Andheri Bypoll Result: भाजपला टोला लगावत ऋतुजा लटके यांची पहिली प्रतिक्रिया, हा विजय म्हणजे...
Andheri Bypoll Result: अंधेरी पूर्व पोटनिवडणुकीतील विजयानंतर शिवसेना ठाकरे गटाच्या उमेदवार ऋतुजा लटके यांनी हा विजय दिवगंत आमदार रमेश लटके यांच्या विकासकामांचा विजय असल्याचे म्हटले.
Andheri Bypoll Result: अंधेरी पूर्व विधानसभा पोटनिवडणुकीत (Andheri Bypoll Result) विजय झाल्यानंतर शिवसेना ठाकरे गटाच्या उमेदवार ऋतुजा लटके (Rutuja Latke ) यांनी आपली पहिली प्रतिक्रिया व्यक्त केली. हा विजय माझे दिवगंत पती रमेश लटके (Ramesh Latke) यांचा विजय असल्याचे त्यांनी सांगितले. नोटाच्या मतदानाबाबत मतदारांकडून माध्यमांनी उत्तर शोधली पाहिजे असे त्यांनी म्हटले. भाजपला या निवडणूक निकालाचा अंदाज होता. त्यामुळे त्यांनी माघार घेतली असेही लटके यांनी म्हटले.
अंधेरी पूर्व येथील आमदार रमेश लटके यांच्या निधनाने ही पोटनिवडणूक झाली. शिवसेना ठाकरे गट आणि महाविकास आघाडीकडून रमेश लटके यांच्या पत्नी ऋतुजा लटके यांना उमेदवारी जाहीर करण्यात आली. या पोटनिवडणुकीत अनेक नाट्यमय घडामोडी घडल्या. भाजपने या निवडणुकीसाठी मुरजी पटेल यांची उमेदवारी जाहीर केली होती. मात्र, ऐनवेळी भाजपने उमेदवार माघारी घेतला. निवडणुकीत अभेद्य विजयी आघाडी घेतल्यानंतर ऋतुजा लटके यांनी माध्यमांशी संवाद साधला. यावेळी त्यांनी म्हटले की, हा विजय माझे दिवगंत पती रमेश लटके यांचा आहे. त्यांनी केलेल्या कामांच्या पुण्याईवर मतदारानी मतदान केले. मतदारांनी त्यांनी केलेल्या कामाच्या आधारे मते दिली असल्याचे लटके यांनी सांगितले. शिवसेना पक्षप्रमुख उद्धव ठाकरे यांच्या भेटीसाठी मातोश्रीवर जाणार असल्याचे त्यांनी सांगितले. मी महाविकास आघाडीची उमेदवार आहे. महाविकास आघाडीतील प्रत्येक कार्यकर्त्यांनी, पदाधिकाऱ्यांनी सहकार्य केले. त्यासाठी त्यांचे आभार मानत असल्याचे ऋतुजा लटके यांनी सांगितले.
...म्हणून भाजपने माघार घेतली
पोटनिवडणुकीत कमी झालेल्या मतदानाबाबत ऋतुजा लटके यांनी सांगितले की, पोटनिवडणुकीत मतदान हे कमी प्रमाणात होत असते. यात आम्हाला चांगलं मतदान झालं आहे. मतदान गुरुवारी झाले होते. हा कामकाजाचा दिवस असल्याने अनेकांना मतदान करणे शक्य झाले नसल्याकडे त्यांनी लक्ष वेधले. लटके यांनी भाजपवरही निशाणा साधला. भाजपला सहानुभूती असती तर त्यांनी फॉर्म भरलाच नसता असेही लटके यांनी म्हटले. नोटाला जे मतदान झालं आहे ते भाजपचेच असून त्यांनी निवडणुकीचा कौल लक्षात आल्यानेच त्यांनी माघार घेतली असे लटके यांनी सांगितले.
नोटाला अधिक मते का?
या पोटनिवडणुकीत नोटाला दुसऱ्या क्रमांकाची मते मिळाली. याबाबत विचारले असता, लटके यांनी सांगितले की, नोटाचा वापर करण्याचे आवाहन करणाऱ्या व्हिडिओ क्लिप समोर आल्या होत्या. नोटा हा निवडणुकीत महत्त्वाचा आहे. नोटाचा वापर हा जबाबदारीने करायचा असतो. माध्यमांनी लोकांना याबाबत विचारणा करायला हवी असे लटके यांनी म्हटले.
Rutuja Latke Full PC : ऋतुजा लटके यांची पहिली पत्रकार परिषद, भाजपवर केला थेट हल्लाबोल ABP Majha
महत्त्वाच्या बातम्या
ट्रेंडिंग न्यूज
