धक्कादायक! एकाच वेळी 200 सिलेंडरचा स्फोट, 10 किलोमीटरपर्यंत आवाज, एकाचा जागीच मृत्यू 

राजस्थानमध्ये एक धक्कादायक घटना घडली आहे. जयपूर-अजमेर महामार्गावर एलपीजी सिलिंडरने भरलेल्या ट्रकचा भीषण अपघात झाल्याची घटना घडली आहे.

Accident News

Source : Getty Images

Accident News : राजस्थानमध्ये एक धक्कादायक घटना घडली आहे. जयपूर-अजमेर महामार्गावर एलपीजी सिलिंडरने भरलेल्या ट्रकचा भीषण अपघात झाल्याची घटना घडली आहे. या अपघातानंतर ट्रकमध्ये लागलेल्या आगीमुळे 200 सिलेंडरचा स्फोट झाला आहे.  यामध्ये एका व्यक्तीचा जागीच मृत्यू झाला आहे. या घटनेमुळं संपूर्ण परिसर हादरला आहे. या दुर्घटनेत पाच वाहने जळून खाक झाली आहेत. 

जयपूर-अजमेर महामार्गावर दूदू जवळ सांवरदा भागात मंगळवारी रात्री एक भीषण दु्र्घटना घडली. एलपीजी सिलिंडरनं भरलेल्या ट्रकचा अपघात झाला. त्यानंतर अग्निकल्लोळ सुरु झाला आहे. जवळपास तीन तास संपूर्ण परिसर स्फोटांच्या आवाजांनी हादरला. ट्रकमधील 200 सिलिंडरचा एका पाठोपाठ एक स्फोट झाला. या स्फोटांमुळे आणि त्यानंतर लागलेल्या आगीनं ट्रकचा बराचसा भाग अक्षरश: वितळून गेला. या भीषण दुर्घटनेचं सीसीटीव्ही फुटेज समोर आले आहेत. 

टँकरचा वेग अतिशय जास्त होता, त्यामुळं अपघाताची तीव्रता वाढली

एलपीजी सिलिंडर घेऊन निघालेल्या ट्रकनं रस्त्याच्या कडेला चुकीच्या पद्धतीनं कट मारण्याचा प्रयत्न केला. तेव्हा मागून येणाऱ्या टँकरनं ट्रकला धडक दिली. टँकरचा वेग अतिशय जास्त होता. त्यामुळं अपघाताची तीव्रता वाढली. सिलिंडरनं भरलेल्या ट्रकनं लगेच पेट घेतला. यानंतर सिलिंडरचे स्फोट सुरु झाले. त्यामुळे आग वाढत गेली. सगळीकडे आगीचे लोट दिसू लागले. सगळीकडे मोठ्या प्रमाणात धूर पसरला.

स्फोटामुळे महामार्गावर 7 किलोमीटर दूरपर्यंत वाहतूक कोंडी

रात्रीच्या अंधारात आणि शांततेत एका मागोमाग 200 सिलिंडरचा स्फोट झाला. त्यांचा आवाज 10 किलोमीटरपर्यंत ऐकू आला. आसपासच्या हॉटेलांमध्ये एकच पळापळ सुरु झाली. सगळे जण हॉटेल सोडून रस्त्यावर धावले. अपघातानंतर झालेल्या स्फोटामुळे महामार्गावर 7 किलोमीटर दूरपर्यंत वाहतूक कोंडी पाहायला मिळाली. स्फोटांची तीव्रता इतकी होती की सिलिंडरचे अक्षरश: तुकडे झाले आणि ते आसपासच्या शेतांमध्ये, हॉटेलांमध्ये जाऊन पडले. त्यामुळे हॉटेलात असलेल्या लोकांची पळापळ सुरु झाली. अपघाताची माहिती मिळताच अग्निशमन दलाच्या गाड्या घटनास्थळी पोहोचल्या. पण स्फोटांची मालिकाच सुरु झाल्यानं आगीवर नियंत्रण मिळवणं अवघड जात होतं.

या भीषण आगीत 5 वाहनं भस्मसात 

या भीषण आगीत 5 वाहनं भस्मसात झाली. एक व्यक्ती जिवंत जळाला आहे. त्याची ओळख अद्याप पटलेली नाही. या आगीत अनेकजण होरपळले आहेत. अपघातग्रस्त ट्रकमध्ये 330 सिलिंडर होते. त्यातील जवळपास 200 सिलिंडरचा स्फोट झाला. 10 महिन्यांपूर्वी असाच अपघात भांकरोटामध्ये झाला होता. त्यात 20 जणांचा मृत्यू झाला होता.

महत्वाच्या बातम्या: