Satyajeet Tambe : '...तर आम्ही तुम्हाला आडवं आल्याशिवाय राहणार नाही'; सत्यजित तांबेंनी सुजय विखेंवर डागली तोफ

Satyajeet Tambe on Sujay Vikhe Patil : राजकारणात काम करताना पराभव पचवायला ताकद लागते. माझ्या राजकारणात अनेक पराभव मी पाहिले. पाच-पाच पराभव पचावलेला मी कार्यकर्ता असल्याचे सत्यजित तांबे यांनी म्हटले.

Satyajeet Tambe and Sujay Vikhe Patil

Source : ABP Majha

संगमनेर : भाजप नेते सुजय विखे पाटील (Sujay Vikhe Patil) यांच्या सभेत वसंत देशमुख (Vasant Deshmukh) यांनी काँग्रेस नेते बाळासाहेब थोरात (Balasaheb Thorat) यांच्या कन्या जयश्री थोरात (Jayashree Thorat) यांच्याबाबत आक्षेपार्ह वक्तव्य केले. त्यानंतर संगमनेरमध्ये (Sangamner) मोठा गदारोळ झाल्याचे दिसून आले. काँग्रेस कार्यकर्त्यांनी आक्रमक होत गाड्यांची जाळपोळ केली. आता या प्रकरणावरून नाशिक पदवीधर मतदारसंघाचे आमदार सत्यजित तांबे (Satyajeet Tambe) यांनी सुजय विखेंवर जोरदार हल्लाबोल केला आहे. बाळासाहेब थोरात यांच्या प्रचार सभेतून ते बोलत होते. 

सत्यजीत तांबे म्हणाले की, ही संगमनेर तालुक्याच्या स्वाभिमानाची सभा आहे. एकमेकांच्या पायात पाय न घालण्याची परंपरा असलेला हा तालुका आहे. जाती, धर्म, भेद कधीही न समजलेला हा तालुका आहे.  मात्र गेल्या काही दिवसांपासून काही लोक येतात आणि आपल्या लोकांना डिवचण्याचा प्रयत्न करताना दिसत आहे. 1999 पासून थोरात साहेबांच्या प्रचारासाठी मी काम करत आहे. पण आजपर्यंत इतक्या खालच्या पातळीच राजकारण मी कधीही पाहिलं नाही. पुढचे 50 वर्षे या तालुक्याकडे नजर उचलण्याची हिंमत होणार नाही, अशी ही निवडणूक होईल. 

मला खात्री आहे ते तुलना करणार नाही

आज जे म्हणतात चाळीस वर्षात काय झालं. त्यांनी 40 वर्षापूर्वीचा संगमनेर तालुका आणि आजचा संगमनेर तालुका पाहा. विकासाचं मॉडेल या तालुक्याने निर्माण केला आहे. काल लोणीच्या सभेत साहेबांनी सांगितलं की,  विकासाची तुलना करा. पण मला खात्री आहे ते तुलना करणार नाही. कारण त्यांच्याकडे दाखवण्यासारखं कुठलेच मॉडेल नाही, चालू संस्था बंद करण्याचं उत्तम मॉडेल म्हणजे ते प्रवरा मॉडेल आहे, असे म्हणत सत्यजित तांबे यांनी राधाकृष्ण विखे पाटलांवर निशाणा साधला. 

त्यांना पराभव पचवता येत नाहीये

ते पुढे म्हणाले की, राजकारणात काम करताना पराभव पचवायला ताकद लागते. माझ्या राजकारणात अनेक पराभव मी पाहिले. पाच-पाच पराभव पचावलेला मी कार्यकर्ता आहे. त्यांना पराभव पचवता येत नाहीये आणि तो इतका जिव्हारी लागला की, काय करावं हे त्यांना सुचत नाही. या नैराश्यातून ते इथे येऊन बोलतात, भाषण करतात.  2007 ला सर्वाधिक जिल्हा परिषद सदस्य माझ्या बाजूने असताना तुमची आईच जिल्हा परिषद अध्यक्ष कशी झाली? आमदार तुमचेच, खासदार तुमचेच, केंद्रीय मंत्रीपद तुम्हाला. कोणतीच गोष्ट दुसऱ्याला द्यायची नाही. दुसरा काही करत असेल तर ते सहन करायचं नाही. या प्रवृत्तीला जागा दाखवण्याची वेळ आज आली आहे, असे म्हणत सत्यजित तांबे यांनी सुजय विखे पाटलांवर हल्लाबोल केला.  

...तर आम्ही तुम्हाला आडवं आल्याशिवाय राहणार नाही

जयश्रीच्या ठिकाणी दुसरी मुलगी असती तर घरात बसली असती. मात्र, ती बाहेर पडली खंबीर मन असलेली आमची जयश्री थोरात आहे. जे आमचे लोक घटनास्थळी नव्हते त्यांच्यावर खोटे गुन्हे दाखल केले. साहेबांना फोन आले, भांडणं चालू आहे म्हणून आमचे प्रमुख पदाधिकारी गेले. भांडण मिटवायला ते गेले आणि तेच फोटो हे सगळे दाखवून आमच्यावर कारवाईची मागणी करतात. एकही माणूस दवाखान्यात ऍडमिट नाही आणि आमच्या कार्यकर्त्यांवर ३०७ चे गुन्हे दाखल करण्यात आले. आमच्या माता-भगिनींना गुन्हा दाखल करण्यासाठी आठ-आठ तास ठिय्या आंदोलन करावं लागलं आणि विरोधकांनी दिलेली तक्रार तात्काळ घेतली जाते. वसंत देशमुख दोन-दोन दिवस सापडत नाही आणि सापडल्यावर पंधरा मिनिटात जामीन मिळतो, असेही त्यांनी यावेळी म्हटले. जगा आणि जगू द्या, या तत्त्वावर काम करणारी आम्ही माणसं आहेत. तुम्ही जर आम्हाला आडवे आले तर आम्ही सुद्धा तुम्हाला आडवं आल्याशिवाय राहणार नाही, असेही सत्यजित तांबे यांनी म्हटले.  

आणखी वाचा