Air India Plane Crash : गुजरातमध्ये Air India चं विमान कोसळलं; शरद पवार, फडणवीस, शिंदेंसह दिग्गजांकडून शोक व्यक्त

Air India Plane Crash : गुजरातमधील अहमदाबादमध्ये एक मोठा विमान अपघात झाला आहे. उड्डाण केल्यानंतर काही क्षणांतच एअर इंडियाचे प्रवासी विमान कोसळले आहे.

Air India Plane Crash

Source : ABP Majha

Air India Plane Crash Ahmedabad : गुरुवारी गुजरातमधील अहमदाबादमध्ये एक मोठा विमान अपघात झाला आहे. एअर इंडियाचे प्रवासी विमान लंडनला जाण्यासाठी निघाले होते, ते टेकऑफदरम्यान कोसळले आहे. उड्डाण केल्यानंतर काही क्षणांतच हे विमान मेघानीनगरच्या रहिवासी परिसरात कोसळले. या विमानात क्रू मेंबर्ससह एकूण 242 प्रवासी असल्याची माहिती समोर आली आहे. यावर आता राजकीय वर्तुळात विविध प्रतिक्रिया समोर येत आहे. राष्ट्रवादी शरदचंद्र पवार पक्षाचे अध्यक्ष शरद पवार (Sharad Pawar), मुख्यमंत्री देवेंद्र फडणवीस (Devendra Fadnavis), उपमुख्यमंत्री एकनाथ शिंदे (Eknath Shinde) यांच्यासह दिग्गज नेत्यांनी या घटनेबाबत शोक व्यक्त केला आहे. 

राष्ट्रवादी शरदचंद्र पवार पक्षाचे अध्यक्ष शरद पवार म्हणाले की, गुजरातच्या अहमदाबाद येथे एअर इंडियाचं प्रवासी विमान कोसळल्याची घटना मन हेलावून टाकणारी आहे. या दुर्घटनेत मोठी जीवितहानी झाल्याचं देखील कळतंय, हे अतिशय दुःखद आहे. अपघातग्रस्त जखमी प्रवाशांवर उपचार करणाऱ्या व घटनास्थळी मदतकार्यासाठी काम करणाऱ्या यंत्रणांना बळ मिळो आणि जखमींच्या प्रकृतीत लवकरात लवकर सुधारणा होवो, अशी प्रार्थना करतो, असे त्यांनी म्हटले आहे. 

गुजरातच्या अहमदाबाद येथे एअर इंडियाचं प्रवासी विमान कोसळल्याची घटना मन हेलावून टाकणारी आहे. या दुर्घटनेत मोठी जीवितहानी झाल्याचं देखील कळतंय, हे अतिशय दुःखद आहे. अपघातग्रस्त जखमी प्रवाशांवर उपचार करणाऱ्या व घटनास्थळी मदतकार्यासाठी काम करणाऱ्या यंत्रणांना बळ मिळो आणि जखमींच्या…

— Sharad Pawar (@PawarSpeaks) June 12, 2025

मुख्यमंत्री देवेंद्र फडणवीस म्हणाले की, अहमदाबाद विमानतळावर एअर इंडिया प्रवासी विमान अपघाताची बातमी ऐकून खूप दुःख आणि धक्का बसला आहे. सर्वांच्या सुरक्षिततेसाठी प्रार्थना करतो, असे त्यांनी म्हटले आहे. 

Pained and shocked to know about Air India passenger flight incident at Ahmedabad airport.
Praying for everyone’s safety 🙏

— Devendra Fadnavis (@Dev_Fadnavis) June 12, 2025

उपमुख्यमंत्री एकनाथ शिंदे म्हणाले की, अहमदाबाद येथील भीषण विमान अपघात अतिशय धक्कादायक आहे. या दुर्घटनेत मृत्युमुखी पडलेल्यांना मी श्रद्धांजली अर्पण करतो. गुजरात प्रशासन मोठ्या प्रमाणावर बचाव कार्य करत असून विमानातील वाचलेल्या प्रवाशांना सुखरूप बाहेर काढले जात आहे. या दुर्घटनेत मोठी जीवितहानी झाल्याची शक्यताही वर्तवण्यात येते आहे. या भयंकर दुर्घटनेतील जखमी लवकरात लवकर बरे व्हावेत अशी मी ईश्वरचरणी प्रार्थना करतो, असे त्यांनी म्हटले आहे. 

खासदार सुनील तटकरे यांनी म्हटले आहे की, आज अहमदाबादमध्ये एअर इंडियाच्या विमानाच्या परिस्थितीबद्दल ऐकून मन दुखावले. या चिंताग्रस्त क्षणी, आम्ही विमानातील प्रत्येक जण आणि त्यांच्या प्रियजनांसोबत आहोत. आम्ही गुजरातच्या नागरिकांसोबत एकजुटीने उभे आहोत. या आव्हानात्मक काळात आम्ही शक्तीसाठी प्रार्थना करतो, असे त्यांनी म्हटले आहे. तर खासदार प्रफुल्ल पटेल म्हणाले की, आज अहमदाबाद विमानतळावर झालेल्या एअर इंडियाच्या विमान अपघाताच्या बातम्यांनी मन फारच चिंताग्रस्त झाले आहे. या चिंताजनक वेळेत आम्ही सर्व प्रवासी, कर्मचारी आणि त्यांच्या कुटुंबियांसोबत आहोत, असे त्यांनी म्हटले. 

आणखी वाचा