Satish Bhosale & Suresh Dhas : सतीश भोसलेला अटक करा, धसांवरही गुन्हा दाखल करा; ग्रामस्थ आक्रमक, शिरूर पोलीस ठाण्याबाहेर मोठी गर्दी
Satish Bhosale and Suresh Dhas : भाजप पदाधिकारी सतीश भोसले याने त्याच्या काही साथीदारांसह शिरूर तालुक्यातील एका व्यक्तीला जबर मारहाण केल्याचा व्हिडिओ सध्या व्हायरल होत आहे.
Satish Bhosale and Suresh Dhas : बीडमधील शिरूर तालुक्यातील एका व्यक्तीला जबर मारहाण झाल्याचा व्हिडीओ समाजमाध्यमांवर व्हायरल होत आहे. यात भाजप पदाधिकारी असलेल्या सतीश भोसले (Satish Bhosale) याने त्याच्या काही साथीदारांसह ही मारहाण केली असून तो भाजप आमदार सुरेश धस (Suresh Dhas) यांचा निकटवर्तीय आहे. सामाजिक कार्यकर्त्या अंजली दमानिया (Anjali Damania) यांनी सतीश भोसले यांनी केलेल्या मारहाणीचा व्हिडिओ शेअर केला. यानंतर सतीश भोसलेवर कारवाई व्हावी, अशी मागणी जोर धरत आहे. त्यातच आता सतीश भोसले उर्फ खोक्या याला अटक करा आणि आमदार सुरेश धस यांच्यावर देखील गुन्हा नोंद करावा, या मागणीसाठी शिरूर पोलीस ठाण्याबाहेर नागरिकांनी मोठी गर्दी केली आहे.
शिरूर येथील सतीश भोसले उर्फ खोक्या नावाच्या भाजपच्या पदाधिकाऱ्याने गावातील दिलीप ढाकणे आणि त्यांचा मुलगा महेश ढाकणे यांना मारहाण केली होती. या मारहाणीत दिलीप ढाकणे यांचे आठ दात पडले तर महेश ढाकणे याचा पाय फ्रॅक्चर झाला. घटना घडल्यानंतर ढाकणे कुटुंब रक्तबंबाळ अवस्थेत गुन्हा दाखल करण्यासाठी पोलीस अधीक्षक कार्यालयात गेले होते. मात्र त्यादरम्यान गुन्हा दाखल झाला नाही. मात्र अखेर आज पोलिसांनीच फिर्यादी होत या प्रकरणात सतीश भोसले याच्या विरोधात गुन्हा नोंद केला असून त्याचा शोध घेतला जात आहे.
...तोपर्यंत शांत बसणार नाही
बावी गावचे ग्रामस्थ आणि ढाकणे कुटुंबातील सदस्यांनी शिरूर पोलीस ठाण्याबाहेर गर्दी केली आहे. बीडच्या शिरूर पोलीस ठाण्याबाहेर सतीश भोसले यांच्या विरोधात गुन्हा दाखल करण्यासाठी बावी ग्रामस्थांनी गर्दी केली आहे. जोपर्यंत सतीश भोसले आणि आमदार सुरेश धस यांच्यावर गुन्हा दाखल होत नाही, तोपर्यंत शांत बसणार नाही असा पवित्रा नागरिकांनी घेतला आहे.
कोण आहे सतीश भोसले?
सतीश भोसले हा मागील पाच वर्षापासून राजकारणात सक्रिय आहे. शिरूर कासार तालुक्यातील झापेवाडी येथील तो रहिवासी आहे. भाजपच्या महाराष्ट्र भटके विमुक्त आघाडीचे पद सतीश भोसलेकडे आहे. सामाजिक कार्यातून ओळख निर्माण करून त्याने पारधी समाजासाठी सामाजिक कार्य केले. याआधीही सतीश भोसलेवर गंभीर गुन्हे दाखल असल्याची माहिती आहे. अलीकडच्या काळात भाजपचे आमदार सुरेश धस यांच्याशी त्याचा संपर्क झाला. यानंतर सतीश भोसले आणि सुरेश धस यांची जवळीक वाढली. सुरेश धस यांचा कार्यकर्ता असल्याची ओळख निर्माण झाल्याने त्याचा परिसरात दबदबा झाला. गेल्या 24 तासात सतीश भोसले यांचे विविध व्हिडिओ व्हायरल झाले आहेत. त्यामुळे सतीश भोसले याची सध्या राज्यभरात जोरदार चर्चा रंगली आहे.
आणखी वाचा
महत्त्वाच्या बातम्या
