Covid Negative : नीलम कोठारी आणि भावना पांडेची कोरोना टेस्ट निगेटिव्ह

Covid Negative : अभिनेत्री नीलम कोठारी आणि भावना पांडेची कोरोना टेस्ट निगेटिव्ह आली आहे.

bollywood

Covid Negative : अभिनेत्री करीना कपूर  (Kareena kapoor) आणि अमृता अरोरा यांना कोरोनाची (coronavirus) लागण झाली आहे. या अभिनेत्रींनी कोरोना नियमांचं पालन न करता अनेक पार्ट्यांमध्ये हजेरी लावली होती. त्यामुळे या अभिनेत्रींना कोरोनाची लागण झाल्याचं सांगितलं जातंय. दोन्ही अभिनेत्रींच्या संपर्कातील सर्वांना आरटीपीसीआर चाचणी करण्याचे आदेश मुंबई महानगरपालिकेनं दिले आहेत. त्यानुसार अभिनेत्री नीलम कोठारी आणि भावना पांडेची कोरोना टेस्ट करण्यात आली असून दोघांची कोरोना टेस्ट निगेटिव्ह आली आहे. 

सीमा खान आणि महीप कपूरलादेखील कोरोनाची लागण झाली आहे. सीमा आणि महीप या दोघींनी करण जोहरच्या पार्टीला हजेरी लावली होती. या पार्टीमध्ये नीलम आणि भावना उपस्थित नसल्या तरी एकत्र शूटिंग केल्यामुळे नीलम आणि भावनाची कोरोना टेस्ट करण्यात आली होती. पण त्यांचा रिपोर्ट निगेटिव्ह आला आहे. 

कसा झाला अभिनेत्री करीना कपूरला कोरोना?
बॉलिवूड पार्ट्यांमुळे करीना कपूर आणि अमृता अरोरा या दोन अभिनेत्रींना कोरोनाचा संसर्ग झाला आहे असे बोलले जात होते. त्यातच आता करीनाच्या प्रवक्त्याने याबाबत अधिकृत माहिती दिली आहे. "संपूर्ण लॉकडाऊन दरम्यान करीना खबरदारी घेत होती. घरातून बाहेर पडताना ती अत्यंत काळजी घ्यायची. परंतु, दुर्देवाने ती आपली जवळची मैत्रिण अमृता अरोरासोबत एका डिनर पार्टीमध्ये सहभागी झाली होती. त्यामुळे करीनाला कोरोना झाला. या डिनर पार्टीत काही निवडक मित्रांचादेखील सहभाग होता. विशेष म्हणजे बाहेर जशा चर्चा सुरू आहेत तशी ही पार्टी खूप मोठी नव्हती. या पार्टीत एक आजारी व्यक्ती सहभागी झाली होती आणि त्याला सतत खोकला येत होता. त्याच्यापासूनच करीना आणि अमृताला कोरोनाची लागण झाली आहे. संबंधीत व्यक्तीने जबाबदारीचे भान राखून या पार्टीत सहभागी व्हायला नको होते." असे मत करीनाच्या प्रवक्त्याने व्यक्त केले आहे. 

दरम्यान, उल्लेखनीय बाब म्हणजे करीना कपूरच्या प्रवक्त्याने डिनर पार्टीत सहभागी झालेल्या त्या आजारी व्यक्तीचे नाव सांगितले नाही.  शिवाय त्या डिनर पार्टीत कोण-कोण सहभागी होते याची अधिकृत माहितीही प्रवक्त्याने दिली नाही. करीना कपूर आणि अमृता अरोरा यांनी हजेरी लावलेली डिनर पार्टी करण जोहरच्या घरी झाली होती. या पार्टीला अभिनेत्री आलिया भट्टसह इतर अनेक लोक उपस्थित होते. अभिनेत्री करिष्मा कपूर, मलायका अरोरा, आलिया भट यांचा कोरोना चाचणी अहवाल आज येण्याची शक्यता आहे. 

मुंबई महापालिकेकडून करीना कपूरची इमारत सील
अभिनेत्री करीना कपूर राहात असलेली सद्गुरु शरण बिल्डिंग करीना कपूर पॉझिटीव्ह आल्यानंतर सील करण्यात आली आहे. दिग्दर्शक करण जोहर राहत असलेली इमातरदेखील सील करण्यात आली आहे. 

संबंधित बातम्या 

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha