फडणवीसांचा नाना काटेंना फोन, मावळ पॅटर्नवर चर्चा; बाळा भेगडे म्हणाले, भाजप आमच्यासोबत
पिंपरी चिंचवडमध्ये नाना काटेंनी बंडखोरी मागे घेताना मावळ पॅटर्नमधून भाजपने पाठिंबा काढल्याचा दावा केला आहे. पण हा दावा भाजप नेते बाळा भेगडेंनी खोडून काढला.
पुणे : राज्यातील विधानसभा निवडणुकांसाठी अंतिम लढती आज निश्चित झाल्या आहेत. उमेदवारी अर्ज मागे घेण्याच्या शेवटच्यादिवशी अनेक मतदारसंघात बंडखोरांनी आपली तलवार म्यान केल्याचं पाहायला मिळालं. त्यामध्ये, मावळ पॅटर्नची चर्चा जोरदार सुरू असून माजी नगरसेवक नाना काटे यांनीही माघार घेतली आहे. नाना काटे (Nana Kate) यांची बंडखोरी टाळण्यासाठी आज शरद पवार आणि अजित पवार फोनाफोनी केली होती. तर, उपमुख्यमंत्री देवेंद्र फडणवीस (Devendra Fadnavis) यांनीही नाना काटेंसोबत फोनवर संवाद साधला. त्यामुळे नाना काटे कोणता निर्णय घेतात? याकडे सर्वांचे लक्ष होते. अखेर नाना काटे यांनी आपली तलवार म्यान केल्याने चिंचवडमधील महायुतीचे उमेदवार शंकर जगताप यांना दिलासा मिळाला आहे. मात्र, त्या बदल्यात भाजप महायुतीने मावळमध्ये युती धर्म पाळावा अशी अपेक्षा नाना काटे यांनी देवेंद्र फडणवीस यांच्याशी बोलताना व्यक्त केली आहे. मात्र, मावळमधील भाजप ही सुनील शेळकेंविरुद्ध काम करणार असल्याचं बाळा भेगडेंनी म्हटलंय.
पिंपरी चिंचवडमध्ये नाना काटेंनी बंडखोरी मागे घेताना मावळ पॅटर्नमधून भाजपने पाठिंबा काढल्याचा दावा केला आहे. पण हा दावा भाजप नेते बाळा भेगडेंनी खोडून काढला. अगदी देवेंद्र फडणवीस आणि प्रदेशाध्यक्ष चंद्रशेखर बावनकुळे यांनी अजित पवारांचे शिलेदार सुनील शेळकेंचा प्रचार केला तरी स्थानिक भाजपा आमचे बंडखोर उमेदवार बापू भेगडेंचा प्रचार करणार, अशी आक्रमक भूमिका बाळा भेगडेंनी घेतली आहे. त्यामुळे, फडणवीसांच्या मध्यस्थीनंतरही मावळमध्ये सुनील शेळकेंविरुद्ध भाजप काम करणार की शेळकेंच्या समर्थनार्थ मैदानात उतरणार हे पाहावे लागेल.
देवेंद्र फडणवीसांचा नाना काटेंना फोन
उपमुख्यमंत्री देवेंद्र फडणवीस यांनी नाना काटेंना फोन करुन संवाद साधला. यावेळी, मावळ पॅटर्न आणि सुनील शेळकेंसंदर्भात चर्चा केली. ''मी संपूर्ण भाजप त्यांच्यामागे उभी करतोय, पण जे आपल्याला सोडून गेले आहेत, त्यांची मी तुम्हाला गॅरंटी देत नाही. मी स्वत: जात आहेत, सुनीलला माहितीय मी किती प्रयत्न केले, स्वत: बावनकुळे साहेब 4 तास तिथं बसून होते. मात्र, ते ऐकायला तयारी नाहीत. पण, मी भाजपची ताकद सुनील शेळकेंच्या पाठीशी उभी करतोय,'' असे म्हणत देवेंद्र फडणवीसांनी मावळ पॅटर्न हाणून पाडण्यासंदर्भात व महायुतीचा धर्म पाळण्याबाबत नाना काटेंना आश्वस्त केलं.
हेही वाचा
सोलापुरात दिलीप मानेंची माघार, पण धर्मराज काडादी लढणार; सुभाष देशमुखांविरुद्ध सांगली पॅटर्न?
महत्त्वाच्या बातम्या
