East Nagpur Vidhan Sabha: भाजपच्या विजयाची घोडदौड कायम राहणार, की शरद पवारांची राष्ट्रवादी विजय खेचणार? पूर्व नागपुरात कौल कुणाला?
East Nagpur Vidhan Sabha Constituency : नागपूरच्या 12 मतदारसंघासह पूर्व नागपुरातील चौरंगी लढतीत यंदा महायुती की मविआ, या पैकी कोण बाजी मारणार हे पाहणे औत्सुक्याचे ठरणार आहे.
East Nagpur Vidhan Sabha Constituency : महाराष्ट्र विधानसभा निवडणूक 2024 ची (Maharashtra Assembly Election 2024) रणधुमाळी सुरु झाली आहे. या निवडणुकांच्या अनुषंगाने जवळ जवळ सर्वच राजकीय नेते मैदानात उतरून आपल्या पक्षाचा आणि उमेदवारांचा प्रचार, प्रसार करत आहे. तर गल्लीपासून दिल्लीपर्यंत राजकीय मंडळी आपला अजेंडा मतदारराजाला पटवून देत मतांचा जोगवा मागत असल्याचे चित्र आहे. दरम्यान, देशाच्या केंद्रस्थानी असलेल्या आणि राज्याची उपराजधानी असलेल्या नागपूर(Nagpur) जिल्ह्यात यंदा कोणाची हवा असणार आहे, हे पाहणे महत्वाचे ठरणार आहे. कारण राज्याचे उपमुख्यमंत्री देवेंद्र फडणवीस (Devendra Fadnavis) आणि काँग्रेसचे अनेक दिग्गज नेते यंदा नागपूरच्या 12 मतदारसंघातून रिंगणात उतरून एकमेकांविरुद्ध आव्हान देत असल्याचे चित्र आहे. त्यामुळे नागपूरच्या 12 मतदारसंघासह पूर्व नागपुरातील (East Nagpur Vidhan Sabha Constituency) चौरंगी लढतीत यंदा महायुती की मविआ, या पैकी कोण बाजी मारणार हे पाहणे औत्सुक्याचे ठरणार आहे.
महायुती-महाविकास आघाडीसह बंडखोरांचे आव्हान
दरम्यान, नागपुरातील 12 मतदारसंघापैकी गेल्या तीन टर्म पासून भाजपने एकहाती सत्ता प्रस्थापित केलेल्या पूर्व नागपुरात यंदा निवडणुकीची चुरस पाहायला मिळत आहे. कारण एकीकडे भाजपचे उमेदवार कृष्णा खोपडे हे विजयाचा चौकार लावण्यासाठी मैदानात उतरले आहे. तर दुसरीकडे महाविकास आघाडीकडून राष्ट्रवादी काँग्रेस शरद पवार गटाचे दुनेश्वर पेठे यांनी खोपडे यांच्या विरोधात शड्डू ठोकला आहे. एकीकडे भाजप आणि राष्ट्रवादीमध्ये प्रमुख लढत रंगली असताना या मतदारसंघात बंडखोरांचे मोठे आव्हन कळीचा मुद्दा ठरणार आहे. कारण दोन्ही प्रमुख उमेदवारांसमोर महायुती आणि मवितील बंडखोरांचे मोठे आव्हान असणार आहे.
भाजपचा विजयाचा चौकार, की मविआ विजय खेचणार?
पूर्व नागपूर कधीकाळी काँग्रेसचा गड मानला जात होता. मात्र 2009 साली या मतदारसंघात भाजपच्या कृष्णा खोपडे यांनी सुरुंग लावला, तसेच सलग विजयाची हैट्रिक देखील लगावली. मात्र यंदा या मतदारसंघातून भाजपने नवीन चेहरा द्यावा, असा एक सुर पुढे आला होता. मात्र भाजपने ही मागणी डावलून खोपडे यांनाच परत एकदा संधी दिली. भाजप प्रमाणे काँग्रेसमध्ये देखील हा मतदारसंघावर दावा होता, त्यासाठी खूप प्रयत्न देखील झाले. मात्र अखेरच्या क्षणी येथून शरद पवार गटाचे दुनेश्वर पेठे यांना तिकीट देत मैदानात उतरवले. यामुळे नाराज झालेले गेल्यावेळचे उमेदवार पुरुषोत्तम हजारे यांनी बंडखोरी करीत अपक्ष आव्हान दिले, तर अजित पवार गटाच्या आभा पांडे यांनी खोपडे यांच्याविरोधात उघड भूमिका घेतली आणि त्यांनी प्रचाराचे रान पेटविले आहे. त्यामुळे प्रस्थापित पक्षांच्या मुख्य लढतीत बंडखोर उमेदवारांचे देखील मोठे आव्हान असल्याचे चित्र आहे.
नागपूर पूर्व विधानसभा- 2014
कृष्णा खोपडे : भाजप (विजयी) १, ०३,९९२
पुरुषोत्तम हजारे : काँग्रेस - ७९,९७५
सागर लोखंडे : बसपा - ५,२८४
मंगलमूर्ती सोनकुसरे : वंचित - ४,३३८
नोटा - ३,४६०
नागपूर पूर्व विधानसभा- 2024
कृष्णा खोपडे : भाजप (विजयी) ९९,२३६
अभिजित वंजारी : काँग्रेस ५०,५२२
दिलीप रंगारी : बसपा १२,१६४
दुनेश्वर पेठे : राष्ट्रवादी ८,०६१
अजय दलाल : शिवसेना ७,४८१
नागपूर पूर्व लोकसभा 2024
नितीन गडकरी (महायुती) - 1,41, 313
विकास ठाकरे (महाविकास आघाडी) - 67, 942
हे ही वाचा
महत्त्वाच्या बातम्या
ट्रेंडिंग न्यूज
