Dear Malley : गजेंद्र अहिरे दिग्दर्शित ‘डियर मॉली’चा ट्रेलर आऊट, 1 जुलैला सिनेमा होणार रिलीज

Dear Malley : वडील -मुलीच्या नात्याची हृदयस्पर्शी कथा ‘डियर मॉली’ या सिनेमात प्रेक्षकांना पाहायला मिळणार आहे.

Dear Malley

Dear Malley : सिनेसृष्टीला अनेक उत्तमोत्तम सिनेमे देणारे दिग्दर्शक गजेंद्र अहिरे (Gajendra ahire) पुन्हा एकदा एक अनोखा विषय घेऊन प्रेक्षकांच्या भेटीला येण्यास सज्ज झाले आहेत. गुवाहाटी आंतरराष्ट्रीय फिल्म फेस्टिव्हलमध्ये ‘बेस्ट फिचर फिल्म’ने सन्मानित करण्यात आलेला ‘डियर मॅाली’ (Dear Malley) हा सिनेमा 1 जुलै रोजी सर्वत्र प्रदर्शित होत आहे. हा सिनेमा मराठी, हिंदी आणि इंग्रजी भाषेत प्रदर्शित होणार आहे. नुकताच या सिनेमाचा ट्रेलर सोशल मीडियावर झळकला असून हा एक नातेसंबंधावर भाष्य करणारा सिनेमा आहे. 

सिनेमाचे कथानक काय? 

ट्रेलरमध्ये आपल्या वडिलांचा शोध घेण्यासाठी सातासमुद्रापार पोहोचलेली मॅाली दिसत आहे. जिचा खूप धडपडीचा प्रवास सुरू आहे. स्वप्नांची पूर्तता करण्यासाठी आपल्या माणसांना पाठीशी ठेवून परदेशी निघून गेलेल्या बाबांना शोधण्यात मॅाली यशस्वी होणार का? तिला दिलेल्या पत्रांमध्ये तिच्या मनात दडलेल्या प्रश्नांची उत्तरे मिळणार का? अशी अनेक रहस्यांचा उलगडा 1 जुलैला होणार आहे. या सिनेमात गुरबानी गिल, अलोक राजवाडे, मृण्मयी गोडबोले, अश्विनी गिरी, लिया बॅायसेन, क्रिस्टर होल्मग्रेन यांच्या प्रमुख भूमिका आहेत. वडील आणि मुलीच्या नात्यातील अव्यक्त प्रेम यात पाहायला मिळत आहे. 

सिनेमासंदर्भात दिग्दर्शक गजेंद्र अहिरे म्हणाले,"ही कथा आहे नवरा - बायकोची. ही कथा आहे वडील -मुलीच्या नात्याची. ही एक हृदयस्पर्शी गोष्ट आहे. या सिनेमातील प्रत्येक व्यक्तिरेखा मला हवी होती तशीच आहे. विशेष कौतुक आलोक आणि मृण्मयीचे कारण त्यांच्या वयापेक्षा जास्त वयाची व्यक्तिरेखा त्यांनी साकारली आहे. या भूमिकेला त्यांनी शंभर टक्के न्याय दिला आहे. या सिनेमातील गाणीही परिस्थितीला साजेसी अशीच आहेत. या सिनेमाचे चित्रीकरण स्विडनमध्ये झाले आहे. त्यामुळे या सिनेमात स्विडीश संस्कृतीही डोकावते. या सिनेमासाठी हव्या असलेल्या सर्व गोष्टी मला मिळाल्या. मात्र त्यासाठी आमच्या संपूर्ण टीमला बरीच मेहनत करावी लागली". निश्चल प्रॉड्क्शन्स निर्मित या सिनेमाची निर्मिती प्रवीण निश्चल व व्हिनस यांनी केली आहे.

संबंधित बातम्या