Coronavirus | भारताचा प्रवास करू नका, अमेरिकेचे आपल्या नागरिकांना आवाहन

India Covid-19 Second Wave : भारतात कोरोनाच्या रुग्णसंख्येत मोठ्या प्रमाणावर वाढ होत आहे, अशा वेळी भारताचा प्रवास करू नये असं आवाहन अमेरिकेने आपल्या देशातील नागरिकांना केलं आहे. 

travellers_airport

वॉशिंग्टन : भारतात कोरोनाची दुसरी लाट हाहाकार माजवत असताना जगभरातील देश सावध झाले आहेत. भारतातील परिस्थिती चिंताजनक आहे, त्यामुळे त्या देशाचा प्रवास करु नये असं आवाहन अमेरिकेने आपल्या नागरिकांना केलं आहे. गेल्या 24 तासात देशात कोरोनाच्या तब्बल 2.73 लाख नवीन रुग्णांची भर पडली आहे. त्या पार्श्वभूमीवर अमेरिकेने आपल्या नागरिकांना वरील आवाहन केलं आहे.

भारतातील कोरोनाचे संक्रमण दिवसेंदिवस वाढतचं चाललं आहे. त्यामुळे त्या देशातील परिस्थिती अत्यंत चिंताजनक बनली आहे. अशा काळात भारतात जाऊ नये असं आवाहन अमेरिकनेन त्याच्या नागरिकांना केलं आहे. 

ब्रिटनने भारताला 'रेड लिस्ट' मध्ये टाकलं
भारतातील कोरोनाचं संकट पाहता ब्रिटनकडून भारताची नोंद रेड लिस्टमध्ये करण्यात आली आहे. सदर यादीत नोंद झाल्यामुळं आता भारतीय आणि आयरिश नागरिकांना भारतातून ब्रिटनमध्ये जाण्यावर निर्बंध असतील. यासोबतच परदेशातून परतलेल्या ब्रिटनच्या नागरिकांनाही इथं एका हॉटेलमध्ये 10 दिवसांसाठी विलगीकरणात रहावं लागणार आहे. भारतात आढळलेल्या संसर्गाच्या प्रकारचे 103 रुग्ण आढळून आले आहेत. यापैकी अधिक रुग्ण हे परदेशातून परतलेले आहेत. समोर आलेल्या रुग्णसंख्येच्या विश्लेषणानंतरच भारताचं नाव रेड लिस्टमध्ये समाविष्ट करण्याचा मोठा निर्णय घेण्यात आला. त्यामुळं आता भारतीयांच्या ब्रिटन प्रवेशावर निर्बंध आले आहेत. दरम्यान, सदर निर्णयाच्या काही तासांपूर्वीच ब्रिटनचे पंतप्रधान बोरिस जॉन्सन यांचा पुढील आठवड्यातील नियोजित भारत दौराही रद्द करण्यात आल्याची घोषणा केली. 

आरोग्य मंत्रालयाच्या आकडेवारीनुसार, गेल्या 24 तासांत 2.73 लाख कोरोनाबाधितांचा आकडा समोर आला आहे. तसेच 1 हजार 501 कोरोनाबाधितांचा मृत्यू झाला आहे. दरम्यान, कोरोनाच्या वाढत्या प्रादुर्भावात दिलासा देणारी बाब म्हणजे, देशात गेल्या 24 तासांत 1.38 लाख लोक कोरोनामुक्त झाले आहेत. 

महत्वाच्या बातम्या :