संतोष देशमुखांच्या कुटुंबाला मदत करायची आहे असं सांगत अधिकाऱ्यांकडून खंडणी उकळली, मराठा आंदोलकांनी बेदम चोप दिला
Dharashiv : आमदार सुरेश धस यांचा कार्यकर्ता असल्याचं सांगत एका व्यक्तीने अधिकाऱ्यांकडून खंडणी वसुल केल्याचा प्रकार घडला. त्यामुळे मराठा आंदोलकांनी त्याला बेदम चोप दिला.
धाराशिव : मराठा जनआक्रोश मोर्चाच्या नावाखाली खंडणी वसुली करत असल्याचा आरोप करत एकाला मराठा आंदोलनकर्त्यांकडून मारहाण करण्यात आली. आशिष विशाळ असं मारहाण झालेल्या व्यक्तीचं नाव असून त्याने संतोष देशमुखांच्या कुटुंबीयांना मदत करायची असल्याचं सांगून अनेक अधिकाऱ्यांकडून पैसे घेतल्याचा आरोप केला जातोय. त्यामुळेच त्याला भर चौकात मराठा कार्यकर्त्यांकडून बेदम चोप देण्यात आला. संबंधित व्यक्तीच्या फोन कॉल्स आणि बँक खात्यांची पोलिसांनी चौकशी करावी अशी मागणी मराठा आंदोलकांनी केली आहे.
संतोष देशमुख यांच्या कुटुंबीयांना मदत करायची म्हणून आशिष विशाळ या व्यक्तीने अनेक अधिकाऱ्यांकडून पैसे वसूल केल्याचा आरोप आहे. तसेच आष्टीचे आमदार सुरेश धस यांच्या नावाचा वापर करून त्याने अनेक अधिकाऱ्यांना धमकावल्याचाही आरोप केला जातोय.
सुरेश धस आणि मराठा मोर्चाचे नाव वापरले
धाराशिव इथे मराठा जन आक्रोश आंदोलनाच्या नावावर आणि आमदार सुरेश धस यांचा कार्यकर्ता असल्याचे सांगत अशिष विशाळने अधिकाऱ्यांकडून खंडणी वसूल केल्याचा आरोप आहे.
गेल्या काही दिवसांपासून धाराशिव शहरातील विविध शासकीय कार्यालयांमध्ये स्वतःला आमदार सुरेश धस यांचा कार्यकर्ता सांगणाऱ्या अशिष विशाळने अधिकाऱ्यांना धमकावत खंडणी वसूल केल्याचा आरोप आहे. तसेच मराठा जन आक्रोश आंदोलनाच्या नावावर पैसे उकळल्याचाही त्याच्यावर आरोप आहे.
सरपंच संतोष देशमुख यांच्या कुटुंबाला मदत करण्याच्या बहाण्याने आशिष विशाळने अधिकाऱ्यांना वेठीस धरत असल्याचा आरोप आहे. या गैरप्रकारामुळे मराठा समाजाच्या आंदोलनाची व आमदार सुरेश धस यांची बदनामी होत असल्याचं मराठा आंदोलकांनी म्हटलंय. त्यामुळेच आशिष विशाळला त्यांनी भरचौकात चोप दिला. या प्रकरणात अद्याप पोलिसात कुठलीही तक्रार आली नसल्याचं पोलिसांनी सांगितले आहे.
ही बातमी वाचा:
महत्त्वाच्या बातम्या
