Beed Crime: नशेच्या आहारी गेलेल्या 20 वर्षीय नातवाचा पैशासाठी आजीवर हल्ला, 80 वर्षाच्या आजीचा मृत्यू, आई-वडीलही जखमी

बीड जिल्ह्यातील परळीत धक्कादायक घटना घडली आहे. व्हाइटनरच्या नशेत मुलाने आई-वडिलांसह आज्जीवर चाकूने हल्ला केल्याची घटना घडली आहे.

Beed Crime News

Source : Getty Images

Beed Crime News : परळीतील (Parli) तलाब कट्टा (फुलेनगर) परिसरात आज सायंकाळी साडेसहा वाजण्याच्या सुमारास एक खळबळजनक घटना घडली आहे. नशेच्या आहारी गेलेल्या नातवाने पैशासाठी आजीवर जीवघेणा हल्ला केला. तर त्याला रोखण्यासाठी आलेले आई-वडीलसुद्धा गंभीर जखमी झाले आहेत. दरम्यान, जखमी झालेल्या आजीला परळीहून अंबाजोगाईला उपचारासाठी घेऊन जात असताना रस्त्यातच मृत्यू झाला आहे.   जुबेदा इब्राहिम कुरेशी (वय 80) असं मृत्यू झालेल्या आजीचं नाव आहे. दरम्यान, या घटनेनंतर हल्लेखोर नातवाला संभाजीनगर पोलीसांनी शिताफिने ताब्यात घेतले आहे.

नेमकी कशी घडली घटना?

ही हृदयद्रावक घटना तलाब कट्टा (फुलेनगर) परिसरातील कुरेशी कुटुंबात घडली. मिळालेल्या प्राथमिक माहितीनुसार, जुबेदा इब्राहिम कुरेशी या 80 वर्षीय वृद्धा घरी  होत्या. त्यांचा नातू आरबाज रमजान कुरेशी (वय 20 वर्षे) हा नशेच्या अवस्थेत घरी आला आणि आजीकडे पैशाची मागणी करु लागला. आजीने पैसे देण्यास नकार दिल्यामुळे संतप्त झालेल्या आरबाजने हातातील सत्तूरने थेट त्यांच्या तोंडावर वार केला. या भयंकर हल्ल्यात आजीची मरणासन्न अवस्था झाली. तसेच त्याची आई समिना रमजान कुरेशी व वडील रमजान  इब्राहिम कुरेशी तातडीने धावून आले, मात्र आरोपीने त्यांच्यावरही शस्त्राने हल्ला करत त्यांना गंभीर जखमी केले. त्यानंतर आरबाज सत्तूर हातात घेऊन घटनास्थळावरून पळून जाण्याचा प्रयत्न करीत होता. घटनेची माहिती मिळताच संभाजीनगर पोलीस ठाण्याचे पोलीस निरीक्षक धनंजय ढोणे आणि त्यांच्या सहकाऱ्यांनी घटनास्थळी धाव घेतली. परिस्थितीचे गांभीर्य ओळखून केवळ 15 मिनिटांत आरोपीला ताब्यात घेण्यात पोलीस निरीक्षक ढोणे यशस्वी झाले. विशेष म्हणजे, आरोपीकडे धारदार शस्त्र असतानाही त्यांनी अतिशय शिताफीने आणि धाडसाने ही कारवाई केली. 

आजीला उपचारासाठी अंबेजोगाईला घेऊन जात असताना रस्त्यातच मृत्यू           

दरम्यान, गंभीर जखमी झालेल्या आजीला उपचारासाठी अंबेजोगाईला घेऊन जात असताना आजीचा मृत्यू झाला आहे.  गंभीर जखमी आई-वडीलांवर प्राथमिक उपचारांनंतर अंबाजोगाई येथील रुग्णालयात हलवण्यात आले आहे. या घटनेने संपूर्ण तलाब कट्टा परिसरात एकच खळबळ उडाली. पोलिसांनी घटनेची नोंद घेतली असून पुढील पोलीस प्रक्रिया सुरू आहे. अद्याप या प्रकरणी गुन्हा दाखल करण्यात आलेला नाही.

महत्वाच्या बातम्या: