Sher Shivraj : पहिल्याच दिवशी 'शेर शिवराज' हाऊसफुल! सिनेमागृहांत घुमतोय ‘जय शिवराय’चा जयघोष
Sher Shivraj : 'शेर शिवराज' हा सिनेमा 22 एप्रिलला सिनेमागृहात प्रदर्शित झाला आहे.
Sher Shivraj : दिग्पाल लांजेकरांचा (Digpal Lanjekar) 'शेर शिवराज' (Sher Shivraj) हा सिनेमा 22 एप्रिलला सिनेमागृहात प्रदर्शित झाला आहे. सिनेमाचे पोस्टर प्रदर्शित झाल्यापासून हा सिनेमा चर्चेत आहे. पहिल्याच दिवशी अनेक सिनेमागृहांबाहेर हाऊसफुलचे बोर्ड झळकले आहेत. पहिल्या दिवशी या सिनेमाने 1.05 कोटींची कमाई केली आहे. हा सिनेमा प्रेक्षकांच्या पसंतीस उतरत आहे.
'शेर शिवराज' या सिनेमाच्या माध्यमातून अफजलखानाच्या वधाचा थरार प्रेक्षकांना अनुभवता येत आहे. शिवरायांच्या अद्भुत गुणांचं आणि अनोख्या युद्ध कौशल्याचं दर्शन 'शेर शिवराज' या सिनेमात घडत आहे. यासोबतच त्या काळातील सामाजिक, राजकीय वातावरण, राजांच्या अचूक निर्णयांचा रयतेला होणारा फायदा, शत्रूंची आक्रमणं परतवून लावण्याची शक्ती, अफझलखानाची स्वारी, खानाचा वध करत विजापूरी साम्राज्याला राजांनी लावलेला सुरुंग आणि त्यामुळं हादरलेल्या आदिलशाहीचं यथोचित चित्रण 'शेर शिवराज' मध्ये दिग्पाल लांजेकर यांनी केलं आहे.
View this post on Instagram
'हे' कलाकार मुख्य भूमिकेत
'शेर शिवराज' सिनेमात चिन्मय मांडलेकर छत्रपती शिवाजी महाराजांच्या भूमिकेत दिसत आहेत. तर अफजलखानाच्या भूमिकेत मुकेश ऋषी दिसत आहेत. जिजाऊ आऊसाहेबांच्या भूमिकेत मृणाल कुलकर्णी, अजय पूरकर सुभेदार तानाजी मालुसरे, दिग्पाल लांजेकर बहिर्जी नाईक, वर्षा उसगांवकर बडी बेगम, समीर धर्माधिकारी कान्होजी जेधे, अभिनेत्री मृण्मयी देशपांडे केसरच्या भूमिकेत तर अक्षय वाघमारे पिलाजी गोळे, विक्रम गायकवाड सरनोबत नेताजी पालकर, आस्ताद काळे विश्वास दिघे, वैभव मांगले शिवाजी महाराजांचे वकील गोपीनाथ बोकील, सुश्रुत मंकणी येसाजी कंक, दीप्ती केतकर मातोश्री दिपाईआऊ बांदल, माधवी निमकर मातोश्री सोयराबाई राणीसरकार, ईशा केसकर मातोश्री सईबाई राणीसरकार, रिशी सक्सेना फाझल खानची तर निखील लांजेकर नरवीर जीवा महाले, तसेच बिपीन सुर्वे सर्जेराव जेधे यांच्या भूमिकेत आहेत.
मुंबई, ठाणे, पुणे, नाशिक, ओरंगाबाद, कोल्हापूर यांसह विविध शहरांतून तसेच परदेशांतून सगळ्याच वयोगटांतील प्रेक्षकांनी चित्रपटाचे जोरदार स्वागत केले आहे. शुक्रवारी 300 चित्रपटगृहांच्या 700 शोज मधून सुरु झालेली ही घोडदौड शनिवारी 450 चित्रपटगृहांच्या 1200 शोजपर्यंत पोहचली आहे. याखेरीज परदेशातील यूएसए, ऑस्ट्रेलिया,आर्यलॅंड, युके, फिनलॅंड, घाना, नायजेरिया, सौदी अरेबिया, कुवेत, ओमेन, बहारीन, कतार, युएइ चित्रपटगृहांमध्येही प्रेक्षकांच्या उत्तम प्रतिसादात चित्रपटाची घोडदौड सुरु आहे. अमेरिकेतील शुक्रवार आणि शनिवारच्या शोजलाही जोरदार प्रतिसाद मिळतोय.
महत्त्वाच्या बातम्या
