Deool Band 2: प्रविण तरडेंनी लिहिलेला 'तो ' डायलॉग घेण्यास मोहन जोशींनी दिलेला स्पष्ट नकार; देऊळ बंद 2 च्या वेळेस स्वतःच म्हणाले ..
या चित्रपटाच्या निमित्ताने निर्माते व दिग्दर्शक प्रवीण तरडे आणि अभिनेते मोहन जोशी 'माझा कट्टा ' वर आले होते. या चित्रपटाच्या संदर्भातील अनेक गोष्टींविषयी मनमोकळेपणाने त्यांनी गप्पा मारल्या.
Deool Band 2 Mohan Joshi Pravin Tarde: प्रवीण तरडे लिखित व दिग्दर्शित 'देऊळ बंद 2: आता परीक्षा देवाची ' (Deeol Band 2) या बहुप्रतिक्षित चित्रपटाची प्रेक्षकांमध्ये मोठी उत्सुकता आहे. पहिल्या भागात राघव शास्त्रीच्या आलिशान चारचाकीत प्रवास करणारे स्वामी आता एका शेतकरी महिलेच्या दुचाकीवरून प्रवास करताना दिसणार आहेत. या चित्रपटाची सध्या प्रचंड चर्चा आहे. अलीकडेच या चित्रपटाचा टीजर लॉन्च करण्यात आला. हा चित्रपट 21 मे 2026 ला प्रदर्शित होणार आहे. 'देऊळ बंद'मध्ये ज्येष्ठ अभिनेते मोहन जोशी यांनी आपल्या सशक्त अभिनयाने आणि आवाजाने स्वामी समर्थांची भूमिका पडद्यावर जिवंत केली होती. 2015 मध्ये प्रदर्शित झालेल्या देऊळ बंद चित्रपटानंतर तब्बल 11 वर्षांनी या चित्रपटाचा दुसरा भाग प्रेक्षकांना पाहता येणार आहे. या 10 वर्षाच्या काळात अभिनेते मोहन जोशी यांच्या तब्येतीत अनेक चढउतार आले. अर्धांगवायूच्या (पॅरेलिसिस ) त्रासावर मात करून देऊळ बंद 2 मध्ये शेतकरी महिलेच्या दुचाकी वर प्रसन्न मुद्रेत हात उंचावर ते मागे बसलेले दिसतात. या चित्रपटाच्या निमित्ताने निर्माते व दिग्दर्शक प्रवीण तरडे आणि अभिनेते मोहन जोशी 'माझा कट्टा ' वर आले होते. या चित्रपटाच्या संदर्भातील अनेक गोष्टींविषयी मनमोकळेपणाने त्यांनी गप्पा मारल्या.
मोहन जोशींनी दिलेला तो डायलॉग म्हणण्यास स्पष्ट नकार
'देऊळ बंद ' चित्रपटाचे लेखक व दिग्दर्शक प्रवीण तरडे यांनी देऊळ बंद चित्रपटावेळी घडलेला एक किस्सा सांगितला. ते स्वतः निर्व्यसनी असल्यामुळे देऊळ बंद चित्रपटात त्यांनी आवडीने डायलॉग लिहिला. पण हा डायलॉग घेण्यास मोहन जोशी काही केल्या तयारच होईनात.
प्रवीण तरडे म्हणाले 'मी स्वतः निर्व्यसनी आहे. माझ्या प्रत्येक सिनेमात दारू किंवा सिगारेट दिसणार नाही. देऊळ बंद चित्रपटात मी आवडीने डायलॉग लिहिला स्वामींचा -' दारू पिऊ नकोस मी तुझ्या पाठीशी आहे'..मला वाटलं या डायलॉगचा लोकांवर जाम परिणाम होईल. मो.जो म्हणाले ' हट ss मी हा डायलॉगच बोलणार नाही ' मी त्यांना समजावत होतो ' स्वामींनी जर सांगितलं तर समाजातलं व्यसन कमी होईल. ते म्हणाले 'माझं व्यसन कोण कमी करणार ' उद्या जर मी कुठे काही करताना दिसलो तर लोक माझ्या नावाने ओरडतील. ' ते म्हणाले ' मी जर दारू पीत नसतो तर मी हा डायलॉग घेतला असता. त्यामुळे मी हा डायलॉग घेणार नाही. हा डायलॉग बदल. नंतर 10 वर्षांनी तेच मोहन जोशी मला येऊन म्हणतात ' यावेळी तो दारूचा डायलॉग टाका ना ... '. मी म्हणालो 'आता का ? ' त्यावर मोजो म्हणाले ' आता मी काहीच करत नाही ' आता मी सगळं सोडलं आहे. मला बरं वाटलं ' जे मोहन जोशी माझ्यावरती ओरडले होते की 'हा डायलॉग बोलणार नाही.' त्यांनी त्यावेळी इतर डायलॉग म्हटले - 'सिग्नल मोडू नको मी तुझ्या पाठीशी आहे ' कारण ते म्हणाले की मी स्वतः सिग्नल मोडत नाही. त्यामुळे मी हा डायलॉग म्हणेन. पण मी दारू विषयी लोकांना ज्ञान सांगणार नाही ' असं म्हणत त्यांनी तो संवाद नाहीच घेतला. ' असं प्रवीण तरडेंनी सांगितलं.
महत्त्वाच्या बातम्या
