Star Pravah Marathi Serial Anandi: घेऊन येतेय सुखाची नांदी… दृष्टी गमावलेल्या तरुणीची प्रेरणादायी कथा; आजपासून 'आनंदी' प्रेक्षकांच्या भेटीला
Star Pravah Marathi Serial Anandi: मालिकेच्या शीर्षकाला साजेशी अशी आनंदी ही मालिका आजपासून स्टार प्रवाहवर प्रेक्षकांच्या भेटीस येणार आहे.
Star Pravah Marathi Serial Anandi: जग हे केवळ डोळ्यांनीच पाहता येतं, असं कोण म्हणतं? ते मन आणि स्पर्शातूनही अनुभवता येतं की.. अंध व्यक्ती कायम अंधारात जगणारी असली तरी, त्यांचं जग हे निसर्गाच्या रंगाहून अधिक सुंदर असतं, असं म्हटलं तर, वावगं ठरणार नाही. याच भावनेला स्पर्श करणारी 'आनंदी' (Anandi) ही मालिका प्रेक्षकांच्या भेटीस येणार आहे. स्टार प्रवाहवरील (Star Pravah) मालिका कायम समाजात घडत असलेल्या घडामोडींवर आणि वास्तव्याशी जोडलेल्या घटनांवर आधारीत असते. प्रेक्षकांचं मनोरंजन (Entertainment news) करण्यासह स्टार प्रवाहवरील मालिका उत्तम संदेश देण्याचंही काम करते. मनाला भिडणारी अशीच एक कौटुंबिक आणि अंध - साधी सरळ मुलीची कथा या मालिकेतून दाखवण्यात येणार आहे. येत्या 30 मार्चपासून 'आनंदी' ही मालिका प्रेक्षकांच्या भेटीस येणार आहे.
मालिकेच्या शीर्षकानुसार, 'आनंदी' ही तरुणी अंध असली तरी आत्मविश्वासाने परिपूर्ण असते. तिच्यात जिद्द असते. अंध असली तरी ती सामान्य व्यक्तीप्रमाणे जगात वावरत असते. जन्मत: नाही तर, अपघातात ती आपली दृष्टी गमावते. दृष्टी गमावली असली तरीही, हताश न होता जीवनाकडे ती सकारात्मक दृष्टिकोनातून पाहत असते. डोळ्यांनी तिला जग अनुभवता आलं नसलं तरी ती, आपल्या मनातून, भावनेतून आणि स्पर्शातून हे सुंदर जग अनुभवत असते.
'आनंदी' या मालिकेचा फर्स्ट लूक आणि टीझर काही दिवसांपूर्वीच प्रदर्शित झाला. या मालिकेच्या टीझरमधून हेच स्पष्ट होते की, 'आनंदी' या तरुणीसाठी अंधत्व हे दुबळेपणा नसून, तिची सर्वात मोठी ताकद आहे. ती स्वत: ला कायम सकारात्मक ठेवते. गरजूंना मदत करणं, हा तिचा मूळ स्वभाव असल्याचं मालिकेच्या टीझरमधून स्पष्ट होतं. स्वच्छंदी जगणारी आनंदी घरातील जबाबदारीही नेटाने पार पाडते. जे खरंच कौतुकास्पद ठरते. या मालिकेतून अनेकांना प्रेरणाही मिळेल.
'आनंदी' या मालिकेत मुख्य भूमिका अभिनेत्री जाई खांडेकर (jaaee khandekar) साकारत आहे. ती या मालिकेतून मालिका विश्वात पदार्पण करत आहे. पहिलीच मालिकेत अंध तरुणीची भूमिका साकारणं हे खरंच आव्हानात्मक असलं तरीही, अभिनेत्रीने सहजतेने 'आनंदी' ही व्यक्तीरेखा सुंदररित्या साकारलीये. या मालिकेविषयी नवोदित कलाकार जाई म्हणते, 'आनंदी नावाप्रमाणे स्वभावानेही आनंदी असते. ही केवळ एक भूमिका नसून, एक भावना आहे. डोळ्यांनी दिसत नसलं तरी, मनातून, स्पर्शातून ती सगळं अनुभवते. अंध व्यक्ती नेमकं कसं जीवन जगतात, हे दाखवण्यात आलंय. ही भूमिका साकारणं ही माझ्यासाठी मोठी जबाबदारी आहे'.
'ही भूमिका साकारण्यासाठी मी आठवडाभर अंध मुलांच्या संस्थेत जाऊन वर्कशॉप केलं. त्या संस्थेतील मुलांच्या दैनंदिन आयुष्यात नेमकं काय घडतंय हे जाणून घेण्याचा प्रयत्न केला. आनंदी ही व्यक्तीरेखा तुम्हाला नक्कीच जवळची वाटेल', असं जाई खांडेकर म्हणाली.
दरम्यान, 'आनंदी' ही मालिका आजपासून स्टार प्रवाह या वाहिनीवर प्रेक्षकांच्या भेटीस येणार आहे. ही मालिका आपल्याला रात्री 9:30 वाजता पाहता येईल.
महत्त्वाच्या बातम्या
