Sharad Pawar Speech: शरद पवार 'बटेंगे तो कटेंगे' आणि 'लाडकी बहीण'चं नरेटिव्ह कसं कापतायत? भाषणांमधील दोन फॅक्टर्सची जोरदार चर्चा
Maharashtra Vidhan Sabha Election 2024: शरद पवारांच्या भाषणात 'त्या' दोन गोष्टींचा वारंवार उल्लेख, 'बटेंगे तो कटेंगे' आणि 'लाडकी बहीण'चं नरेटिव्ह कसं कापतायत?
मुंबई: राज्यातील विधानसभा निवडणुकीच्या प्रचाराची रणधुमाळी आता अंतिम टप्प्यात पोहोचली आहे. विविध राजकीय पक्षांचे प्रमुख नेते आपापल्या भाषणांनी मैदानं गाजवत आहेत. या सगळ्या प्रचारात महायुतीकडून 'लाडकी बहीण योजने'चे (Ladki Bahin Yojana) 1500 रुपये आणि 'बटेंगे तो कटेंगे' (Batenge to Katenge) या दोन मुद्द्यांवर विशेष भर दिला जात आहे. विधानसभा निवडणुकीपूर्वी 'लाडकी बहीण योजना' ही गेमचेंजर ठरेल, अशी चर्चा होती. तर भाजपची (BJP) 'बटेंगे तो कटेंगे' ही घोषणा हिंदू मतांचे ध्रुवीकरण घडवून आणेल, असा महायुतीचा कयास होता. हीच गोष्ट लक्षात घेऊन महाविकास आघाडीचा प्रमुख चेहरा आणि खंदा आधार असलेले शरद पवार (Sharad Pawar) 'बटेंगे तो कटेंगे' आणि 'लाडकी बहीण'च्या आधारे महायुतीकडून सुरु असलेल्या वातावरणनिर्मितीला छेदण्याचा प्रयत्न करताना दिसत आहेत. महायुतीकडून या दोन नरेटिव्हच्या आधारे मतदारांच्या मनावर ज्या गोष्टी बिंबवण्याचा प्रयत्न सुरु आहे, ते शरद पवार सातत्याने खोडून काढताना दिसत आहेत.
शरद पवार यांची अलीकडच्या काही सभांमधील भाषणं पाहिल्यास ही गोष्ट लक्षात येऊ शकते. शरद पवार आपल्या सभांमध्ये सातत्याने 'लाडकी बहीण योजने'बाबत बोलत आहेत. राज्य सरकार महिलांना प्रत्येक महिन्याला 1500 रुपये देत आहे, या गोष्टीचा आनंद आहे. मात्र, या पैशांपेक्षा राज्यातील महिलांची सुरक्षा महत्त्वाची असल्याचे शरद पवार सातत्याने सांगत आहेत. यासाठी शरद पवार हे बदलापूर लैंगिक शोषण प्रकरणासह गेल्या काही वर्षांमध्ये राज्यात महिलांवर झालेल्या अत्याचारांची आकडेवारी मांडताना दिसत आहेत. राज्यात भाजपचे सरकार आल्यानंतर 67,381 महिलांवर अत्याचार झाले. दररोज पाच स्त्रियांवर अत्याचार होतात. महिला बेपत्ता होण्याचे प्रमाण वाढले आहे. राज्यात 64 हजार महिला बेपत्ता झाल्या. सरकार एका बाजूला सांगत होते लाडकी बहीण. एका बाजूला 1500 द्यायचे आणि दुसऱ्या बाजूला हजारो स्त्रिया बेपत्ता व्हायच्या, हे पाप यांच्या काळात झाले, असे शरद पवार आपल्या भाषणांमध्ये सातत्याने सांगताना दिसत आहेत.
पुण्यातील विशिष्ट भागात भाजपला एकगठ्ठा मतदान होतं, त्याला आम्ही व्होट जिहाद म्हणत नाही: शरद पवार
भाजपकडून जातीच्या आधारावर होणारे मतविभाजन टाळण्यासाठी 'बटेंगे तो कटेंगे', 'एक है तो सैफ है' या घोषणांचा सातत्याने उल्लेख केला जात आहे. यावरही शरद पवार हे पुण्यातील मतदानाच्या पॅटर्नचे उदाहरण देत 'व्होट जिहाद'चे नरेटिव्ह खोडून काढताना दिसत आहेत. त्यांनी एका वृत्तवाहिनीला दिलेल्या मुलाखतीत म्हटले की, पुण्याच्या काही भागांमध्ये एक विशिष्ट समाज आहे, हिंदू समाज आहे, त्यांनी भाजपला मतदान केलं, आम्हाला त्याची सवय आहे. इथे असंच मतदान होतं, हे आम्हाला माहिती आहे. अमुक ठिकाणी अमुक होईल, असे आम्ही गृहीत धरलेले असते. याचा अर्थ त्याला तुम्ही 'व्होट जिहाद' समजत नाही. 'व्होट जिहाद' हा शब्द वापरुन विशेषत: देवेंद्र फडणवीस आणि त्यांचे सहकाऱ्यांनी एकप्रकारे या निवडणुकीला धार्मिक रंग देण्याचा प्रयत्न केलेला दिसतोय. आमचा त्याला विरोध आहे, असे शरद पवार यांनी अलीकडेच एका वृत्तवाहिनीला दिलेल्या मुलाखतीत सांगितले होते.
आणखी वाचा
महत्त्वाच्या बातम्या
