Crime : 'वर्क फ्रॉम होम' नोकरी द्यायचा, परदेशातून कमवत होता 'म्होरक्या', 23 राज्यातील 160 जणांची कोट्यवधींची फसवणूक

Punjab Crime : पोलिसांनी दिलेल्या माहितीनुसार, या फसवणुकीचे रॅकेट चालवणारा म्होरक्या हा परदेशातून क्रिप्टोकरन्सीमध्ये पैसे मिळवत असल्याचे प्राथमिक तपासात समोर आले आहे.

Punjab Crime marathi news

Punjab Crime : 'वर्क फ्रॉम होम'(Work From Home) नोकरी देण्याच्या नावाखाली फसवणूक करणाऱ्या एका मोठ्या टोळीचा पंजाब पोलिसांनी (Punjab Police) पर्दाफाश केला आहे. याप्रकरणी पोलिसांनी 4 जणांना अटक केली आहे. पोलिसांनी दिलेल्या माहितीनुसार, या टोळीने तब्बल 23 राज्यातील 160 लोकांची फसवणूक केली होती. या टोळीचा मुख्य म्होरक्या परदेशात बसला आहे, ज्याला क्रिप्टो करन्सीमध्ये पैसे पाठवले जात होते, अशी माहिती पोलिसांनी दिली आहे.

 

मोठ्या टोळीचा पंजाब पोलिसांकडून पर्दाफाश, एका महिलेची 25 लाखांची फसवणूक

पंजाबचे पोलिस महासंचालक (DGP) गौरव यादव यांनी सांगितले की, घरातून नोकरी देण्याच्या बहाण्याने फसवणूक करणाऱ्या एका मोठ्या टोळीचा पोलिसांनी पर्दाफाश केला आहे. पोलिसांनी आसामच्या वेगवेगळ्या जिल्ह्यांमधून चार सायबर गुन्हेगारांना अटक करून ऑनलाइन नोकरीच्या फसवणुकीच्या रॅकेटचा पर्दाफाश केला आहे. सायबर क्राईम पोलीस अधिकारी व्ही. नीरजा यांनी सांगितले की, या प्रकरणी एका महिलेची गुंडांनी 25 लाख रुपयांची फसवणूक केली आहे. महिलेच्या तक्रारीनंतर सायबर क्राईम पथकाने या प्रकरणाचा तपास केला असता ही टोळी आसाममधून कारवाया करत असल्याचे आढळून आले.

 

देशभरात सायबर फसवणुकीचे रॅकेट

पोलीस अधिकाऱ्यांनी आपल्या निवेदनात म्हटलंय की, आरोपी हे लोकांना टेलीग्राम ॲपद्वारे घरून कामाचे आमिष दाखवून अडकवायचे. लोकांचा विश्वास संपादन करण्यासाठी, फसवणूक करणारे त्यांना सुरुवातीला छोटी कामे देत आणि त्या बदल्यात काही पैसेही पाठवायचे. यानंतर मोठ्या परताव्याच्या आमिषाने, तसेच वेगवेगळ्या बहाण्याने पैसे जमा करण्यास सांगायचे. पोलिसांनी सांगितले की, या निमित्ताने पंजाब पोलिसांना आणखी एक महत्त्वाचा सुगावा हाती लागला असून ज्यामुळे देशभरात पसरलेल्या सायबर फसवणुकीचे रॅकेट उघड झाले आहे.

 

आसाममधून चार जणांना अटक

पंजाब पोलिसांच्या माहितीनुसार, जहीरुल इस्लाम, रफीउल इस्लाम, मेहबूब आलम आणि अजीजुर रहमान अशी अटक करण्यात आलेल्यांची नावे आहेत. ज्यापैकी जहीरुल इस्लाम आणि रफीउल इस्लाम या आरोपींना आसामच्या नागाव जिल्ह्यातून अटक करण्यात आलीय. त्यांच्याकडून दोन स्वाइप मशीन, दोन बायोमेट्रिक स्कॅनर, एक आय स्कॅनर, एक फिंगरप्रिंट स्कॅनर, 38 पॅन कार्ड, 32 डेबिट आणि क्रेडिट कार्ड, 16 सिमकार्ड, 10 मतदार कार्ड, नऊ आधार कार्ड, 10 बँक खाते पासबुक/चेक बुक जप्त केले. तसेच त्यांच्याकडून पाच सरकारी स्टॅंप, पाच मोबाईल फोन, एक लॅपटॉप, दोन पेन ड्राईव्ह आणि एक ओळखपत्रही जप्त करण्यात आले आहे. पोलिसांच्या माहितीनुसार त्यांनी ऑनलाइन सेवा देण्यासाठी ग्राहक सेवा केंद्र चालवले, त्यातून झटपट पैसे कमावले, पॅन कार्ड, मतदार कार्ड आणि आधार कार्ड बनवण्यासाठी लोकांच्या कागदपत्रांचा वापर केला. या फसवणुकीसाठी त्याने एका सॉफ्टवेअरचा वापर केला. तर गुवाहाटी येथून अटक करण्यात आलेल्या मेहबूब आलमने कमिशनच्या आधारे अजीजूर रहमानला बँक खाती उपलब्ध करून दिल्याचे उघड झाले. आसाममधील मोरीगाव जिल्ह्यातून अजीजूर रहमानला अटक करण्यात आली आहे.

 

आतापर्यंत 23 राज्यातील 160 जणांची फसवणूक 

पंजाब पोलिसांच्या माहितीनुसार, या टोळीने आतापर्यंत 23 राज्यातील 160 जणांची फसवणूक केल्याचे तपासात समोर आले आहे. पोलिसांनी दिलेल्या माहितीनुसार, या फसवणुकीचे रॅकेट चालवणारा म्होरक्या हा परदेशातून क्रिप्टोकरन्सीमध्ये पैसे मिळवत असल्याचे प्राथमिक तपासात समोर आले आहे.

 

हेही वाचा>>>