Raju Srivastava Health Update : ‘आता एखाद्या चमत्काराचीच अपेक्षा’, सुनील पाल यांनी दिली राजू श्रीवास्तव यांच्या प्रकृतीची माहिती
Raju Srivastava Health Update : कॉमेडियन राजू श्रीवास्तव (Raju Srivastava) यांची प्रकृती अधिकच बिघडत चालल्याची माहिती समोर येत आहे.
Raju Srivastava Health Update : कॉमेडियन राजू श्रीवास्तव (Raju Srivastava) यांची प्रकृती अधिकच बिघडत चालल्याची माहिती समोर येत आहे. हृदयविकाराचा तीव्र झटका येऊन आता एका आठवड्याहून अधिक काळ लोटला असून, राजू श्रीवास्तव यांना अजूनही शुद्ध आलेली नाही. त्यांच्यावर दिल्लीतील एम्स रूग्णालयामध्ये उपचार सुरू असून, काल रात्रीपासून त्यांची प्रकृती अधिक खालावली आहे. त्यांचा रक्तदाबही सातत्याने घसरत आहे. त्यांचा जवळचा मित्र आणि कॉमेडियन सुनील पाल (Sunil Pal) याने राजू यांच्या मेंदूने काम करणे बंद केल्याच्या माहितीची पुष्टी केली आहे.
सध्या सर्वांच्या नजरा राजू श्रीवास्तव यांच्या प्रकृतीकडे लागल्या आहेत. राजू श्रीवास्तव लवकर बरे होऊन घरी परतावे, अशी प्रार्थना सर्वजण करत आहेत. मात्र, कॉमेडियनची अवस्था पाहून सगळेच चाहते चिंतेत पडले आहेत. राजू श्रीवास्तव यांना शुद्धीवर आणण्यासाठी डॉक्टरांची टीम सर्वतोपरी प्रयत्न करत आहे. आता कोलकाता येथून विशेष डॉक्टरांना पाचारण करण्यात आले आहे. ई-टाईम्सच्या बातमीनुसार, डॉ.पद्म श्रीवास्तव यांना कोलकाताहून दिल्लीला बोलावले गेले आहे.
सुनील पाल यांनी दिली हेल्थ अपडेट
नुकताच सुनील पाल यांनी त्यांच्या सोशल मीडिया अकाऊंटवर एक व्हिडीओ शेअर केला होता. या व्हिडीओमध्ये सुनील पाल खूप भावूक झालेले दिसत आहेत आणि त्यांनी चाहत्यांना राजू श्रीवास्तव यांच्यासाठी प्रार्थना करण्यास सांगितले आहे. माध्यमांशी बोलताना त्यांनी म्हटले की, राजू श्रीवास्तव यांच्या मेंदूने काम करणे बंद केले आहे आणि ते कोणतीही प्रतिक्रिया देत नाहीयत. सुनील पाल यांनी सांगितले की, डॉक्टरांनाही आता पुढे काय करावे, हे समजत नाहीय.
सुनील पाल म्हणाले की, राजू श्रीवास्तव फक्त श्वास घेत आहेत, बाकीचे शरीर अजिबात काम करत नाहीय. केवळ त्याचे चाहतेच नाही, तर अनेक सेलिब्रिटीही राजू श्रीवास्तव यांच्यासाठी प्रार्थना करत आहेत. अशोक पंडित, शेखर सुमन आदींनीही सोशल मीडियावर राजू श्रीवास्तव यांच्यासाठी पोस्ट करून त्यांच्या तब्येतीत सुधारणा होण्यासाठी प्रार्थना करण्याची विनंती केली आहे.
नेमकं काय घडलं?
जिममध्ये व्यायाम करत असताना राजू श्रीवास्तव यांची प्रकृती खालावली होती. राजू श्रीवास्तव जिममध्ये कसरत करत होते, तिथे ट्रेडमिलवर धावत असताना त्यांना छातीत दुखू लागले. त्यावेळी त्यांना तत्काळ रुग्णालयात नेण्यात आले. तेव्हापासून राजू श्रीवास्तव बेशुद्ध असून, अद्याप त्यांना शुद्ध आलेले नाही. कॉमेडियनची प्रकृती चिंताजनक असून, सध्या ते व्हेंटिलेटरवर आहेत. दरम्यान राजू यांची अँजिओग्राफी देखील करण्यात आली होती. त्यामध्ये त्यांच्या हृदयात 100% ब्लॉकेज असल्याचे आढळले होते. राजू श्रीवास्तव लवकर बरे व्हावेत, यासाठी देशभरातील चाहते प्रार्थना करत आहेत.
वाचा इतर बातम्या :
महत्त्वाच्या बातम्या
