![ABP Premium](https://cdn.abplive.com/imagebank/Premium-ad-Icon.png)
Raj Thackeray Rally : मनसे नेते बाळा नांदगावकर औरंगाबाद दौऱ्यावर, सभेच्या तयारीचा आढावा घेणार
Raj Thackeray Rally : औरंगाबाद दौऱ्यावर असणारे बाळा नांदगांवकर राज ठाकरेंच्या सभेसाठी पोलिसांची परवानगी आणि सभेला होणाऱ्या विरोधाच्या पार्श्वभूमीवर महत्त्वाच्या पदाधिकऱ्यांशी चर्चा करणार आहेत.
![Raj Thackeray Rally : मनसे नेते बाळा नांदगावकर औरंगाबाद दौऱ्यावर, सभेच्या तयारीचा आढावा घेणार Raj Thackeray Rally MNS leader Bala Nandgaonkar will visit Aurangabad to review the preparations for the meeting Raj Thackeray Rally : मनसे नेते बाळा नांदगावकर औरंगाबाद दौऱ्यावर, सभेच्या तयारीचा आढावा घेणार](https://static.abplive.com/wp-content/uploads/sites/4/2017/01/29192928/bala-nandgaonkar.jpg?impolicy=abp_cdn&imwidth=1200&height=675)
औरंगाबाद : 1 मे रोजी राज ठाकरे यांच्या औरंगाबादमध्ये होणाऱ्या सभेच्या तयारीचा आढावा घेण्यासाठी मनसे नेते बाळ नांदगावकर आज (27 एप्रिल) औरंगाबाद दौऱ्यावर आहेत. पोलिसांची परवानगी आणि सभेला होणाऱ्या विरोधाच्या पार्श्वभूमीवर बाळ नांदगावकर महत्त्वाच्या पदाधिकऱ्यांशी चर्चा करणार आहेत. बाळा नांदगावकर यांच्या दौऱ्यानंतर पोलिसांच्या परवानगीबाबत मनसे निर्णय घेणार आहे.
मनसे 1 मे रोजी औरंगाबादेत होणाऱ्या राज ठाकरेंच्या सभेसाठी परवानगीच्या प्रतीक्षेत आहे. मात्र प्रतीक्षेपूर्वी त्यांच्या हातात पडलं आहे, ते पोलीस आयुक्तांच्या जमावबंदीच्या आदेशाचा पत्र. औरंगाबादेत 26 एप्रिलपासून 9 मे पर्यंत जमावबंदी लागू करण्यात आली आहे. त्यामुळे मनसे अध्यक्ष राज ठाकरे यांच्या सभेला परवानगी मिळणार का? असा प्रश्न निर्माण झाला आहे. औरंगाबादमध्ये कलम 144 लागू करण्यात आलं असून उल्लंघन करणाऱ्यांवर महाराष्ट्र पोलीस अधिनियम 1951 चे कलम 135 अन्वये कारवाई होणार असल्याची माहिती मिळत आहे. विविध सणवार, संभाव्य आंदोलनाची कारणं देत जमावबंदीचे आदेश देण्यात आले आहेत.
राज ठाकरेंच्या सभेला परवानगीबाबत पोलिसांचा सस्पेन्स कायम
राज ठाकरे यांच्या सभेला औरंगाबाद पोलिसांनी परवानगी दिली नसली तरी मनसे पदाधिकाऱ्यांनी स्टेज उभारण्याची तयारी केली आहे. दुसरीकडे औरंगाबाद पोलीस आयुक्तांची राज्याच्या गृहमंत्र्यांसोबत सोमवारी (25 एप्रिल) झालेल्या बैठकीमध्ये परवानगीबाबत विचारणा केल्याचं समजतं. परंतु मनसे अध्यक्ष राज ठाकरे यांच्या सभेला परवानगी मिळणार का या प्रश्नाच्या उत्तराबद्दल पोलिसांनी अजूनही सस्पेन्स ठेवला आहे. राज ठाकरे यांच्या 1 मे रोजी होणाऱ्या सभेसाठी पोलिसांनी परवानगी देण्याबाबत अजूनही मौन बाळगलं आहे. अर्ज करुन आठवडा झाला असला तरी पोलिसांनी परवानगीबाबत अद्यापही निर्णय घेतलेला नाही. दुसरीकडे मनसे पदाधिकारी मराठवाडा सांस्कृतिक मंडळावर सभा घेण्यावर ठाम आहेत. त्यांनी स्टेजची उभारणी करण्यास सुरुवात केली आहे.
राज ठाकरेंच्या सभेचा टीझर रिलीज
ठाण्याच्या सभेत मशिदीवरचे भोंगे उतरवण्याची घोषणा करणारे आणि पुण्यात हनुमानाची महाआरती करणारे राज ठाकरे औरंगाबादच्या सभेत कोणती घोषणा करणार याची सर्वांनाच उत्सुकता आहे. अशातच आता 1 मे रोजी होणाऱ्या सभेचा टीझर मनसेनं शेअर केला आहे. छत्रपती संभाजीराजे या मालिकेच्या गाण्यावर मनसेनं 1 मे रोजीच्या सभेचा टीझर एडिट केला आहे. या टीझरमधील महत्त्वाची बाब म्हणजे, औरंगाबादचा संभाजीनगर असा आवर्जून उल्लेख करण्यात आला आहे. त्यामुळे औरंगाबाद शहराचं संभाजीनगर असं नामांतर करण्याच्या मुद्द्याला मनसेने हात घातल्याचं दिसतं.
महत्त्वाच्या इतर बातम्या :
औरंगाबादेत आजपासून 9 मेपर्यंत जमावबंदी! 1 मे रोजी होणाऱ्या राज ठाकरेंच्या सभेला परवानगी मिळणार?
महत्त्वाच्या बातम्या
ट्रेंडिंग न्यूज
![ABP Premium](https://cdn.abplive.com/imagebank/metaverse-mid.png)