Gold Silver Price | सोन्याचा भाव 1000 रुपयांनी वधारला तर चांदीच्या भावात 700 रुपयांची घसरण
मुंबईत 22 कॅरेटच्या सोन्याचा (Gold ) भावात एक हजारांची वाढ होऊन तो 44,020 रुपये इतका झाला आहे तर 24 कॅरेट सोन्याचा भाव हा 45,020 इतका आहे. चांदीच्या (Silver)दरात 700 रुपयांची घसरण झाली आहे.
मुंबई : गेल्या काही दिवसात सोन्याच्या किंमतीत घसरण झाल्याचं दिसत असताना बुधवारी संध्याकाळी बाजार बंद होत असताना सोन्याच्या भावाने उचल खाल्ली आहे. बुधवारी संध्याकाळी सोन्याच्या भावात एक हजारांची वाढ झाल्याचं पहायला मिळतंय. मुंबईत 22 कॅरेटच्या सोन्याचा भावात एक हजारांची वाढ होऊन तो 44,020 रुपये इतका झाला आहे तर 24 कॅरेट सोन्याचा भाव हा 45,020 इतका आहे.
चांदीच्या दरात मात्र घसरण झाल्याचं पहायला मिळतंय. चांदीच्या दरात 700 रुपयांची घसरण झाली असून ती 66,000 वरून 65,300 रुपयांवर पोहोचली आहे. चेन्नई आणि हैदराबादमध्ये चांदीचा दर सर्वाधिक म्हणजे 69,700 इतका आहे. तर मुंबईत तो 65,300 इतका आहे.
मुंबईतील सोन्याच्या भावावर आंतरराष्ट्रीय दराचा जरी फरक पडत असला तरी काही स्थानिक गोष्टीही प्रभाव टाकतात. इंडियन बुलियन ज्वेलर्स असोसिएशनकडून मुंबईतील सोन्याचा दर ठरवला जातोय. त्यामध्ये स्थानिक आयात कर आणि MCX या कमोडिटी मार्केटचा विचार केला जातो. MCX हे देशातील सर्वात मोठे कमोडिटी मार्केट असून या ठिकाणी सोन्याचा भाव ठरवला जातो.
अनेकांसाठी सोन्यात गुंतवणूक करणं हा सुरक्षित आणि हमी देणारा असा गुंतवणुकीचा पर्याय. सोन्यामध्ये पैसे गुंतवण्याला प्राधान्य देणाऱ्यांची संख्या अधिक आहे. दरम्यान, मागील काही दिवसांपासून सोन्याच्या दरांत सातत्यानं होणारी घसरण पाहता गुंतवणुकदारांचा कल या पर्यायाकडे वाढला आहे. अलिकडच्या काळात सोन्याच्या दरात झालेली घसरण पाहता येत्या काळातही थोड्याफार प्रमाणात दर घटण्याचं हे सत्र असंच सुरु राहणार असल्याची माहिती तज्ज्ञांकडून मिळत आहे.
ऑगस्ट 2020 मध्ये सोन्याच्या दरांनी प्रती 10 ग्रामसाठी 56 हजार रुपयांचा विक्रमी आकडा गाठला होता. त्यानंतर सोन्याच्या भावामध्ये आता 11 हजारांची घसरण झाल्याची पहायला मिळतंय. त्यामुळे सोन्याची खरेदी करण्याकडे लोकांचा कल वाढताना दिसत आहे.
संबंधित बातम्या :
महत्त्वाच्या बातम्या
ट्रेंडिंग न्यूज
