Pathan Shooting Begin : किंग खानच्या 'पठाण'चं चित्रिकरण 4 जूनपासून मुंबईत?

किंग खानच्या पठाण या चित्रपटासाठी चाहते बऱ्याच काळापासून वाट पाहत आहेत, चित्रपटाचं 70 टक्के शूटिंग पूर्ण झालं असूनही कोरोनाच्या दुसऱ्या लाटेने चित्रिकरणात अडथळा आणला. मात्र आता उर्वरित चित्रिकरण लवकरच सुरू होणार असल्याच्या चर्चा सुरू आहेत.

Pathan_Film

मुंबई : बॉलिवूडचा बादशाह शाहरूख खान मोठ्या पडद्यावर येण्यासाठी कमालीचा उत्सुक आहे. सध्या तो सिद्धार्थ आनंद दिग्दर्शित पठाण या सिनेमावर काम करतोय. या चित्रपटात त्याच्यासह दीपिका पादुकोणही असणार आहे. सिनेमाचं 70 टक्के चित्रिकरण पूर्ण झालं आहे. आता उर्वरित चित्रिकरण कोरोनाच्या दुसऱ्या लाटेमुळे थांबलं होतं. पण आता या चित्रपटाच्या गोटात हालचाली वाढल्या आहेत. जूनच्या पहिल्या आठवड्यात या चित्रपटाच्या चित्रिकरणाला सुरूवात होण्याचे संकेत मिळू लागले आहेत. 

बॉलिवूडमधल्या एका नामांकित वेबसाईटनेही या वृत्ताला दुजोरा दिला आहे. कोरोनाची दुसरी लाट आली आणि पु्न्हा एकदा चित्रिकरण थांबवावं लागलं. आता महाराष्ट्रातला कोरोनाचा आकडा कमी येऊ लागला आहे. दुसरीकडे मनसे नेते राज ठाकरे यांनीही मुख्यमंत्र्यांना चित्रिकरण चालू करण्यासंदर्भत आग्रह धरला आहे. असं असताना मुख्यमंत्री चित्रिकरण चालू व्हावं यासाठी अनुकूल आहेत. त्याचवेळी फेडरेशन ऑफ वेस्टर्न इंडिया सिने एप्लॉइज अर्था फॉइसनेही मुख्यमंत्र्यांकडे चित्रिकरणाला परवानगी देण्याबद्दल निवेदन दिलं आहे. यात चित्रिकरण जूनच्या पहिल्या आठवड्यापासून सुरू करण्याची विनंती करण्यात आली आहे. 

या घडामोडी घडत असतानाच पठाण चित्रपटाचं चित्रिकरण पुन्हा एकदा सुरू करण्याच्या हालचाली वेग पकडू लागल्या आहेत. दीपिका पडुकोणही बेंगळूरुमधून मुंबईत दाखल झाली आहे. इंडस्ट्रीत सुरू असलेल्या चर्चेनुसार येत्या चार जूनपासून अंधेरीतल्या यशराज स्टुडिओमध्ये या चित्रपटाचं काही चित्रिकरण करण्यात येणार आहे. सध्या उरलेल्या 30 टक्के चित्रिकरणापैकी बहुतांश चित्रिकरण याच स्टुडिओत करण्याबद्दल हालचाली सुरू आहेत. 

विशेष बाब अशी की पठाण या चित्रपटात सलमान खानही असणार आहे. यात तो पाहुणा भूमिकेत असून, तो या सिनेमात हेलिकॉप्टरमधून एंट्री घेणार आहे. यात तो टायगर याच भूमिकेत असणार आहे. याबद्दल अधिकृत कुणीच दुजोरा देत नसलं तरी पठाण चित्रपटाच्या क्रूमध्ये याबद्दल चर्चा सुरू आहे. या सिनेमाच्या सर्व टीमची चाचपणी सुरू झाली असून, आरटीपीसीआर, लसीकरण या गोष्टींची आता प्राधान्याने काळजी घेण्यत येणार असल्याचं कळतं. 

या सर्व गोष्टी फलद्रुप झाल्या तर गेल्या दीड-दोन महिन्यांपासून बंद असलेलं शूटिंग जूनच्या पहिल्या आठवड्यापासून सुरू होण्याचे संकेत इंडस्ट्रीच्या पथ्यावर पडणारे आहेत.