Tasgaon Vidhan Sabha constituency : रोहित पाटलांचा राजकारणाचा श्रीगणेशा! तासगावमधून विजय, भाजपचे संजयकाका पाटील पराभूत
Tasgaon Kavathe Mahankal Assembly Constituency : राष्ट्रवादी शरद पवार गटाच्या रोहित पाटील यांच्यासमोर भाजपमधून अजित पवार गटात गेलेल्या संजयकाका पाटील यांचे आव्हान होतं.
सांगली : राज्याचं लक्ष लागून असलेल्या तासगाव विधानसभा मतदारसंघात राष्ट्रवादी शरद पवार गटाच्या रोहित पाटील यांनी बाजी मारली. तासगाव कवठे महांकाळमधून राष्ट्रवादी शरद पवार गटाच्या रोहित पाटलांनी 26,577 मतांनी विजय मिळवला आहे. रोहित पाटील यांना 1,26,478 मतं मिळाली तर भाजपचे उमेदवार संजयकाका पाटील यांना 99,901 मतं मिळाली.
राष्ट्रवादीचे दिवंगत नेते आर आर पाटील यांचे चिरंजीव रोहित पाटील यांनी शरद पवार गटाकडून पहिल्यांदाच निवडणूक लढवली. त्यांच्या विरोधात अजित पवारांनी भाजपच्या संजयकाका पाटील यांना पक्षात घेऊन तिकिट दिलं. रोहित पाटील यांच्या राजकारणाचा श्रीगणेशा करणारी आणि लोकसभेत पराभूत झालेल्या भाजपचे माजी खासदार संजयकाका पाटील यांच्या राजकारणाची अस्तित्वाची ही लढाई होती. त्यामध्ये रोहित पाटलांनी बाजी मारली.
शरद पवारांनी उमेदवारी जाहीर केली
आर आर पाटील यांच्या निधनानंतर त्यांच्या पत्नी सुमनताई पाटील या दोन वेळा आमदार राहिल्या. त्यांच्या मुलाने म्हणजे रोहित पाटलांनी वयाची पंचविशी पूर्ण केल्यानंतर आमदारकीची तयारी सुरू केली. स्वतः शरद पवारांनी त्यांची उमेदवारी जाहीर करून त्यांना पाठबळ कसे मिळेल यासाठी लक्ष घातलं. तर दुसरीकडे कवठेमहांकाळचे नेते अजितराव घोरपडे यांनी संजयकाकाना पाठिंबा दिला होता.
सर्वसामान्य कुटुंबातून आलेल्या आर आर पाटलांनी झेडपी ते आमदार आणि नंतर मंत्री अशी झेप घेतली. त्यांचाच वारसा आता रोहित पाटील चालवत असून त्यांचीही नाळ सर्वसामान्यांसोबत जुळल्याचं दिसून येतंय. तर दुसरीकडे आर आर पाटील यांचे पारंपरिक विरोधक संजयकाका पाटील हे दोन वेळा खासदार राहिले आहेत. त्यांच्यामागे भाजपची ताकद, अजित पवारांच्या राष्ट्रवादीची ताकद उभी होती.
तासगावातील महत्त्वाचे प्रश्न
दुष्काळी समजल्या जाणाऱ्या तासगाव मतदारसंघामध्ये म्हैशाळ टेंभू पाणी योजना ही महत्त्वाची योजना आहे. आता त्यावरून श्रेयवाद सुरू असल्याचं दिसून येतंय. तर द्राक्षे उत्पादक शेतकरी आणि त्यांचे प्रश्नही या मतदारसंघामध्ये महत्त्वाचे ठरण्याची शक्यता आहे.
सांगलीतील इतर भागांची तुलना करता विकासाच्या बाबतीत तासगाव काहीसा मागे पडल्याचं दिसतंय. या ठिकाणी मोठ्या उद्योगांचा अभाव आहे. कागदोपत्री तासगावमध्ये एमआयडीसी मंजूर झाली आहे. रोहित पाटलांच्या प्रयत्नामुळे एमआयडीसी तर मंजूर झाली. पण त्यासाठी निधीच दिला नसल्याने त्याची अंमलबजावणी होऊ शकली नाही.
ही बातमी वाचा :
महत्त्वाच्या बातम्या
ट्रेंडिंग न्यूज
