Delhi CM Arvind Kejriwal : तब्बल 177 दिवसांनी बाप्पा पावले; दिल्ली सीएम केजरीवाल जामिनावर बाहेर आले, आता पुढे काय?

तब्बल 177 दिवसांनी ते तुरुंगातून बाहेर येतील. सीबीआयने त्यांना 26 जून रोजी कथित मद्य धोरण प्रकरणाशी संबंधित भ्रष्टाचार प्रकरणात अटक केली होती. न्यायालयाने जामीन देण्यासाठी अटी घातल्या आहेत.

SC grants bail to Delhi CM Arvind Kejriwal

Source : ABP Majha

नवी दिल्ली : दिल्ली मद्य धोरण प्रकरणी (Delhi Liquor Policy) दिल्लीचे मुख्यमंत्री अरविंद केजरीवाल यांना अखेर जामीन मिळाला. मात्र, सर्वोच्च न्यायालयाने सीबीआयच्या अटकेला नियमानुसार असल्याचे म्हटले आहे. तब्बल 177 दिवसांनी ते तुरुंगातून बाहेर येतील. सीबीआयने त्यांना 26 जून रोजी कथित मद्य धोरण प्रकरणाशी संबंधित भ्रष्टाचार प्रकरणात अटक केली होती. न्यायालयाने जामीन देण्यासाठी अटी घातल्या आहेत.

केजरीवाल यांच्या जामिनावर कोर्टाच्या कोणत्या 4 अटी

1. अरविंद केजरीवाल मुख्यमंत्री कार्यालयात जाऊ शकणार नाहीत.
2. प्रकरणाशी संबंधित कोणतीही सार्वजनिक चर्चा करणार नाही.
3. तपासात अडथळा आणण्याचा किंवा साक्षीदारांवर प्रभाव टाकण्याचा प्रयत्न करणार नाही.
4. गरज भासल्यास ट्रायल कोर्टात हजर राहून तपासात सहकार्य करेल.

या अटकेला बेकायदेशीर ठरवत दिल्लीच्या मुख्यमंत्र्यांनी जामीन याचिका दाखल केली होती. 5 सप्टेंबर रोजी झालेल्या मागील सुनावणीत न्यायालयाने निर्णय राखून ठेवला होता. दोन तपास यंत्रणांनी (ईडी आणि सीबीआय) केजरीवाल यांच्याविरोधात गुन्हा दाखल केला आहे. दिल्लीच्या मुख्यमंत्र्यांना ईडी प्रकरणात 12 जुलै रोजी सर्वोच्च न्यायालयाकडून जामीन मिळाला आहे. केजरीवाल यांना आज सीबीआय प्रकरणात जामीन मिळाल्यास ते 177 दिवसांनी तुरुंगातून बाहेर येतील.

5 सप्टेंबर रोजी झालेल्या सुनावणीत काय झाले? सिंघवी यांचे जामिनावर 2 महत्त्वाचे युक्तिवाद

1. केजरीवाल सहकार्य करत नसल्याचे सीबीआयचे म्हणणे आहे. आरोपी स्वत:ला दोषी घोषित करेल, अशी अपेक्षा करता येणार नाही, असे न्यायालयाच्याच आदेशात म्हटले आहे.
2. केजरीवाल घटनात्मक पदावर आहेत, त्यांच्या फरार होण्याची शक्यता नाही, पुराव्यांशी छेडछाड केली जाऊ शकत नाही, कारण लाखो कागदपत्रे आणि 5 आरोपपत्रे आहेत. साक्षीदारांवर प्रभाव टाकण्याचा कोणताही धोका नाही. जामिनाच्या 3 अत्यावश्यक अटी आमच्या बाजूने आहेत.

जामीनाविरोधात सीबीआयचे 2 युक्तिवाद

1. मनीष सिसोदिया, के. कविता आधी जामिनासाठी ट्रायल कोर्टात गेली होती. साप शिडीच्या खेळासारखे शॉर्टकट केजरीवाल अवलंबत आहेत. केजरीवाल यांनी ट्रायल कोर्टात जावे.
2. केजरीवाल यांना वाटते की ते एक असामान्य व्यक्ती आहेत, त्यांच्यासाठी वेगळी व्यवस्था असावी. केजरीवाल यांना जामीन मिळाल्यास या निर्णयामुळे उच्च न्यायालयाची निराशा होईल.

केजरीवाल यांनी आतापर्यंत 156  दिवस तुरुंगात काढले आहेत

केजरीवाल यांना ईडीने 21 मार्च रोजी अटक केली होती. 10 दिवसांच्या चौकशीनंतर त्यांना 1 एप्रिल रोजी तिहार तुरुंगात पाठवण्यात आले. लोकसभा निवडणुकीच्या प्रचारासाठी 10 मे रोजी 21 दिवसांसाठी सोडण्यात आले. 51 दिवस तुरुंगात घालवल्यानंतर त्यांची सुटका झाली. 2 जून रोजी केजरीवाल यांनी तिहार तुरुंगात आत्मसमर्पण केले. केजरीवाल यांची आज म्हणजेच 13 सप्टेंबर रोजी सुटका झाली तर ते एकूण 177 दिवस तुरुंगात असतील. यापैकी ते 21 दिवस अंतरिम जामिनावर राहिले. म्हणजेच केजरीवाल यांनी आतापर्यंत एकूण 156 दिवस तुरुंगात काढले आहेत.

केजरीवाल सुरुवातीपासून गुन्हेगारी कटात सामील असल्याचा आरोप

सीबीआयने 7 सप्टेंबर रोजी राऊस ॲव्हेन्यू कोर्टात पाचवे आणि शेवटचे आरोपपत्र दाखल केले होते. सीबीआयने सांगितले की, तपास पूर्ण झाला असून, मुख्यमंत्री अरविंद केजरीवाल हे दारू धोरण तयार करण्याच्या आणि अंमलात आणण्याच्या गुन्हेगारी कटात सुरुवातीपासूनच सहभागी असल्याचे समोर आले आहे. मद्य धोरणाचे खाजगीकरण करण्याचे त्यांनी आधीच ठरवले होते. आरोपपत्रानुसार, मार्च 2021 मध्ये तत्कालीन उपमुख्यमंत्री मनीष सिसोदिया यांच्या अध्यक्षतेखाली मद्य धोरण तयार केले जात असताना केजरीवाल यांनी पक्षाला पैशांची गरज असल्याचे म्हटले होते. त्यांनी आपले जवळचे सहकारी आणि आपचे मीडिया आणि कम्युनिकेशन प्रभारी विजय नायर यांच्यावर निधी उभारण्याचे काम सोपवले होते.

केजरीवाल जामिनावर बाहेर आले तर पुढे काय? 'आप'ला किती फायदा होणार?

अरविंद केजरीवाल यांना जामीन मिळाला तर आम आदमी पक्षासाठी ते खूप महत्त्वाचे आहे. दिल्लीला लागून असलेल्या हरियाणामध्ये विधानसभा निवडणुका होणार आहेत. येथील सर्व 90 जागांवर एकाच टप्प्यात 5 ऑक्टोबर रोजी मतदान होणार आहे. 8 ऑक्टोबरला निकाल लागणार आहे. हरियाणात आम आदमी पक्ष आणि काँग्रेसमध्ये युती नाही. आप सर्व 90 जागांवर निवडणूक लढवत आहे. अशा स्थितीत केजरीवाल तुरुंगातून बाहेर आल्यावर प्रचाराची जबाबदारी त्यांच्यावर येणार आहे. केजरीवाल यांच्याकडे प्रचारासाठी जवळपास 25 दिवस असतील. त्यांना सहानुभूतीची मते मिळू शकतात. लोकसभा निवडणुकीच्या वेळीही केजरीवाल यांना प्रचारासाठी 21 दिवसांचा अंतरिम जामीन मंजूर करण्यात आला होता. लोकसभा प्रचारात केजरीवाल यांनी थेट सीएम योगी यांना घेरल्यानंतर भाजपला खुलासा करण्याची वेळ आली होती. 'आप'ने पाच राज्यांत 22 जागांवर निवडणूक लढवली होती. ज्यामध्ये तो फक्त तीन जिंकला. हरियाणा विधानसभा निवडणुकीत परिस्थिती वेगळी असली, तरी येथे 'आप'ला किती फायदा होणार आहे. फक्त निकाल सांगेल.

इतर महत्वाच्या बातम्या