चंद्रपुरात अन्न व औषध प्रशासनाची कारवाई, मोठा औषधसाठा जप्त
औषध विक्रेते आणि उत्पादकांनी औषधांच्या जाहिराती व विक्री करताना कायद्याचे पालन करावे, असे आवाहन अन्न व औषध प्रशासनाने केले आहे.
Chandrapur : चंद्रपूर शहरात अन्न व औषध प्रशासनाची कारवाई केली आहे. चंद्रपूर शहरातील जटपुरा गेट परिसरात एका स्टोअरवर अन्न व औषध प्रशासन (FDA) विभागाने धडक कारवाई करत नियमांचे उल्लंघन करणारा 45 हजार 970 रुपये किमतीचा औषधसाठा जप्त केला. या कारवाईमुळे शहरातील औषध विक्रेत्यांमध्ये खळबळ उडाली आहे.
जप्त करण्यात आलेल्या औषधांची एकूण किंमत 45 हजार 970 रुपये
मिळालेल्या माहितीनुसार, अन्न व औषध प्रशासनाच्या पथकाने एका मेगा स्टोअरमध्ये अचानक तपासणी केली. तपासणीदरम्यान स्टोअरमध्ये विक्रीसाठी ठेवलेल्या काही औषधांवर आक्षेपार्ह दावे आणि दिशाभूल करणाऱ्या जाहिराती आढळून आल्या. संबंधित औषधांच्या वेष्टनांवर लठ्ठपणा, दमा, हृदयविकार आणि ताप यांसारख्या आजारांवर गुणकारी असल्याचे दावे करण्यात आले होते. अन्न व औषध प्रशासनाच्या अधिकाऱ्यांनी सांगितले की, ‘औषधे आणि जादुई उपाय (आक्षेपार्ह जाहिराती) कायदा, 1954’ अंतर्गत अशा प्रकारच्या जाहिरातींना बंदी आहे. या कायद्यानुसार विशिष्ट आजारांवर निश्चित उपचार किंवा हमखास परिणाम दर्शविणाऱ्या जाहिराती करणे गुन्हा मानला जातो. ग्राहकांची दिशाभूल होऊ नये आणि सार्वजनिक आरोग्याचे संरक्षण व्हावे, यासाठी अशा जाहिरातींवर कठोर निर्बंध घालण्यात आले आहेत. तपासणीत गंभीर स्वरुपाचे उल्लंघन आढळून आल्याने FDAच्या पथकाने संबंधित औषधांचा संपूर्ण साठा जप्त केला. जप्त करण्यात आलेल्या औषधांची एकूण किंमत 45 हजार 970 रुपये असल्याची माहिती विभागाकडून देण्यात आली.
दरम्यान, संबंधित प्रकरणी पुढील कायदेशीर कारवाईची प्रक्रिया सुरु असून, औषध विक्रेते आणि उत्पादकांनी औषधांच्या जाहिराती व विक्री करताना कायद्याचे पालन करावे, असे आवाहन अन्न व औषध प्रशासनाने केले आहे.
बीडमध्ये मोठी कारवाई
अन्न व औषध प्रशासन विभागाचे आयुक्त तुकाराम मुंढे मूळ बीड जिल्ह्यातील आहेत. त्यांच्याच या जिल्ह्यामध्ये आता अन्न व औषध प्रशासनाकडून वेगवेगळ्या ठिकाणी धाडी टाकल्या जात आहेत. बीड शहराजवळ असलेल्या एका लस्सी उत्पादन केंद्रात मुदत बाह्य झालेले अन्नपदार्थ वापरत असल्याचे समोर आले. त्यामुळे या ठिकाणचा 100 लिटर हून अधिकचा लस्सीचा साठा नष्ट करण्यात आला. तसेच या लस्सी उत्पादन केंद्र चालकावर कारवाई करण्यात आली आहे. याबरोबरच माजलगाव शहरात रिफाइंड सोयाबीन तेलाचा साठा जप्त करण्यात आला असून शिरूर मध्ये देखील अशीच कारवाई करण्यात आलीय. याबरोबरच पाटोदा तालुक्यातील दोन दूध संकलन केंद्राची तपासणी करत दुधाचे नमुने तपासणीसाठी पाठवण्यात आले आहेत. अन्न व औषध प्रशासनाकडून सुरू झालेल्या या धाडसत्रामुळे भेसळखोरांचे धाबे दणाणले आहेत.
Before You Go
Maharashtra Weather Rain Updates: पावसाचं पॅटर्न बदललं? जुलैमध्ये धो धो कोसळला, ऑगस्टमध्ये गायब; पुढे काय, हवामान विभागाची A टू Z माहिती
महत्त्वाच्या बातम्या
