचारासाठी दाखल करण्यात आलं. लालूंच्या खांद्यावर आणि कमरेलाही गंभीर दुखापत झाल्याची माहिती डॉक्टरांनी दिली होती. प्राथमिक तपासणीनंतर डॉक्टरांनी काळजी करण्यासारखं काहीही नसल्याचं सांगितलं होतं. उजव्या खांद्याला किरकोळ फ्रॅक्चर झाल्याचं सांगण्यात आलं होतं. त्यानंतर ते घरीच विश्रांती घेत होते. पण काही दिवसांनी त्यांना त्रास होऊ लागला. त्यानंतर त्यांना पाटणातील रुग्णालयात दाखल करण्यात आलं.