Pushpa 2 Box Office Collection Day 1: 'पुष्पा 2' बॉक्स ऑफिसवर करणार दमदार ओपनिंग, 300 कोटींपेक्षा अधिकची कमाई करण्याचा अंदाज

Pushpa 2 Box Office Collection Day 1: 'पुष्पा 2: द रुल'बॉक्स ऑफिसवर दमदार ओपनिंग करून अनेक रेकॉर्ड मोडणार आहे. पहिल्याच दिवशी जगभरातील बॉक्स ऑफिसवर 300 कोटींची कमाई करून हा चित्रपट इतिहास रचू शकतो.

Written By : जयदीप मेढे | Updated at : 01 Dec 2024 11:05 PM (IST)

Pushpa 2 Box Office Collection Day 1

Source : instagram

Pushpa 2 The Rule Box Office Collection Day 1: अल्लू अर्जुनच्या (Allu Arjun) आगामी 'पुष्पा 2: द रुल' (Pushpa 2 The Rule) या चित्रपटाची प्रेक्षक आतुरतेने वाट पाहत आहेत. आता चित्रपटाच्या रिलीजसाठी अवघे काही दिवस उरले आहेत. 'पुष्पा 2: द रुल' रिलीज झाल्यानंतर बॉक्स ऑफिसवर राज्य करणार असल्याचा अंदाज सध्या वर्तवला जातोय. तसेच बॉक्स ऑफिसवर दमदार ओपनिंग करून हा चित्रपट अनेक विक्रम मोडणार असल्याचंही म्हटलं जातंय.

'पुष्पा 2: द रुल' 5 डिसेंबरला चित्रपटगृहात दाखल होणार आहे. पडद्यावर प्रदर्शित होण्याआधीच चित्रपटाचे ॲडव्हान्स बुकिंग सुरू झाले आहे. SACNILC च्या अहवालानुसार, पहिल्याच दिवशी हा चित्रपट 300 कोटींच्या क्लबचा भाग बनेल. हा चित्रपट देशांतर्गत बॉक्स ऑफिसवर 200 कोटींचा टप्पा पार करेल.

भारतात 200 कोटींहून अधिक ओपनिंग

अहवालात दावा करण्यात आला आहे की, 'पुष्पा 2: द रुल' भारतात पहिल्या दिवशी 233 कोटी रुपयांच्या कलेक्शनसह ओपनिंग करणार असल्याचं म्हटलं जातंय. आंध्र प्रदेश आणि तेलंगणामध्ये चित्रपट पहिल्या दिवशी 105 कोटींची कमाई करू शकतो. हा चित्रपट कर्नाटकात 20 कोटी रुपये, तामिळनाडूमध्ये 15 कोटी रुपये आणि केरळमध्ये 8 कोटी रुपये कमवू शकतो. इतर राज्यांमधून, 'पुष्पा 2: द रुल' सुमारे 85 कोटी रुपयांचा व्यवसाय करू शकतो.

'पुष्पा 2: द रुल' 300 कोटींहून अधिक कमाई करून विक्रम करणार!

'पुष्पा 2: द रुल' केवळ भारतातच नाही तर जगभरात इतिहास रचण्यासाठी सज्ज आहे. अल्लू अर्जुन स्टारर चित्रपटाने अॅडव्हान्स बुकिंगमध्ये अमेरिकेमध्ये रेकॉर्डब्रेक कलेक्शन केले आहे. परदेशी बॉक्स ऑफिसवर हा चित्रपट 70 कोटींची कमाई करू शकतो, असं म्हटलं जातंय. एकूणच, 'पुष्पा 2: द रुल' जगभरात 303 कोटी रुपयांमध्ये ओपन करू शकतो. असे झाल्यास 'पुष्पा 2: द रुल' पहिल्याच दिवशी 300 कोटींचा टप्पा पार करणारा पहिला भारतीय सिनेमा ठरु शकतो.