'कलंक'वरून राजकीय वाद पेटला; ठाकरे,फडणवीसांसह अंबादास दानवेंमध्ये रंगला ट्विटर'वार'
Maharashtra Political War : फडणवीसांनी दिलेल्या उत्तराला विरोधी पक्षनेते अंबादास दानवे (Ambadas Danve) यांनी प्रतिउत्तर दिले आहे.
Maharashtra Political War : माजी मुख्यमंत्री उद्धव ठाकरे (Uddhav Thackeray) यांनी विदर्भ दौरा केला असून, त्यांची सोमवारी नागपुरात जाहीर सभा झाली. दरम्यान याच सभेत त्यांनी उपमुख्यमंत्री देवेंद्र फडणवीस (Devendra Fadnavis) यांच्यावर हल्लाबोल केला. तसेच आपण कधीही राष्ट्रवादीसोबत जाणार नाही, वेळ पडल्यास सत्तेत बाहेर राहू असे वक्तव्य करणारी फडणवीसांची ऑडिओ क्लिप देखील जाहीर सभेत उद्धव ठाकरेंनी ऐकवून दाखवली. त्या नंतर बोलतांना, “अरे काय तुमच्या नागपूरला कलंक आहे हा”, अशा खोचक शब्दांत फडणवीस यांच्यावर टीका केली. त्यांच्या याच 'कलंक'च्या टीकेला फडणवीस यांनी ट्वीटरवरून उत्तर दिले होते. तर आता फडणवीसांनी दिलेल्या उत्तराला विरोधी पक्षनेते अंबादास दानवे (Ambadas Danve) यांनी प्रतिउत्तर दिले आहे. त्यामुळे 'कलंक'वरून रंगला ट्विटर'वार' पाहायला मिळत आहे.
फडणवीसांचे उत्तर...
उद्धव ठाकरे यांनी फडणवीसांना 'कलंक' असल्याचे वक्तव्य केल्यावर यावर उत्तर देतांना फडणवीस म्हणाले की, ‘कलंकीचा काविळ’.... ज्यांच्यावर शेण खाल्ल्याचा आरोप केला, त्यांच्याचसोबत पंक्तीला बसून खाणे याला म्हणतात कलंक, आमच्या हृदयस्थानी असलेल्या हिंदूहृदयसम्राट वंदनीय बाळासाहेब ठाकरे यांना जनाब संबोधन सहन करणे, याला म्हणतात कलंक... सकाळ, दुपार, संध्याकाळ वीर सावरकरांचा अपमान करणार्‍यांच्या मांडीला मांडी लावून बसणे याला म्हणतात कलंक!, सकाळी वीर सावरकरांचा अपमान करणार्‍यांच्या गळ्यात त्याचदिवशी रात्री गळे घालणे, याला म्हणतात कलंक... ज्यांच्यावर राज्याच्या संरक्षणाची जबाबदारी, त्यांनीच पोलिसांना चक्क वसुलीला लावणे, याला म्हणतात कलंक... पोलिस दलातील स्वपक्षीय कार्यकर्त्याकडून उद्योगपतींच्या घरासमोर स्फोटके ठेवल्यावर त्याची पाठराखण करणे, तो लादेन आहे का असे विचारणे, याला म्हणतात कलंक... कोरोनाच्या काळात मुंबईत लोक मरत असताना मृतदेहांच्या बॅगांमध्ये सुद्धा घोटाळा करणे, याला म्हणतात कलंक... लोकशाहीच्या सर्वोच्च मंदिरात न बसता लोकशाहीच्या पोकळ गप्पा मारणे, याला म्हणतात कलंक... असो, स्वत: कलंकित असले की इतरही कलंकित दिसायला लागतात. तुम्हाला ‘कलंकीचा काविळ’ झाला असेल तर एकदा उपचार करुन घ्या उद्धवजी, असे फडणवीस म्हणाले.
‘कलंकीचा काविळ’ !
— Devendra Fadnavis (@Dev_Fadnavis) July 10, 2023
1) ज्यांच्यावर शेण खाल्ल्याचा आरोप केला, त्यांच्याचसोबत पंक्तीला बसून खाणे याला म्हणतात कलंक!
2) आमच्या हृदयस्थानी असलेल्या हिंदूहृदयसम्राट वंदनीय बाळासाहेब ठाकरे यांना जनाब संबोधन सहन करणे, याला म्हणतात कलंक!
3) सकाळ, दुपार, संध्याकाळ वीर सावरकरांचा अपमान… pic.twitter.com/efd6rdG8d2
अंबादास दानवेंकडून प्रतिउत्तर...
फडणवीस यांनी दिलेल्या उत्तरला दानवे यांनी प्रतिउत्तर देतांना म्हटले आहे की, कावळ्यांची काविळ!... ज्यांच्या विरुद्ध लढून तुमच्या पक्षाचा पाया मजबूत केला अशा गोपीनाथ मुंडे यांच्या लढ्याला तिलांजली देऊन त्यांचे राजकीय वैरी फोडाफोडीने जवळ करणे, याला म्हणतात कलंक...'मन की बात' उर्दूतून प्रसिद्ध करणे, मशिद भ्रमण करणे आणि पुन्हा स्वतःला हिंदुत्वाचा पाईक म्हणणे, याला म्हणतात कलंक... समुद्रात झेप घेऊन मर्सिलिस बंदर गाठणाऱ्या वीर सावरकरांना 'भारतरत्न' पुरस्कार न देणे, याला म्हणतात कलंक... राम मंदिर आंदोलनात कारसेवकांवर गोळ्या झाडण्याचे आदेश देणाऱ्या व्यक्तीला 'पद्मविभूषण' देणे, याला म्हणतात कलंक..... आपल्या विरुद्ध बोलणाऱ्या व्यक्तींना दडपण्यासाठी पोलिसांचा वापर करणे, वारकऱ्यांवर लाठ्या चालवणे, याला म्हणतात कलंक.... महाराष्ट्रातून दरदिवशी 70 महिला बेपत्ता होतात आणि त्यांचा थांगपत्ता लावण्यात पोलिसांना यश येत नाही, हा आहे कलंक... कोरोनाबाधितांवर अंत्यसंस्कार न करता त्यांचे शव गंगेत वाहू देणे, पीएम केअर फंडाचा हिशेब जनतेपुढे न ठेवणे, याला म्हणतात कलंक... कोरोना महामारी शिखर गाठत असताना पश्चिम बंगालसारख्या दाट लोकसंख्येच्या राज्यात हट्टीपणाने निवडणुकांच्या प्रचारसभा घेणे, परिस्थिती अनुकूल नाही म्हणून महाराष्ट्रात निवडणूका न घेणे, याला लोकशाहीवर कलंक म्हणतात.... कलंक नसताना तो दिसणे त्याला नजरेतील दोष म्हणतात, दिसून न दिसल्यासारखं करणे त्याला ढोंगीपणा म्हणतात. उपचार आता भाजपवर होतील आणि ते जनताच करणार आहे. त्रिशूळ असल्याचे सोंग तुम्ही आणता, मात्र तिसरा डोळा मतदारांकडेच आहे. ते योग्यवेळी तो उघडतील आणि कलंक पुसतील, असे दानवे म्हणाले.
कावळ्यांची काविळ!
— Ambadas Danve (@iambadasdanve) July 10, 2023
१. ज्यांच्या विरुद्ध लढून तुमच्या पक्षाचा पाया मजबूत केला अश्या गोपीनाथ मुंडे यांच्या लढ्याला तिलांजली देऊन त्यांचे राजकीय वैरी फोडाफोडीने जवळ करणे, याला म्हणतात कलंक!
२. 'मन की बात' उर्दूतून प्रसिद्ध करणे, मशिद भ्रमण करणे आणि पुन्हा स्वतःला हिंदुत्वाचा पाईक… https://t.co/CLJf21ApVr pic.twitter.com/OIIwcQgx0s
इतर महत्वाच्या बातम्या:
Uddhav Thackeray : देवेंद्र फडणवीसांचा ऑडिओ ऐकवून ठाकरे म्हणतात, हा नागपूरला कलंक
महत्त्वाच्या बातम्या
ट्रेंडिंग न्यूज
