CDS Bipin Rawat Helicopter Crash प्रकरणी कॅबिनेटच्या सुरक्षा समितीची बैठक, पंतप्रधान मोदींच्या उपस्थितीत 6.30 वाजता होणार बैठक

 तामिळनाडूमध्ये सीडीएस जनरल बिपीन रावत यांना घेऊन जाणाऱ्या भारतीय हवाई दलाच्या हेलिकॉप्टरचा अपघात झाला आहे. यामध्ये 14 पैकी 13 जणांचा मृत्यू झाल्याची माहिती एएनआयने दिली आहे.

Prime Minister Narendra Modi | PTI

नवी दिल्ली :  तामिळनाडूमध्ये सीडीएस जनरल बिपीन रावत यांना घेऊन जाणाऱ्या भारतीय हवाई दलाच्या हेलिकॉप्टरचा अपघात झाला आहे. या हेलिकॉप्टरमध्ये असणाऱ्या 14 जणांपैकी 3 जणांचा मृत्यू झाल्याची माहिती एएनआयने त्यांच्या ट्वीटमधून दिली आहे. आता या प्रकरणावर कॅबिनेटच्या सुरक्षा समितीने संध्याकाळी 6.30 वाजता बैठक बोलावली आहे. पंतप्रधान नरेंद्र मोदी या बैठकीला उपस्थित राहणार आहेत. त्यामुळे या बैठकीतून नेमकी काय माहिती समोर येईल? याकडे सर्वांचे लक्ष लागून आहे.

नेमकं काय घडलं?

कर्नाटक-तामिळनाडू सीमेवर कुन्नूरजवळ हवाईदलाच्या अत्यंत सुरक्षित समजल्या जाणाऱ्या IAF MI 17 हेलिकॉप्टरचा भीषण अपघात झाला आहे. महत्त्वाचं म्हणजे या हेलिकॉप्टरमध्ये सीडीएस जनरल बिपीन रावत (Bipin Rawat) यांचा समावेश आहे. दरम्यान रावत यांच्या प्रकृतीबाबत नेमकी कोणतीच माहिती अजून समोर आलेली नाही.

कोण आहेत सीडीएस जनरल बिपीन रावत? 

• 2016 साली बिपीन रावत हे लष्करप्रमुख झाले. लष्करप्रमुख दलबीरसिंह सुहाग 31 डिसेंबर 2016ला सेवानिवृत्त झाले होते, त्यांच्या जागी रावत यांची नेमणूक करण्यात आली होती. 
• बिपीन रावत हे मूळचे उत्तराखंडचे आहेत. त्यांची 1 सप्टेंबर 2016 रोजीच सेनेच्या उपप्रमुखपदी नियुक्ती झाली होती.
• बिपीन रावत यांचे वडीलही नि. लेफ्टनंट जनरल एल एस रावत हे सेनेच्या उपप्रमुखपदावर निवृत्त झाले होते.
• रावत हे डिसेंबर 1978 मध्ये भारतीय सैन्य अकादमीतून पासआऊट झालेले 'बेस्ट कॅडेट' ठरले. 
• रावत यांना 'स्वार्ड ऑफ ऑनर' या पुरस्कारानेही सन्मानित करण्यात आलं.
• सेवा मेडल, युद्ध सेवा मेडल, सेना मेडल आणि विशिष्ट सेवा मेडल सारख्या अनेक पुरस्कारांनी रावत यांना गौरवण्यात आलं आहे.

अत्यंत सुरक्षित हेलिकॉप्टर असूनही अपघात

दोन इंजिन असलेलं IAF Mi-17V5 हे हेलिकॉप्टर अतिशय सुरक्षित समजलं जातं. पण तरीही हे हेलिकॉप्टर दुर्घटनाग्रस्त झाल्याने, त्याबाबतच्या सुरक्षेबाबत पुन्हा नव्याने चर्चा सुरु झाली आहे.  हे हेलिकॉप्टर रशियन बनावटीचं आहे. सैन्य दल आणि व्हीआयपींसाठी हे हेलिकॉप्टर मुख्यत्वे वापरलं जातं. 

संबंधित बातम्या : 

• Bipin Rawat Helicopter Crash : हवाई दलाच्या हेलिकॉप्टर क्रॅश प्रकरणी संरक्षणमंत्री उद्या संसदेत निवेदन देण्याची शक्यता, सूत्रांची माहिती