India TV-CNX Opinion Poll : भाजपच्या जागा कमी होण्याचा तर काँग्रेसच्या जागा वाढण्याचा अंदाज, कोणत्या पक्षाला किती जागा?
India TV-CNX Opinion Poll नुसार देशात पुन्हा मोदींचंच सरकार येईल, परंतु भाजपच्या जागा कमी होऊ शकतात असा अंदाज वर्तवण्यात आला आहे. तर महाराष्ट्रात भाजपला 20 जागा मिळू शकतील, असं सर्वेक्षणातून समोर आलं आहे.
India TV-CNX Opinion Poll : 2024 च्या लोकसभा निवडणुकीच्या (Lok Sabha Election 2024) पार्श्वभूमीवर सर्वच पक्षांनी मोर्चेबांधणी सुरु केली आहे. विरोधकांनी इंडिया (INDIA) नावाची आघाडी स्थापन केली आहे. 2024 ची लोकसभा निवडणुकीत भाजपप्रणित NDA आणि विरोधकांची INDIA यांच्यात थेट लढत होणार आहे. दरम्यान आज निवडणूक झाली तर एनडीए आणि इंडियाला किती जागा मिळतील, याबाबत इंडिया टीव्ही आणि सीएनएक्सने (India TV-CNX Opinion Poll) जनमत चाचणी घेतली. या ओपिनियन पोलनुसार देशात पुन्हा मोदींचंच सरकार येईल, परंतु भाजपच्या जागा कमी होऊ शकतात असा अंदाज वर्तवण्यात आला आहे. तर महाराष्ट्रात भाजपला 20 जागा मिळू शकतील, असं सर्वेक्षणातून समोर आलं आहे.
भाजपच्या जागा कमी होण्याचा तर काँग्रेसच्या जागा वाढण्याचा अंदाज
महाराष्ट्रात भाजपने 'मिशन 45' ठेवलं आहे. परंतु इंडिया टीव्ही-सीएनएक्स ओपिनियन पोलच्या अंदाजानुसार भाजपला महाराष्ट्रात धक्का बसण्याची शक्यता आहे. 2024 च्या लोकसभा निवडणुकीत भाजपच्या तीन जागा कमी होतील. तर काँग्रेसच्या जागा वाढून नऊ पर्यंत जातील. सर्वेक्षणाच्या अंदाजानुसार, आज निवडणुका झाल्या तर महाराष्ट्रत भाजपला 20 जागा मिळू शकतात. याशिवाय मित्रपक्ष शिवसेना (शिंदे गट) आणि राष्ट्रवादी काँग्रेस (अजित पवार गट) यांना प्रत्येकी दोन जागा मिळण्याची शक्यता आहे.
महाराष्ट्रातील 48 पैकी किती जागा कोणत्या पक्षाला?
सध्या उद्धव ठाकरे यांच्या नेतृत्वाखालील ठाकरे गटाकडे 6 जागा आहेत, त्या 11 पर्यंत वाढू शकतात. देशात आता लोकसभा निवडणुका झाल्या तर इंडिया टीव्ही-सीएनएक्स ओपिनियन पोलनुसार, महाराष्ट्रातील 48 जागांपैकी भाजप 20, काँग्रेस 9, शिवसेना (शिंदे) 2, शिवसेना (ठाकरे गट) 11, राष्ट्रवादी काँग्रेस (अजित पवार गट) 2 आणि राष्ट्रवादी काँग्रेस (शरद पवार) 4 जागा मिळण्याची अपेक्षा आहे.
INDIA ला महाराष्ट्रात 45 तर NDA ला 44 टक्के मतं
विरोधकांची आघाडी INDIA ला महाराष्ट्रात 45 टक्के मतं मिळण्याचा अंदाज आहे. यामध्ये काँग्रेस आणि शिवसेना उद्धव बाळासाहेब ठाकरे पक्षाला प्रत्येकी 16 टक्के मतं मिळण्याचा अंदाज आहे. तर राष्ट्रवादी काँग्रेसला (शरद पवार गट) 13 टक्के मंत मिळून शकतात.
दुसरीकडे भाजपप्रणित एनडीला महाराष्ट्रात 44 टक्के मतं मिळू शकतात. त्यामध्ये भाजपला 32 टक्के मतं मिळतील. याशिवाय मित्रपक्ष शिवसेना (शिंदे गट) आणि राष्ट्रवादी काँग्रेस (अजित पवार गट) अनुक्रमे 7 आणि 5 टक्के मतं मिळू शकतात.
देशभरात किती जागा मिळण्याचा अंदाज?
इंडिया टीव्ही-सीएनएक्स ओपिनियन पोलच्या अंदाजानुसार लोकसभेच्या एकूण 543 जागांपैकी एनडीएला 318, इंडियाला 175 आणि इतरांना 50 जागा मिळू शकतात. 'इतर' मध्ये अनेक प्रादेशिक पक्ष आणि अपक्षांचा समावेश आहे. या ओपिनियन पोलनुसार, 2024 च्या निवडणुकीत देशात पुन्हा एकदा मोदी सरकार येईल पण भाजपच्या जागा कमी होण्याचा अंदाज आहे. भाजपच्या जागा 303 वरुन 290 पर्यंत खाली येऊ शकतात, तर प्रमुख विरोधी पक्ष काँग्रेसच्या जागा वाढण्याचा अंदाज आहे. मात्र काँग्रेसला 100 चा आकडा काही गाठता येणार नाही. काँग्रेसच्या जागा 52 वरुन 66 पर्यंत वाढू शकतात.
कसं केलं सर्वेक्षण?
इंडिया टीव्ही-सीएनएक्सचे हे सर्वेक्षण देशभरातील एकूण 44,548 प्रभावशाली मतदारांकडून त्यांना विचारलेल्या प्रश्नांवर मिळालेल्या मतांवर आधारित आहे. सर्वेक्षणात समाविष्ट एकूण मतदारांपैकी 23,871 पुरुष आणि 20,677 महिलांनी आपले मत दिलं आहे.
संबंधित बातमी
महत्त्वाच्या बातम्या
ट्रेंडिंग न्यूज
