कियारा नाही तर ‘सैय्यारा’ फेम अभिनेत्री साकारणार मधुबाला? बायोपिकच्या चर्चांना उधाण
रुपेरी पडद्यावर आपल्या अद्वितीय सौंदर्याने आणि अभिनयाने चाहत्यांची मनं जिंकणाऱ्या माधुबालांची भूमिका कोण साकारणार, याबाबत अनेक नावं चर्चेत होती.
Madhubala Biopic: बॉलीवूड अभिनेत्री मधुबाला यांच्या आयुष्यावर आधारित बायोपिकची चर्चा गेल्या काही महिन्यांपासून जोरात सुरू आहे. रुपेरी पडद्यावर आपल्या अद्वितीय सौंदर्याने आणि अभिनयाने चाहत्यांची मनं जिंकणाऱ्या माधुबालांची भूमिका कोण साकारणार, याबाबत अनेक नावं चर्चेत होती. आता या चर्चांना नवं वळण मिळालं असून या चित्रपटासाठी सैय्यारा फेम अभिनेत्री अनीत पड्डा हिची निवड झाल्याची चर्चा इंडस्ट्रीमध्ये रंगली आहे. याबद्दल कोणतेही अधिकृत वक्तव्य अद्याप समोर आले नाहीय.
विशेष म्हणजे यापूर्वी या भूमिकेसाठीमाधुरी दीक्षितपासून करिना कपूर, कंगना रणौत आणि अलीकडे कियारा अडवाणी यांच्या नावाची चर्चा झाली. मात्र आता निर्मात्यांनी नव्या चेहऱ्यावर विश्वास दाखवण्याचा निर्णय घेतल्याचं सांगितलं जात आहे. अलीकडेच सैय्यारा या प्रोजेक्टमुळे चर्चेत आलेल्या अनीत पड्डासाठी ही भूमिका तिच्या करिअरमधील मोठा टप्पा ठरू शकतो.
मधुबालाच्या बयोपिककडे चाहत्यांचे लक्ष
मिळालेल्या माहितीनुसार, माधुबालांच्या आयुष्यावर आधारित या महत्त्वाकांक्षी प्रोजेक्टसाठी अनीत पड्डाला मुख्य भूमिकेसाठी साइन करण्यात आल्याचं सांगितलं जात आहे. भारतीय सिनेसृष्टीतील सर्वात लोकप्रिय अभिनेत्रींपैकी एक असलेल्या माधुबालांचा प्रवास पडद्यावर साकारण्याचं मोठं आव्हान अनीतसमोर असणार आहे. या चित्रपटात माधुबालांचं करिअर, त्यांचा संघर्ष, वैयक्तिक आयुष्य आणि रुपेरी पडद्यावरचा त्यांचा जादुई प्रवास दाखवला जाणार असल्याची चर्चा आहे.
दरम्यान, या चित्रपटाबाबत निर्मात्यांकडून अद्याप अधिकृत घोषणा झालेली नाही. मात्र या चित्रपटाच्या प्री-प्रॉडक्शनची तयारी सुरू झाली आहे. लवकरच या चित्रपटाचं शूटिंग सुरू होण्याची शक्यता व्यक्त केली जात असून दिग्दर्शक आणि इतर कलाकारांविषयीची माहितीही पुढील काही आठवड्यांत समोर येऊ शकते. जर ही बातमी अधिकृत ठरली, तर रुपेरी पडद्यावरील कालातीत सौंदर्यवती माधुबालांची भूमिका साकारणं हे अनीत पड्डासाठी मोठं आव्हान आणि तितकंच मोठं यश ठरू शकतं. यापूर्वी या भूमिकेसाठीकियारा अडवाणी हिचं नाव जोरात चर्चेत होतं. मात्र कियारा लवकरच मीनाकुमारी यांच्या जीवनावर आधारित बायोपिकमध्ये झळकणार असल्याचं जवळपास निश्चित झाल्यानं, या प्रोजेक्टसाठी तिचं नाव आता मागे पडल्याचं बोललं जात आहे.
भारतीय चित्रपटसृष्टीच्या इतिहासात सौंदर्य, निरागसता आणि मोहक अभिनय यांचा उल्लेख झाला की सर्वात आधी आठवतं ते नाव म्हणजे मधुबाला. आपल्या गोड स्मितहास्याने, अप्रतिम स्क्रीन प्रेझेन्सने आणि नैसर्गिक अभिनयाने तिने लाखो प्रेक्षकांची मनं जिंकली. आजही तिच्या सौंदर्याच्या आणि अभिनयाच्या कथा चाहत्यांमध्ये तितक्याच उत्कटतेने सांगितल्या जातात. त्यामुळेच तिच्या आयुष्यावर आधारित बायोपिकची चर्चा सुरू होताच सिनेरसिकांमध्ये प्रचंड उत्सुकता निर्माण झाली आहे.
महत्त्वाच्या बातम्या
