शरद कोळींच्या विरोधात महिला काँग्रेस कार्यकर्त्या आक्रमक, बांगड्या आणि चपला दाखवत केला निषेध, महिलांना पोलिसांनी घेतलं ताब्यात
शिवसेना ठाकरे गटाचे उपनेते शरद कोळी (Sharad koli) यांच्या विरोधात काँग्रेसच्या महिला कार्यकर्त्या आक्रमक झाल्या आहेत. महिलांनी बांगड्या आणि चपला दाखवायत शरद कोळींचा निषेध केलाय.
Solapur women Congress workers Protest against Sharad koli : शिवसेना ठाकरे गटाचे उपनेते शरद कोळी (Sharad koli) यांच्या विरोधात काँग्रेसच्या महिला कार्यकर्त्या ( women Congress workers) आक्रमक झाल्या आहेत. महिला कार्यकर्त्यांकडून शरद कोळी यांचा पुतळा दहन करण्याचा प्रयत्न करण्यात आला. मात्र, यावेळी पोलिसांनी आधीच मोठा बंदोबस्त शरद कोळी यांच्या ऑफिससमोर केला होता. यावेळी महिला कार्यकर्त्यांनी बांगड्या आणि चपला दाखवायत शरद कोळींचा निषेध केला आहे.
सोलापूर दक्षिण विधानसभा मतदारसंघाच्या जागेवरून महाविकास आघाडीत वाद पेटला आहे. उपनेते शरद कोळी यांनी खासदार प्रणिती शिंदे आणि माजी केंद्रीय गृहमंत्री सुशीलकुमार शिंदे यांच्या प्रतिमेला जोडे मारो आंदोलन केले होते. तसेच खासदार प्रणिती शिंदे यांच्या विरोधात खालच्या भाषेत टीका केल्याबद्दल काँग्रेस महिला आक्रमक झाल्या आहेत.
काँग्रेस महिला कार्यकर्त्यांना पोलिसांनी घेतलं ताब्यात
दरम्यान, शिवसेना ठाकरे गटाचे उपनेते शरद कोळी यांच्या कार्यालयासमोर आंदोलन करणाऱ्या काँग्रेस महिला कार्यकर्त्यांना पोलिसांनी ताब्यात घेतलं आहे. शिवसेनेचे उपनेते शरद कोळी यांनी खासदार प्रणिती शिंदे आणि सुशीलकुमार शिंदे यांच्या विरोधात टीका केल्याने काँग्रेस कार्यकर्ते आक्रमक झाले आहेत. यावेळी महिला कार्यकर्त्यांनी शरद कोळी यांच्या विरोधात घोषणाबाजी केली. सोलापुरातील सदर बाजार पोलिसांनी या सर्व महिलांना ताब्यात घेतलं आहे.
नेमकं प्रकरण काय?
महाविकास आघाडीमध्ये सोलापूर दक्षिण मतदारसंघामध्ये बिघाडी झाल्याचं पाहायला मिळालं. सोलापूर शहर दक्षिणची जागा महाविकास आघाडीत शिवसेना उद्धव बाळासाहेब ठाकरे पक्षाकडे गेलेली होती. शिवसेनेनं इथे अमर पाटील यांना उमेदवारी दिली होती. काँग्रेसचा या जागेवर दावा होता मात्र, त्यांना ही जागा मिळाली नव्हती. अखेरच्या दिवशी खासदार प्रणिती शिंदे आणि माजी केंद्रीय मंत्री सुशीलकुमार शिंदे यांनी अपक्ष उमेदवार धर्मराज काडादी यांना पाठिंबा जाहीर केला. या निर्णयानंतर शिवसैनिक आक्रमक झाले होते. मतदान पार पडल्यानंतर शिवसैनिकांनी प्रणिती शिंदे आणि सुशीलकुमार शिंदे यांच्या प्रतिमेला जोडे मारो आंदोलन केलं. लोकसभेवेळी प्रणिती शिंदे यांनी उद्धव ठाकरेंच्या सभेसाठी बूट चाटण्याचे काम केलं, अशी टीका शरद कोळी यांनी केली. उद्धव ठाकरे यांनी काँग्रेसवाल्यांना वेळीच ठेचून काढलं पाहिजे, अशी विनंती करत असल्याचं शरद कोळी म्हणाले.प्रणिती शिंदे तुम्हालाच काय, तुमच्या बापाला देखील आम्ही भीत नाही, आम्ही शिवसैनिक आहोत, असं शरद कोळी म्हणाले होते. शरद कोळी यांच्या या वक्तव्याविरोधत काँग्रेस महिला आणि कार्यकर्ते आक्रमक झाले आहेत.
महत्वाच्या बातम्या:
सुशीलकुमार शिंदे आणि प्रणिती शिंदेंनी पाठिंब्याचं आधीच सांगितलं होतं, पण जाहीर काल केलं, नेमकं काय म्हणाले धर्मराज काडादी
महत्त्वाच्या बातम्या
