Andheri Bypoll Result :मशाल भडकली, भगवा फडकला; लटकेंच्या विजयानंतर उद्धव ठाकरेंची पहिली प्रतिक्रिया

Andheri East bypoll 2022 : अंधेरी पोटनिवडणुकीत शिवसेना ठाकरे गटाच्या उमेदवार ऋतुजा लटके यांनी विजय मिळवला. या विजयानंतर मशाल भडकली, भगवा फडकला अशी प्रतिक्रिया उद्धव ठाकरे यांनी दिली आहे.

Rutuja Latke And Uddhav thackeray

Andheri East bypoll 2022 : मशाल भडकली, भगवा फडकला अशी प्रतिक्रिया ऋतुजा लटके यांच्या विजयानंतर उद्धव ठाकरे यांनी दिली आहे. अंधेरी पोटनिवडणुकीत शिवसेना ठाकरे गटाच्या उमेदवार ऋतुजा लटके यांनी विजय मिळवला. त्यानंतर उद्धव ठाकरे आणि ऋतुजा लटके यांनी पत्रकार परिषद घेतली. यावेळी उद्धव ठाकरे बोलत होते.    

"जनता आमच्यासोबत आहे हे आजच्या निकालाने स्पष्ट केलं. ही आता सुरूवात झाली आहे. लढाईची सुरूवातच विजयाने झाली आहे. या पुढेचे देखील सर्व विजय मिळवेन. आमचं नाव आणि चिन्ह गोठवलं. परंतु, ज्या निवडणुकीसाठी चिन्ह गोठवलं ती निवडणूकच विरोधकांनी लढवली नाही. चिन्ह कुठलं पण असो जनता आमच्यासोबत आहे. पराभवाचा अंदाज आल्याने त्यांनी माघार घेतली. शिवाय नोटाला जी मतं पडली तीच मतं विरोधकांना पडली असती, असा टोला उद्धव ठाकरे यांनी यावेळी भाजपसह शिंदे गटाला लगावला.  

उद्धव ठाकरे यांनी यावेळी भाजपसह पंतप्रधान नरेंद्र मोदींवर देखील टीका केली. "जमिनीवरचे प्रकल्प गुरजरातला गेले आणि हवेतले प्रक्लप महाराष्ट्रात आले. परंतु, आता गुजरातची निवडणूक जाहीर झाल्यानंतर पंतप्रधान नरेंद्र मोदी यांचं महाराष्ट्र प्रेम उफाळून आलं आणि त्यांनी महाराष्ट्रासाठी काही हवेतील प्रक्लप देण्याची घोषणा केली, असा टोला उद्धव ठाकरे यांनी लगावला.   

अंधेरी पूर्व येथील आमदार रमेश लटके यांच्या निधनाने ही पोटनिवडणूक झाली. शिवसेना ठाकरे गट आणि महाविकास आघाडीकडून रमेश लटके यांच्या पत्नी ऋतुजा लटके यांना उमेदवारी जाहीर करण्यात आली. या पोटनिवडणुकीत अनेक नाट्यमय घडामोडी घडल्या. भाजपने या निवडणुकीसाठी मुरजी पटेल यांची उमेदवारी जाहीर केली होती. मात्र, ऐनवेळी भाजपने उमेदवार माघारी घेतला. परंतु, काही अपक्षांनी अर्ज कायम ठेवल्याने 3 नोव्हेंबर रोजी ही निवडणूक झाली. त्यानंतर आज मतमोजनी जाली. यात ऋतुजा लटके यांनी जवळपास 53471  मतांनी विजय मिळवला आहे. 

निवडणूक आयोगाकडून मिळालेल्या माहितीनुसार, अंधेरी पोट निवडणुकीसाठी 86570 मतदान झाले. यातील ऋतुजा लटके यांना 66530 मते मिळाली.  दोन नंबरचे अपक्ष उमेदवार राजेश त्रिपाठी यांना अवघी 1571 मते मिळाली. विशेष म्हणजे या निवडणुकीती मोठ्या संख्येने लोकांनी NOTA बटण दाबले आहे. निवडणूक आयोगाकडून मिळालेल्या आकडेवारीनुसार, NOTA ला 12,806 मते मिळाली आहेत.  

महत्वाच्या बातम्या