Rupali Chakankar On Asha Mirge Ashok Kharat Case: संपूर्ण वस्त्रातील स्त्रीला विवस्त्र करणाऱ्या विकृत प्रवृत्तीविरुद्ध एल्गार; रुपाली चाकणकर आक्रमक, आशा मिरगेंना धडाधड नोटीसा
Rupali Chakankar On Asha Mirge Ashok Kharat Case: नाशिकमधील भोंदूबाबा अशोक खरात प्रकरणात आशा मिरगे यांच्याकडून गंभीर आरोप केले होते.
Rupali Chakankar On Asha Mirge Ashok Kharat Case: राज्य महिला आयोगाच्या माजी अध्यक्षा रुपाली चाकणकर (Rupali Chakankar) यांनी राज्य महिला आयोगाच्या माजी अध्यक्षा आशा मिरगे (Asha Mirge) यांना नोटीस धाडली आहे. नाशिकमधील भोंदूबाबा अशोक खरात प्रकरणात (Ashok Kharat Case) आशा मिरगे यांच्याकडून गंभीर आरोप केले होते. त्याअनुषंगाने रुपाली चाकणकरांकडून आशा मिरगेंना नोटीस पाठवण्यात आली आहे. याबाबतची माहिती स्वत: रुपाली चाकणकरांनी सोशल मीडियावर व्हिडीओ प्रसिद्ध करुन दिली.
अशोक खरात प्रकरणामध्ये पहिल्या दिवसापासूनची माझी भूमिका ठाम आणि स्पष्टपणाची होती. खराताच्या कोणत्याही आर्थिक व्यवहाराशी, जमिनीमधल्या पार्टनरशिपशी दुरान्वये माझा संबंध नव्हता, असं रुपाली चाकणकर म्हणाल्या. मी कधी कोणत्याही महिलेला खरातकडे घेऊन गेलेली नाही. ना माझा अक्षेपहार्य फोटो व्हिडीओ होता. पण तरीसुद्धा गेली दीड-दोन महिने अतिशय अश्लील, असभ्य भाषेमध्ये विधानं करत, कोणताही पुरावा नसताना माझ्यावर, माझ्या कुटुंबावर केलेले आरोप हे अतिशय वेदनादायक होते. आणि म्हणून आता ही माझी लढाई कायद्याच्या चौकटीतून आहे, असं रुपाली चाकणकरांनी सांगितले. (Rupali Chakankar On Ashok Kharat Case)
AI चा वापर करून व्हिडीओ बनवले- रुपाली चाकणकर (Rupali Chakankar On Asha Mirge)
इतरांप्रमाणेच माझ्या कुटुंबीयांनी खरातला गुरु मानलं होतं. आणि म्हणून जो पाद्यपूजेचा व्हिडीओ होता, तो अतिशय जुना व्हिडिओ होता. त्यावेळेस मी आयोगाची अध्यक्षही नव्हते. पण तरीसुद्धा खरात प्रकरणाचा तपास हा पारदर्शकपणे व्हावा यासाठी मी राज्य महिला आयोगाच्या अध्यक्षपदाचा आणि प्रदेश अध्यक्षपदाच्या या दोन्ही पदांचा राजीनामा दिला. तरीसुद्धा ज्या पद्धतीची चिखलफेक झाली, AI चा वापर करून ज्या पद्धतीचे व्हिडीओ बनवले गेले आणि सातत्याने बदनाम करण्याचं षडयंत्र जे रचलं गेलं, त्याच्यासाठीची ही लढाई कायद्याच्या चौकटीतून. आणि म्हणून आशा मिरगे यांनी डिबेट शोमध्ये अतिशय असभ्य भाषेमध्ये जी विधानं केली, ती विधानं ऐकून तर मला आश्चर्याचा धक्काच बसला आणि म्हणून मी 4 एप्रिलला पहिली नोटीस ही आशा मिरगे यांना पाठवली होती. कायद्यापासून पळ काढताना स्वतःचा बचाव करण्यासाठी या बाईने ही नोटीस स्वीकारली नाही, म्हणून पोस्ट ऑफिसच्या माध्यमातून दोनदा ही नोटीस परत घरी पाठवली. एकूण तीन वेळा नोटीस पाठवली गेली पण ही नोटीस या बाईने स्वीकारली नाही. अनक्लेम म्हणून ही नोटीस परत आली आणि म्हणून मला माझगाव कोर्टातून फौजदारी फिर्याद दाखल करावी लागली.
संपूर्ण वस्त्रात असलेल्या स्त्रीला विवस्त्र करण्याचा प्रयत्न या विकृत मनोवृत्तीच्या लोकांनी केला- रुपाली चाकणकर (Rupali Chakankar On Asha Mirge)
माननीय न्यायालयाने याची दखल घेऊन आशा मिरगेंना 2 जुलै 2026 रोजी सकाळी 11 वाजता कोर्टात हजर राहण्याची ऑर्डर काढलेली आहे. त्यावेळेस मी देखील हजर असेलच. कारण की हा लढा स्त्रीत्वाच्या सन्मानाचा आहे. यामध्ये आशा मिरगेंप्रमाणेच इतर काही महिलांनी देखील कोणताही पुरावा नसताना अतिशय बेताल विधानं केली. सातत्याने बदनाम करण्याचा प्रयत्न केला, आरोप केले. कोणताही पुरावा त्या सादर करू शकल्या नाहीत. त्या सगळ्यांना दोन दिवसांपूर्वी दिल्ली हायकोर्टातून नोटिसा पाठवलेल्या आहेत. दिल्ली हायकोर्टात सुद्धा मी उपस्थित राहणार आहे. माझा हा लढा स्त्रीत्वाच्या सन्मानाचा. इथून पुढे कोणत्याही महिलेच्या चारित्र्यावरती शिंतोडे उडवले जाऊ नयेत, यासाठी हा लढा आहे. आणि म्हणून खऱ्या अर्थानं हा महाराष्ट्र छत्रपती शिवरायांच्या विचारांचा महाराष्ट्र, जिजाऊ, सावित्री, अहिल्या, रमाई, भीमाईचा महाराष्ट्र. संपूर्ण वस्त्रात असलेल्या स्त्रीला विवस्त्र करण्याचा प्रयत्न या विकृत मनोवृत्तीच्या लोकांनी केला. आणि म्हणून या विकृतीच्या विरोधातला माझा लढा आहे. ही लढाई मी निश्चितपणाने लढेल. पहिल्या दिवसापासून जे सांगत आले ते आज ही सांगते, सत्य प्रखरतेने तुमच्यासमोर आहे. कोणताही पुरावा नाही, कोणतेही दुष्कृत्य, गैरकृत्य कधीही केलेलं नाही. इतरांप्रमाणे आम्ही हे आध्यात्मिक गुरु खरातला मानलं होतं, याच्या पलीकडे आमची कोणतीही भूमिका नव्हती. आणि म्हणून हा लढा मी कायद्याच्या चौकटीतून लढतीये. 2 जुलै सकाळी 11 वाजता आशा मिरगे हजर राहा...मी देखील स्वतः माझगाव कोर्टात असेल, असं रुपाली चाकणकर म्हणाल्या.
आशा मिरगे रुपाली चाकणकरांबाबत काय काय म्हणाल्या होत्या? (Asha Mirge On Rupali Chakankar)
रुपाली चाकणकर या असंख्य महिलांना अशोक खरातकडे घेऊन जायच्या असा गौप्यस्फोट आशा मिरगे यांनी एबीपी माझाशी बोलताना केला होता. कुंपणच शेत खाते असं आपण ऐकलं होतं. पण इथं कुंपणच आख्ख शेत लांडग्यापुढे टाकतंय असा प्रकार घडला असा आरोप आशा मिरगे यांनी रुपाली चाकणकरांवर केला. रुपाली चाकणकर या महिला आयोगाच्या अध्यक्ष असताना कुठल्याही महिलेल्या आपल्या वाटल्या नाहीत, त्यांची उठबस नेहमी मंत्र्यांमध्ये आणि अधिकाऱ्यांमध्ये असायची असं मिरगे म्हणाल्या. अशोक खरातसोबत संबंध ठेवणाऱ्यांमध्ये अनेक आयएएस, आयपीएस अधिकारी आहेत. त्यामध्ये त्यांचे काही मित्रदेखील आहेत. काही लोक अशोक खरातचे पार्टनर असून त्यामध्ये दीपक केसरकर आणि रुपाली चाकणकरांचा नंबर येतो, असा आरोपही आशा मिरगेंनी केला होता. रुपाली चाकणकरांचा ड्रेसिंग सेन्स, त्यांचा मेक अप, ग्लॅमर पाहून अनेक महिलांना कॉम्प्लेक्स व्हायचा. या महिलेचा वावर हा सतत मंत्री, अधिकारी यांच्यासोबतचा असायचा. त्या सतत राजकारण करायच्या. त्यामुळे कुणालाही त्या आपल्या वाटल्या नाहीत, असंही आशा मिरने म्हणाल्या होत्या.
रुपाली चाकणकरांचा आक्रमक पवित्रा, धडाधड नोटीस धाडल्या, VIDEO:
संबंधित बातमी:
महत्त्वाच्या बातम्या
