नथुरामवरील चित्रपटाचा वाद; अमोल कोल्हे आज शरद पवारांची भेट घेण्याची शक्यता
जितेंद्र आव्हाड यांनी Why I Killed Gandhi या चित्रपटाचा निषेध केला आहे.
Amol Kolhe : राष्ट्रवादी काँग्रेसचे नेते, खासदार अमोल कोल्हे (Amol Kolhe) हे सध्या Why I Killed Gandhi या चित्रपटामुळे चर्चेत आहेत. हा चित्रपट 2017 साली प्रदर्शित झाला होता मात्र आता हा चित्रपट लाईमलाईट या ओटीटी प्लॅटफॉर्मवर प्रदर्शित होणार आहे. या चित्रपटात अमोल कोल्हे यांनी नथुराम गोडसे यांची भूमिका साकरली आहे. या चित्रपटाचा मंत्री जितेंद्र आव्हाड यांनी निषेध व्यक्त केला. अमोल कोल्हे हे आज राष्ट्रवादी पक्षाचे अध्यक्ष शरद पवार (Sharad Pawar) यांची भेट घेणार असल्याचं म्हणलं जात आहे.
जितेंद्र आव्हाड यांनी WHY I KILLED GANDHI या चित्रपटाचा निषेध केला. ते म्हणाले होते, 'कोल्हेंनी केलेली कृती कलाकार म्हणून जरी असेल तरीही गोडसेचं समर्थन आलंच. कलाकाराचा वेश घेऊन गांधी हत्येचं समर्थन करु शकत नाही.'
अमोल कोल्हे नेमकं काय म्हणाले?
2017 मध्ये या सिनेमाचं चित्रीकरण झालं, जेव्हा मी सक्रीय राजकारणात नव्हतो, किंवा मतदारसंघाचं प्रतिनिधित्व करत नव्हतो. दुसरी गोष्ट म्हणजे एखादी भूमिका करतो म्हणजे त्याच्या विचारधारेशी 100 टक्के सहमत असतो असंच नाही. काही भूमिकांशी आपण सहमत असतो, तर काहींशी आपण विचारधारेंशी सहमत नसतानाही भूमिका करतो. मुळात माझ्या व्यक्तीगत आणि सार्वजनिक आयुष्यात नधुराम गोडसेंच्या उदात्तीकरणासंदर्भात किंवा गांधी हत्येच्या समर्थनार्थ भूमिका कधीही घेतली नाही.त्यामुळे केवळ एक कलाकार म्हणून भूमिका वटवणं आणि त्याचा राजकीय विचारांशी संबंध जोडला जाणं मला वाटतं या दोन विभिन्न गोष्टी आहेत. कलाकार म्हणून अभिव्यक्ती स्वातंत्र्य आहे. एखाद्याला एक गोष्ट मांडायची आहे, आणि कलाकार म्हणून ते माझ्याकडे आले आणि मी ती भूमिका केली. इतकी साधी ती गोष्ट आहे. त्या विचारधारेचा जेव्हा मी प्रचार करतो, तेव्हा माझी विचारधारा काय आहे ती वेगळी गोष्ट आहे. मला वाटतं व्यक्ती म्हणून मला वैचारिक स्वातंत्र्य आहे आणि अभिव्यक्ती स्वातंत्र्य आहे. या दोन्हीचा आदर मी करतो.
संबंधित बातम्या
महत्त्वाच्या बातम्या
