एक्स्प्लोर

Sangli : मुख्यमंत्र्यांचं नाव घेत आव्हान दिलं, आता सर्व जागा जिंकत भाजपचा धुव्वा उडवला, खानापुरात शिंदेंच्या आमदाराची कमाल

Khanapur ZP Election Result : खानापूर तालुक्यात भाजपला जिल्हा परिषद आणि पंचायत समितीची एकही जागा जिंकला आली नाही. या ठिकाणी शिंदेंच्या शिवसेनेने एकतर्फी बाजी मारल्याचं दिसून आलं.

Written By : कुलदीप माने, एबीपी माझा | Edited By: अभिजीत जाधव | Updated at : 09 Feb 2026 04:36 PM (IST)

sangli khanapur zp suhas babar shivsena won all seats white wash to bjp zilla parishad panchayat samiti elections marathi Sangli : मुख्यमंत्र्यांचं नाव घेत आव्हान दिलं, आता सर्व जागा जिंकत भाजपचा धुव्वा उडवला, खानापुरात शिंदेंच्या आमदाराची कमाल

Khanapur ZP Election Result

Source : abp majha

सांगली : 'मुख्यमंत्र्यांना जाऊन विचार, मी कोण आहे. माझ्यासारखे 242 आमदार आहेत म्हणून तुझा मुख्यमंत्री बसला आहे' अशा शब्दात भाजपला आव्हान देणारे शिवसेनेचे आमदार सुहास बाबर (Suhas Babar) यांनी त्यांचा गड राखला आहे. सुहास बाबर यांच्या नेतृत्वाखाली शिवसेनेने भाजपचा सुपडासाफ केल्याचं दिसून आलं. खानापुरातल्या जिल्हा परिषदेच्या चारही जागा आणि पंचायत समितीच्या आठही जागा शिवसेनेने जिंकल्या असून भाजपला भोपळाही फोडता आला नाही.

सांगली जिल्ह्यातील खानापूर तालुक्यातील जिल्हा परिषद आणि पंचायत समितीच्या निकालाकडे सर्वांचं लक्ष लागलं होतं. त्यामध्ये शिंदेंच्या शिवसेनेच्या सुहास बाबरांनी त्यांचा करिश्मा कायम ठेवला. जिल्हा परिषदेच्या 4 आणि पंचायत समितीच्या 8 ही जागांवर शिवसेना शिंदे गटाचे उमेदवार विजयी झाले.

Khanapur ZP Election Result : शिवसेनेचा जल्लोष

नागेवाडी जिल्हा परिषद गटातून आमदार सुहास बाबर यांच्या वहिनी, शिवसेनेच्या उमेदवार डॉ. शीतल बाबर या विजयी झाल्या. खानापूर तालुक्यात शिवसेनेला भरघोस यश मिळाल्यानंतर आमदार सुहास बाबरांनी शड्डू ठोकला. त्याचसोबत शिवसेनेच्या कार्यकर्त्यांनीही एकच जल्लोष केला.

निवडणुकीच्या प्रचारावेळी, आमदार सुहास बाबर आणि भाजपच्या स्थानिक नेत्यांमध्ये शाब्दिक युद्ध रंगलं होतं. त्यावेळी सुहास बाबर यांनी मुख्यमंत्री देवेंद्र फडणवीसांचं नाव घेत भाजपच्या नेत्यांना इशारा दिला होता. खानापुरात दोन्ही राष्ट्रवादी, दोन्ही शिवसेना आणि काँग्रेस आपणच चालवतो असं सांगत सुहास बाबर यांनी भाजपच्या नेत्यांना दमही दिला होता. आता निवडणुकीच्या निकालामध्येही सुहास बाबर हेच वरचढ असल्याचं दिसून आलं.