West Bengal : भाजपची पश्चिम बंगाल विधानसभा निवडणुकीसाठी पहिली यादी जाहीर, ममता बॅनर्जींविरोधात उमेदवार ठरला
West Bengal BJP Candidates 2026 List: पश्चिम बंगाल विधानसभा निवडणुकीसाठी भाजपनं पहिली यादी जाहीर केली आहे
कोलकाता : पश्चिम बंगाल विधानसभा निवडणुकीसाठी भाजपनं पहिली यादी जाहीर केली आहे. भाजपनं पहिल्या यादीत 144 उमेदवारांची नावांचा समावेश केला आहे.भाजपनं विधानसभा विरोधी पक्षनेते शुभेंदू अधिकारी आणि दिलीप घोष यांच्या नावाचा पहिल्या यादीत समावेश केला आहे. शुभेंदू अधिकारी यांना नंदीग्राम आणि भवानीपूर विधानसभा मतदारसंघातून भाजपनं उमेदवारी दिली आहे. ममता बॅनर्जी भवानीपूर विधानसभा मतदारसंघातून पोटनिवडणुकीत विजयी झाल्या होत्या.
2021 च्या विधानसभा निवडणुकीत नंदीग्राम विधानसभा मतदारसंघातून शुभेंदू अधिकारी यांनी मुख्यमंत्री ममता बॅनर्जी यांचा 2000 मतांनी पराभव केला होता. मतमोजणीच्या 17 फेऱ्यानंतर शुभेंदू अधिकारी विजयी झाले होते. ममता बॅनर्जींनी त्यावेळी भाजपवर निवडणुकीत गैरप्रकार केल्याचा आरोप केला होता. ममता बॅनर्जी भवानीपूर मतदारसंघातून पोटनिवडणुकीत विजयी झाल्या होत्या. यावेळी भाजपनं पुन्हा एकदा ममता बॅनर्जींच्या मतदारसंघात शुभेंदू अधिकारी यांना उमेदवारी दिली आहे.
भाजपनं दिलीप कुमार घोष यांना बोलपूर मतदारसंघातून, आसनसोल दक्षिणमधून अग्निमित्र पॉल, खडगपूर सदर येथून दिली घोष, माजी राज्यसभा खासदार स्वपन दास गुप्ता यांना राश बेहारी मतदारसंघातून उमेदवारी दिली आहे. भाजपनं डायमंड हार्बरमधून दीपक कुमार हलदर, आसनसोल उत्तरमधून कृष्णेंदू मुखर्जी, कालीगंजमधून बापन घोष, कूचबिहार उत्तर मधून सुकुमार रॉय, सिलिगुडीतून शंकर घोष आणि हासनमधून निखिल बॅनर्जींना उमेदवारी दिली आहे.
भाजपचे आयटी सेलचे अध्यक्ष अमित मालवीय यांनी एक्सवर पोस्ट करत भाजपनं पश्चिम बंगाल विधानसभा निवडणुकीसाठी पहिली यादी जाहीर केल्याचं म्हटलं. सुवेंदू अधिकारी हे नंदीग्राममधून लढतील, 2021 मध्ये अधिकारी यांनी ममता बॅनर्जींचा पराभव केला होता. अधिकारी आता भवानीपूरमधून देखील लढणार आहेत, जिथं ममता बॅनर्जी आमदार आहेत, एक जोरदार लढत होईल, असं मालवीय म्हणाले.
पश्चिम बंगालमध्ये दोन टप्प्यात निवडणूक
निवडणूक आयोगानं रविवारी पश्चिम बंगाल विधानसभा निवडणुकीची घोषणा केली. पश्चिम बंगाल विधानसभेच्या 294 जागांसाठी दोन टप्प्यात मतदान होणार आहे. पहिल्या टप्प्यात 23 एप्रिलला मतदान होईल. तर, दुसऱ्या टप्प्यात 29 एप्रिलला मतदान होणार आहे. मतमोजणी 4 मे रोजी होणार आहे. गेल्या निवडणुकीत टीएमसीनं 215 तर भाजपनं 77 जागांवर विजय मिळवला होता.
महत्त्वाच्या बातम्या
