धक्कादायक! 10 रुपयांच्या वर्गणीवरून हुज्जत घातली, नाशकात टोळक्यानं कोयत्यानं अल्पवयीन मुलावर जीवघेणा हल्ला केला
Nashik Crime :रक्ताच्या थारोळ्यात पडलेल्या मुलाला तातडीने रुग्णालयात हलवण्यात आले .
Nashik Crime : अवघ्या 10 रुपयांच्या वर्गणीवरून सुरू झालेल्या किरकोळ वादाचं रुपांतर गंभीर हाणामारीत झाल्याची धक्कादायक घटना भद्रकाली परिसरातील नानावली गोठ्याजवळ घडली. या हल्ल्यात 16 वर्षीय रजा फिरोज शेख या अल्पवयीन युवकावर टोळक्याने एकत्र येत कोयत्याने थेट गळ्यावर वार केला. रक्ताच्या थारोळ्यात पडलेल्या मुलाला तातडीने रुग्णालयात हलवण्यात आले . त्याची प्रकृती अत्यंत चिंताजनक असल्याचे सांगण्यात येत आहे . रुणालयात मुलाच्या नातेवाईकांचा प्रचंड संताप अनावर झाला आहे .
काही दिवसांपासून नाशकात गुन्हेगारीचं प्रमाण वाढत असल्याचं चित्र असून किरकोळ वादातून होणाऱ्या या हाणामाऱ्या गंभीर स्वरूपाच्या होत आहेत .
नेमकं घडलं काय?
ही घटना सोमवारी (30 जून) रात्रीच्या सुमारास घडली. प्राथमिक माहितीनुसार, परिसरातील काही युवकांमध्ये वर्गणीच्या रकमेवरून वाद झाला होता. रकमेची मागणी, तिच्यावरून झालेली हुज्जत आणि त्यातून निर्माण झालेला राग इतका वाढला की टोळक्याने थेट हल्ला केला. हल्लेखोरांनी धारदार शस्त्र वापरत रजावर गळ्याजवळ वार केला. हल्ला इतका जबरदस्त होता की रजा रक्ताच्या थारोळ्यात पडला. परिसरातील नागरिकांनी प्रसंगावधान राखत त्याला तत्काळ नाशिकच्या सिव्हिल हॉस्पिटलमध्ये दाखल केलं. मात्र, डॉक्टरांनी त्याची प्रकृती अत्यंत गंभीर असल्याचे सांगत पुढील उपचारासाठी त्याला सह्याद्री हॉस्पिटलमध्ये हलवलं. सध्या त्याच्यावर उपचार सुरू असून, त्याची स्थिती चिंताजनक असल्याचं डॉक्टरांनी सांगितलं आहे. या प्रकारामुळे भद्रकाली परिसरात तणावाचं वातावरण पसरलं आहे. स्थानिक नागरिकांमध्ये भीती निर्माण झाली असून, सुरक्षा व्यवस्था वाढवण्याची मागणी होत आहे.
भद्रकाली पोलीस अलर्ट मोडवर
घटनेची माहिती मिळताच भद्रकाली पोलीस घटनास्थळी दाखल झाले. पोलिसांनी तात्काळ तपास सुरू करत हल्लेखोरांविरुद्ध गंभीर स्वरूपाचा गुन्हा दाखल केला आहे. आरोपींचा शोध घेण्यासाठी पोलीस पथक कार्यरत झालं आहे. किरकोळ कारणावरून अशा हिंसक प्रकारांना आळा घालण्यासाठी पोलिसांनी कठोर कारवाई करण्याची मागणी होत आहे.
महत्त्वाच्या बातम्या
